អន្តរជាតិ ៖ តម្លៃមាសអន្តរជាតិ នៅថ្ងៃទី១០ ខែមិថុនា ឆ្នាំ២០២៦ បានដាំក្បាលចុះដល់កម្រិតទាបបំផុតក្នុងរយៈពេល១១សប្តាហ៍ ដោយសារសន្ទស្សន៍ប្រាក់ដុល្លារអាមេរិក និងតម្លៃប្រេងឆៅអន្តរជាតិបានកើនឡើង ដែលបណ្តាលមកពីជម្លោះថ្មីរវាងសហរដ្ឋអាមេរិក និងអ៊ីរ៉ង់ ដែលជំរុញឱ្យមានការព្រួយបារម្ភអំពីអតិផរណា និងការដំឡើងអត្រាការប្រាក់។ នេះបើតាមប្រភពពី Reuters បានចេញផ្សាយ។
តម្លៃមាសអន្តរជាតិដាំក្បាលចុះដល់ ១,៩% មកនៅត្រឹម ៤ ១៨០ ដុល្លារអាមេរិកក្នុង១អោន ឬស្មើនឹង ៥ ០៣៦ ដុល្លារក្នុងតម្លឹង គិតត្រឹមម៉ោង ១១ និង ១៥ នាទីព្រឹកថ្ងៃទី១០ ខែមិថុនា ឆ្នាំ២០២៦ ម៉ោងនៅកម្ពុជា។
សន្ទស្សន៍ប្រាក់ដុល្លារអាមេរិកបានឡើងថ្លៃ ធ្វើឱ្យមាសដុំដែលមានតម្លៃកំណត់ជាប្រាក់ដុល្លារអាមេរិក មានតម្លៃកាន់តែថ្លៃសម្រាប់អ្នកកាន់រូបិយប័ណ្ណផ្សេងទៀត។ ចំណែកតម្លៃប្រេងឆៅអន្តរជាតិក៏បានហក់ឡើង ១% ដែលបានបង្កឱ្យមានការព្រួយបារម្ភជុំវិញបញ្ហាអតិផរណា និងបន្ថែមការរំពឹងទុកដែរមានស្រាប់ថា អត្រាការប្រាក់នឹងរក្សានៅកម្រិតខ្ពស់ក្នុងរយៈពេលយូរជាងមុន។
សហរដ្ឋអាមេរិកកាលពីថ្ងៃទី៩ ខែមិថុនា ឆ្នាំ២០២៦ បានបើកការវាយប្រហារប្រឆាំងនឹងអ៊ីរ៉ង់ បន្ទាប់ពីលោកប្រធានាធិបតី ដូណាល់ ត្រាំ (Donald Trump) ថ្លែងថា អ៊ីរ៉ង់បានបាញ់ទម្លាក់ឧទ្ធម្ភាគចក្រ Apache របស់អាមេរិកនៅច្រកសមុទ្រហ័រមូស (Hormuz) ដែលធ្វើឱ្យមានការសង្ស័យកាន់តែខ្លាំងលើលទ្ធភាពសម្រេចបានកិច្ចព្រមព្រៀងសន្តិភាព និងធ្វើឱ្យកិច្ចព្រមព្រៀងលើបទឈប់បាញ់កាន់តែផុយស្រួយបន្ថែមទៀត។
ទន្ទឹមជាមួយគ្នានោះ កងឆ្មាំបដិវត្តន៍អ៊ីរ៉ង់បានថ្លែងថា ពួកគេបានបើកការវាយប្រហារសងសឹកប្រឆាំងនឹងមូលដ្ឋានទ័ពអាមេរិកនៅក្នុងប្រទេសហ្ស៊កដានី និងគោលដៅចំនួន ២១ ផ្សេងទៀតក្នុងតំបន់ឈូងសមុទ្រ នៅថ្ងៃទី១០ ខែមិថុនា ឆ្នាំ២០២៦ ដើម្បីឆ្លើយតបទៅនឹងការវាយប្រហាររបស់អាមេរិក។
យោងតាមរបាយការណ៍ពី CME FedWatch បានឱ្យដឹងថា បច្ចុប្បន្នក្រុមអាជីវករកំពុងប៉ាន់ប្រមាណអំពីឱកាសច្រើនជាង ៧០% ដែលសហរដ្ឋអាមេរិកនឹងដំឡើងអត្រាការប្រាក់នៅត្រឹមខែធ្នូ។ ស្របពេលដែលទីផ្សារកំពុងរង់ចាំរបាយការណ៍អតិផរណាដ៏សំខាន់របស់សហរដ្ឋអាមេរិកនៅសប្តាហ៍នេះ រួមទាំងទិន្នន័យសន្ទស្សន៍តម្លៃអ្នកប្រើប្រាស់ (CPI) សម្រាប់ខែឧសភាចេញផ្សាយនៅថ្ងៃនេះ និងសន្ទស្សន៍តម្លៃអ្នកផលិត (PPI) ចេញផ្សាយនៅថ្ងៃស្អែក ដើម្បីវាយតម្លៃពីជំហរគោលនយោបាយរូបិយវត្ថុរបស់ Fed៕
ចែករំលែកព័តមាននេះ