សង្គ្រាមអ៉ីរ៉ង់ ៖ កងទ័ពអាមេរិកប្រកាសនាថ្ងៃទី៩ មិថុនា ថា បានវាយប្រហារប្រឆាំងអ៉ីរ៉ង់ ក្រោយការកម្ទេចឧទ្ធម្ភាគចក្រធុនAPACHE មួយគ្រឿងរបស់កងទ័ពអាមេរិក ក្នុងដែនទឹកនៃឆ្នេរសមុទ្រអូម៉ង់ ដែលប្រធានាធិបតីអាមេរិកលោកដូណាល់ត្រាំចាត់ទុកថា នោះជាស្នាដៃរបស់អ៉ីរ៉ង់។
ក្នុងសេចក្ដីប្រកាសមួយផ្សាយតាមបណ្ដាញសង្គម ទីបញ្ជាការដ្ឋានកណ្ដាលកងទ័ពអាមេរិកនៅមជ្ឈឹមបូព៌ាគូសបញ្ជាក់ថា ការវាយប្រហារទាំងនេះនឹងជាចម្លើយតបមួយសមស្រប ចំពោះការឈ្លានពានដ៏អយុត្តិធម៌របស់អ៉ីរ៉ង់។ ការប្រកាសនេះ ធ្វើឡើងបន្ទាប់ពីលោកត្រាំចោទប្រកាន់អ៉ីរ៉ង់ថា វាយប្រហារទម្លាក់ឧទ្ធម្ភាគចក្រមួយគ្រឿងហើយសន្យាថា អាមេរិកនឹងតបតវិញ។
បណ្ដាសារព័ត៌មានអ៉ីរ៉ង់រាយការណ៍ថា ស្នូរផ្ទុះនានាបានលាន់ឮលើកោះមួយរបស់អ៉ីរ៉ង់ក្នុងច្រកសមុទ្រហ័រមូស។ ប្រមុខការទូតអ៉ីរ៉ង់អះអាងថា កងកម្លាំងយោធាបរទេសដែលមានវត្តមានជិតដែនដីរបស់ប្រទេស អាចមានគ្រោះថ្នាក់ជាប្រចាំ។
តាមអ្នកទទួលខុសត្រូវអាមេរិកមួយរូបថា ឧទ្ធម្ភាគចក្រធុនAPACHE នោះ បានធ្លាក់បន្ទាប់ពីបុកជាមួយដ្រូនអ៉ីរ៉ង់១គ្រឿង ហើយការស៊ើបអង្កេតមួយកំពុងធ្វើ ។ គេមិនទាន់ដឹងថា តើការបុកនោះកើតមានដោយអចេតនាឬយ៉ាងណាឡើយ ហើយសេចក្ដីថ្លែងការណ៍ផ្លូវការទាំងឡាយគ្រាន់តែគូសបញ្ជាក់ថា គ្រោះថ្នាក់នោះជាកម្មវត្ថុនៃការស៊ើបអង្កេតមួយ។ ចំណែកបណ្ដាសារព័ត៌មានអាមេរិកគ្រាន់តែរាយការណ៍ថា ជាការបុកគ្នាមួយជាមួយដ្រូនអ៉ីរ៉ង់ប៉ុណ្ណោះ។ ចំពោះលោកត្រាំវិញលើកឡើងថា ឧទ្ធម្ភាគចក្រប្រយុទ្ធដ៏ទំនើបនោះរងការវាយប្រហារពេលកំពុងហោះហើរល្បាត លើច្រកសមុទ្រហ័រមូសហើយក៏ធ្លាក់។ លោកបន្តថា អាមេ
រិកចាំបាច់ត្រូវឆ្លើយតបវិញចំពោះការវាយប្រហារនេះ។
កងទ័ពអាមេរិកបន្ទាប់មកប្រកាសថា ខ្លួនបានវាយប្រហារអ៉ីរ៉ង់។ ក្រោយការធ្លាក់ឧទ្ធម្ភាគចក្រនោះ មកកងទ័ពអាមេរិកបានប្រើជាលើកដំបូងនាវាដ្រូន ដើម្បីជួយសង្គ្រោះអ្នកបើកឧទ្ធម្ភាគចក្រ២នាក់ ដែលស្ថិតក្នុងឧទ្ធម្ភាគចក្រប្រយុទ្ធធ្លាក់នៅជិតច្រក
សមុទ្រហ័រមូស ។ តាមលោកត្រាំថាពួកគេសុខសប្បាយទេ ៕
ចែករំលែកព័តមាននេះ