សង្គ្រាមអ៉ីរ៉ង់ ៖ សភាអាមេរិក កាលពីថ្ងៃទី៣ មិថុនា បានអនុម័តជាលើកដំបូងសេចក្ដីសម្រេចចិត្តមួយស្ដីពីអំណាចសង្គ្រាមដែលសំដៅបញ្ចប់សកម្មភាពយោធាអាមេរិកប្រឆាំងអ៉ីរ៉ង់ ។ វិធានការនោះ ជាការផ្គើនចំពោះប្រធានាធិបតីលោកដូណាល់ត្រាំ ពេលដែលសមាជិកសភាគណបក្សសាធារណរដ្ឋមួយចំនួនងាកមកចូលរួមជាមួយ ពួកអ្នកប្រជាធិបតេយ្យដើម្បីបញ្ចប់ជម្លោះ ដែលកើតមានជាង៣ខែមកហើយធ្វើឲ្យស្រអាប់ដល់នយោបាយជាតិនិងអន្តរជាតិ។
ប្រធានសភាលោកMIKE JOHNSON បានប៉ុនប៉ងរារាំងលទ្ធផលមួយដែលឆ្លុះបញ្ចាំងពីការប្រឆាំងកាន់តែខ្លាំងឡើងចំពោះសង្គ្រាម ដោយលោកកាត់ផ្ដាច់ភ្លាមៗការជជែកដេញដោល កាលពី២សប្ដាហ៍មុន ពេលដែលសេចក្ដីសម្រេចនោះហៀបនឹងអនុម័តទៅហើយ។ ប៉ុន្តែការរារាំងនោះបានត្រឹមតែបង្កើនការមិនសប្បាយចិត្តចំពោះសង្គ្រាមដែលរកទីបញ្ចប់មិនឃើញ ហើយលោកត្រាំនៅមិនអាចចរចាបញ្ចប់សង្គ្រាមបានឆាប់។
លោកGREGORY MEEKSសមាជិកសភាគណបក្សប្រជាធិបតេយ្យនៃរដ្ឋញូវយ៉ក ជាសមាជិកគណៈកម្មការកិច្ចការបរទេសរបស់សភា ជាអ្នកផ្ដួចផ្ដើមគំនិតឲ្យមានការអនុម័តសេចក្ដីសម្រេចចិត្តនោះថ្លែងថា ដល់ពេលដែលប្រធានាធិបតីត្រូវធ្វើនូវអ្វិដែលលោកត្រូវធ្វើហើយ។ មនុស្សទាំងឡាយជួបការឈឺចាប់ដោយសារសង្គ្រាមដែលលោកបានជ្រើសរើស។ ពួកគេជួបប្រទះប្រេងឡើងថ្លៃនិងតម្លៃទំនិញកាន់តែឡើងខ្ពស់។
ក្នុងការបោះឆ្នោតអនុម័តសេចក្ដីសម្រេចចិត្តនោះ សមាជិកសភា២១៥រូបបោះគាំទ្រនិង២០៨រូបបោះប្រឆាំង ប៉ុន្តែដំណាក់កាលខាងមុខនៅមិនទាន់ច្បាស់លាស់។ ប្រធានាធិបតីលោកដូណាល់ត្រាំ ប្រហែលជាបដិសេធរាល់វិធានការរបស់សភា ដែលសំដៅកម្រិតអំណាចរបស់លោកជាអគ្គមេបញ្ជាការកងទ័ព។ ទោះបីយ៉ាងណាលទ្ធផលនេះដែលអ្នកសាធារណរដ្ឋ៤រូបចូលរួមបោះឆ្នោតគាំទ្រ រួមជាមួយបណ្ដាអ្នកប្រជាធិបតេយ្យ គឺជាគំនាបលើយុទ្ធសាស្ត្រសង្គ្រាមរបស់ប្រធានាធិបតីហើយផ្ទុះការប្រឆាំងក្នុងសភា។
នេះជាលើកទី៤ហើយដែលសភាអាមេរិកប៉ុនប៉ងរារាំងសង្គ្រាមប្រឆាំងអីុរ៉ង់ ។ ព្រឹទ្ធសភាអាមេរិកបានអនុម័តរួចហើយសេចក្ដីសម្រេចរបស់ខ្លួនស្ដីពីអំណាចសង្គ្រាមនេះ កាលពីខែមុនពេលដែលព្រឹទ្ធសមាជិកគណបក្សសាធារណរដ្ឋមួយចំនូន បានងាកចេញពីប្រធានាធិបតីដែលនោះបង្ហាញពីការតស៊ូនយោបាយក្នុងផ្ទៃគណបក្សលោកផ្ទាល់។
លោកដូណាល់ត្រាំលើកឡើងកាលពីថ្ងៃទី៣មិថុនាពីការចរចាជាមួយអីុរ៉ង់ ដោយលោកអះអាងថា ការចរចានោះអាចសម្រេចជោគជ័យតាំងពីចុងសប្ដាហ៍នេះទៅតែក៏អាចបរាជ័យដែរ ខណៈក្នុងតេហេរ៉ង់អះអាងថាពុំទាន់មានការរីកចម្រើនណាមួយនៅឡើយ៕
ចែករំលែកព័តមាននេះ