សង្គ្រាមអ៉ីរ៉ង់ ៖ តាមរដ្ឋមន្ត្រីការបរទេសអាមេរិកលោកម៉ាកូរូប៊ីយ៉ូថា មេដឹកនាំកំពូលថ្មីអ៉ីរ៉ង់នៅរស់ ហើយកំពុងតែចូលរួមកាន់តែច្រើនក្នុងការដឹកនាំប្រទេស។
ប្រមុខការទូតអាមេរិករូបនោះថ្លែង កាលពីថ្ងៃទី២ មិថុនា ថា សហរដ្ឋអាមេរិកយល់ថា មេដឹកនាំកំពូលអ៉ីរ៉ង់លោកម៉ូសតាបាខាមេនីនៅរស់ និងកំពុងចូលរួមកាន់តែសកម្មក្នុងការដឹកនាំប្រទេស។ លោកបន្តថា មានសញ្ញានានាដែលបង្ហាញថា លោកម៉ូសតាបាខាមេនីចូលរួមកាន់តែសកម្មក្នុងកម្រិតមួយចំនួននៃការដឹកនាំប្រទេស ដោយការទាក់ទងដឹកនាំរបស់លោកធ្វើឡើង ជាលាយល័ក្ខអក្សរ និងតាមរយៈមនុស្សទី៣។ លោករូប៊ូយ៉ូថ្លែងបែបនេះនៅមុខគណៈកម្មការកិច្ចការបរទេសរបស់ព្រឹទ្ធសភា ដោយលោកគូសបញ្ជាក់ពីការលំបាក ក្នុងការបញ្ជូនសារនានា ទៅកាន់រដ្ឋាភិបាលអ៉ីរ៉ង់។
លោកម៉ូសតាបាខាមេនីបានឡើងបន្តវេនពិបិតា លោកអាលីខាមេនីដែលទទួលមរណភាព ក្នុងការវាយប្រហាររបស់អ៉ីស្រាអែល ពេលចាប់ផ្ដើមសង្គ្រាម តែលោកមិនដែលបង្ហាញខ្លួនជាសាធារណៈឡើយតាំងពីក្រោយត្រូវរបួសក្នុងការវាយប្រហារមួយ ដោយលោកថ្លែងតែតាមរយៈសារជាលាយល័ក្ខអក្សរប៉ុណ្ណោះ។
ពេលសួរលោកពីការចរចាដោយប្រយោលរវាងអាមេរិក និងអ៉ីរ៉ង់នៅប៉ាគីស្ថាន ដែលកំពុងជាប់គាំងលោកម៉ា
កូរូប៊ីយ៉ូលើកឡើងថា លោកនៅតែមានសង្ឃឹមជានិច្ចថា នឹងទទួលបានកិច្ចព្រមព្រៀងមួយដើម្បីបញ្ចប់សង្គ្រាមតែមិនផ្ដល់ពីកាលបរិច្ឆេទឡើយដោយលោកគ្រាន់តែថា អាចមាននាថ្ងៃស្អែក ឬខានស្អែកឬសប្ដាហ៍ខាងមុខ។
អ៉ីរ៉ង់បានយល់ព្រមចរចាលើទិដ្ឋភាពមួយចំនួននៃកម្មវិធីនុយក្លេអ៊ែររបស់ខ្លួន ដែលតាំងពីយូរមកហើយតែងបដិសេធ ៕
ចែករំលែកព័តមាននេះ