ខេត្តកំពង់ស្ពឺ ៖ ជនសង្ស័យចំនួន០២នាក់ ត្រូវបានកម្លាំងនគរបាលស្រុកសាមគ្គីមុន្នីជ័យ ធ្វើការឃាត់ខ្លួនក្រោយពីធ្វើសកម្មភាពលួចលូយកទៅលក់ឲ្យស្ត្រីម្នាក់ម្ដងបានសម្រេច ។ ហើយញ៉ាមទៅលួចម្ដងទៀត ក៏បានសមត្ថកិច្ចក្រសោបបានទាំងអស់តែម្តង ។
ការឃាត់ខ្លួនក្រុមជនសង្ស័យបានធ្វើឡើង កាលពីយប់ថ្ងៃទី៦ ខែមិថុនា ឆ្នាំ២០២៦ ស្ថិតនៅក្នុងដីឡូត៍មួយកន្លែងក្នុងភូមិយស់ជោ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យ បាននិយាយឱ្យដឹងថា នៅមុនពេលឃាត់ខ្លួនក្រុមជនសង្ស័យខាងលើ គឺកម្លាំងអធិការដ្ឋាននគរបាលស្រុកបានធ្វើការល្បាត តាមមូលដ្ឋាន និងតំបន់ងាយរងគ្រោះដោយអនុវត្តតាមការដឹកនាំបញ្ជាដ៏ខ្ពង់ខ្ពស់ ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ នៅវេលាម៉ោង១១និង៤០នាទីរំលងអធ្រាត្រ ថ្ងៃទី៦ ខែមិថុនា ឆ្នាំ២០២៦ កម្លាំងបានធ្វើការល្បាតដល់ចំណុចដីឡូតិ៍មួយកន្លែងស្ថិតនៅភូមិយស់ជោ ឃុំជើងរាស់ ស្រុកសាមគ្គីមុនីជ័យ បានឃាត់ខ្លួនជនសង្ស័យចំនួន០២នាក់ ពាក់ព័ន្ធករណីលួចលូនៅក្នុងដីឡូតិ៍មួយកន្លែង ។
ជនសង្ស័យដែលឃាត់ខ្លួនបានទី១-/ឈ្មោះ រិទ្ធ រ៉ាវី ភេទប្រុស អាយុ២៨ឆ្នាំ និងទី២-/ឈ្មោះ គីម លីហៃ ភេទប្រុស អាយុ២០ឆ្នាំ អ្នកទាំងពីររស់នៅក្នុងភូមិទឹកឬស្សី ឃុំមានជ័យ ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យបាននិយាយដឹងថា បើតាមចម្លើយសារភាពរបស់ជនសង្ស័យខាងលើពួកខ្លួនពិតជាបានជិះគោយន្តកន្ត្រៃមកលួចដឹកលូចំនួន០២លើក នៅចំណុចកើតហេតុខាងលើ ដោយលួចដឹកលូយកទៅលក់ឱ្យឈ្មោះ ណែម ណាត ភេទស្រី អាយុ៥១ឆ្នាំ រស់នៅក្នុងភូមិទឹកឬស្សី ឃុំមានជ័យ ស្រុកសាមគ្គីមុនីជ័យ លូមួយកង់ក្នុងតម្លៃ១០០០០រៀល(មួយម៉ឺនរៀល) ។ ក្រោយឃាត់ខ្លួនជនសង្ស័យវត្ថុតាងដកហូត៖ គោយន្តចំនួន០១គ្រឿង លូចំនួន០៤កង់ ។
បច្ចុប្បន្នក្រុមជនសង្ស័យទាំងអ្នកលួច និងអ្នកទទួលផលចោរកម្មខាងលើត្រូវឃាត់ខ្លួននៅអធិការដ្ឋាននគរបាលស្រុកសាមគ្គីមុនីជ័យ ដើម្បីកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ