ខេត្តមណ្ឌលគិរី ៖ មន្ត្រីកងរាជអាវុធហត្ថលើផ្ទៃប្រទេសម្នាក់ស្លា.ប់បាត់បង់ ជីវិតភ្លាមៗដោយសារព្យាយាមស្ទាក់ឃាត់រថយន្តកាមរីមួយគ្រឿងដែល សង្ស័យថា ផ្ទុកឈើគ្រញូង ហើយត្រូវរថយន្តនោះបុកប៉ើងជាង៥០ម៉ែត្រ។ ហេតុការណ៍នេះកើតឡើងនៅវេលាម៉ោង៤ និង១០នាទីរសៀល ថ្ងៃទី៣
ខេត្តមណ្ឌលគិរី ៖ មន្ត្រីកងរាជអាវុធហត្ថលើផ្ទៃប្រទេសម្នាក់ស្លាប់បាត់បង់ជីវិតភ្លាមៗដោយសារព្យាយាមស្ទាក់ឃាត់រថយន្តកាមរីមួយគ្រឿងដែលសង្ស័យថា ផ្ទុកឈើគ្រញូង ហើយត្រូវរថយន្តនោះបុកប៉ើងជាង៥០ម៉ែត្រ។ ហេតុការណ៍នេះកើតឡើងនៅវេលាម៉ោង៤ និង១០នាទីរសៀល ថ្ងៃទី៣ សីហា នៅមុខស្នាក់ការអភិរក្សជីវៈចម្រុះសីមាក្នុងភូមិអូរលាម ឃុំស្រែក្ទម្ព ស្រុកកែវសីមា។
លោកប៉ែត ភក្ត្រា អនុប្រធានកម្រងកម្មវិធីអភិរក្សជីវៈចម្រុះសីមាឱ្យដឹងថា មុនពេលកើតហេតុ លោកនិងកម្លាំងរួមការងារបានដើរល្បាតនៅតំបន់អភិរក្សក៏ប្រទះឃើញរថយន្តកាមរីមួយគ្រឿង បើកចេញពីព្រៃអភិរក្សមកលើផ្លូវជាតិលេខ៧៦A ឆ្ពោះទៅស្រុកកែវសីមា។ ដោយមានការសង្ស័យថា រថយន្តនោះផ្ទុកឈើខុសច្បាប់ក៏បើកដេញ និងហៅឱ្យឈប់ តែរថយន្តនោះមិនព្រមឈប់ និងបើកកាន់តែលឿនថែមទៀត។ ដោយដេញមិនទាន់លោកបានទូរស័ព្ទទៅមន្ត្រីនៅស្នាក់ការជួយស្ទាក់ឃាត់ដើម្បីត្រួតពិនិត្យមើល តែរថយន្តនោះមិនបានឈប់ទេក៏បើកបំបុកបារាស់ ខណៈមន្ត្រីប៉េអឹមរបស់លោកដែលទៅដាក់បារាស់បានឈរឃាត់ឱ្យឈប់នៅកណ្តាលផ្លូវក៏ត្រូវបុកស្លាប់តែម្តង។
លោកប៉ែក ភ័ក្ត្រា ឱ្យដឹងថា បន្ទាប់ពីឃើញជនសង្ស័យបើករថយន្តបំបុកយ៉ាងសាហាវបែបនេះលោកនិងកម្លាំងឯទៀតបានបើករថយន្តដេញតាមបន្តទៀត។ លុះដេញបានចំងាយប្រហែល៣០០ម៉ែត្រពីស្នាក់ការស្រាប់តែប្រទះឃើញរថយន្តមួយគ្រឿងទៀតម៉ាកស្តារិចពណ៌ស-ក្រហម ពាក់ស្លាកលេខភ្នំពេញ២L៨៤២៩ ដែលបើកបរដោយឈ្មោះធូរ បើកពាំងពីមុខរថយន្តរបស់លោកក៏បុកគ្នាមួយសាទៀត បណ្តាលឱ្យក្រឡាប់នៅលើផ្លូវជាតិតែម្តង។ រថយន្តម៉ាកស្តារិចជាកម្មសិទ្ធិរបស់ឈ្មោះធូរ ជាបក្សពួករបស់រថយន្តសង្ស័យដឹកឈើដែលបើកគេចទៅបាត់នោះ ទើបឈ្មោះធូរបើករថយន្តទៅពាំងទទឹងផ្លូវដោយចេតនាដើម្បីកុំឱ្យសមត្ថកិច្ចដេញចាប់រថយន្ត និងជនសង្ស័យបាន។ ឈ្មោះធូរត្រូវសមត្ថកិច្ចចាប់ខ្លួនភ្លាមនៅកន្លែងកើតហេតុ។
លោកបន្ថែមឱ្យដឹងទៀតថា មន្ត្រីកងរាជអាវុធហត្ថលើផ្ទៃប្រទេសដែលស្លាប់ឈ្មោះរឿន ចាន់រ៉ា មានស្រុកកំណើតនៅខេត្តស្វាយរៀង ហើយសពត្រូវបានដឹកយកទៅស្រុកកំណើតដើម្បីឱ្យសាច់ញាតិធ្វើបុណ្យតាមប្រពៃណី។
លោកខៃ វណ្ណៈ មន្ត្រីផ្នែកព្រហ្មទណ្ឌស្រុកកែវសីមាឱ្យដឹងថា ក្រុមសមត្ថកិច្ចបានរកឃើញរថយន្តដែលបើកបំបុកបណ្តាលឱ្យស្លាប់មន្ត្រីប៉េអឹមនោះហើយ ដោយជនសង្ស័យយករថយន្តនោះទៅប្លុងចោលនៅក្បែរប៉ុស្តិ៍សុខភាពស្រុក។ រថយន្តបង្កហេតុម៉ាកកាមរីគូទស្វិត ស៊េរីឆ្នាំ១៩៩១ ពណ៌ត្រីឆ្លូញ ពាក់ស្លាកលេខគ៩៣១៥ភព២ជារបស់ឈ្មោះធូរ និងបើកបរដោយកូនចៅរបស់ឈ្មោះធូរ។ រថយន្តបង្កហេតុ និងរថយន្តបិទគូទត្រូវសមត្ថកិច្ចបញ្ជូនទៅរក្សាទុកនៅប៉ុស្តិ៍រដ្ឋបាលស្រែក្ទម្ព ឯឈ្មោះធូរត្រូវបានបញ្ជូនខ្លួនទៅស្នងការដ្ឋាននគរបាលខេត្តដើម្បីចាត់ការបន្ត៕
ចែករំលែកព័តមាននេះ