អន្តរជាតិ ៖ ពូល B នឹងកំណត់ថា តើក្រុមណាមួយក្នុងចំណោមក្រុម កាណាដា (ម្ចាស់ផ្ទះរួម), បូស្នី និង ហឺហ្សេហ្គោវីណា (Bosnia and Herzegovina), កាតា និង ស្វីស នឹងក្លាយជាក្រុមដែលល្អជាងគេប្រចាំពូល ដោយមើលទៅហាក់ដូចជា ពូលមិនសូវប្រទាក់ភ្នែកអ្នកគាំទ្រប៉ុន្មានទេ នៅក្នុងព្រឹត្តិការណ៍ World Cup ឆ្នាំ២០២៦។ ប៉ុន្តែមិនមែនមានន័យថា ជាពូលមិនជក់ចិត្តនោះទេ ដោយសាររាល់ក្រុមទាំងអស់ដែលឈានដល់ជុំនេះ គឺសុទ្ធតែត្រូវប្រកួតអស់ពីចិត្តយ៉ាងស្វិតស្វាញជាទីបំផុត ដើម្បីប្រទេសជាតិរៀងខ្លួន។
កាណាដា គឺជាសហម្ចាស់ផ្ទះនៃព្រឹត្តិការណ៍នេះ បានខកខានការឆ្លងផុតវគ្គចែកពូលទាំងពីរលើកក្នុងប្រវត្តិសាស្ត្រ World Cup របស់ខ្លួន ដោយបានបញ្ចប់នៅបាតតារាងដូចគ្នា។ ទោះជាយ៉ាងណាក៏ដោយ ពួកគេត្រូវបានអ្នកវិភាគរំពឹងថា អាចជាក្រុមលេខ២ក្នុងពូល ជាមួយនឹងគុណសម្បត្តិជាម្ចាស់ផ្ទះ និងវត្តមានកីឡាករឆ្នើមៗជាច្រើននាក់ផង។
-ចំណាត់ថ្នាក់ FIFA ៖ ៣០
-ឱកាសឈ្នះក្នុងពូល ៖ តិចតួច
-កីឡាករលេចធ្លោ ៖ ប្រធានក្រុម Alphonso Davies កីឡាករកំពូលល្បឿនលេង តំណែងការពារ និងបម្រើស្លាបឆ្វេង ព្រមទាំងខ្សែប្រយុទ្ធឆ្នើម Jonathan David
ស្វីស ត្រូវបានចាត់ទុកជាក្រុមខ្លាំង និងមានសង្ឃឹមខ្ពស់ជាងគេឆ្លងផុតវគ្គចែកពូល។ អ្នកវិភាគមួយចំនួនលើកឡើងថា ស្វីសត្រូវបានរំពឹងថានឹងបង្ហាញទម្រង់លេងដ៏ល្អប្រចាំពូលជាមួយកីឡាករល្អៗជាច្រើនដែលច្របាច់បញ្ចូលគ្នារវាងកីឡាករជើងចាស់ពេញដោយបទពិសោធន៍ និងយុវជនឆ្នើមៗ។
-ចំណាត់ថ្នាក់ FIFA ៖ ១៩
-ឱកាសឈ្នះក្នុងពូល ៖ ខ្ពស់
-កីឡាករលេចធ្លោ ៖ ក្នុងនាមជាក្បាលម៉ាស៊ីនដ៏សំខាន់ទាំងផ្នែកយុទ្ធសាស្ត្រ និងស្មារតីរបស់ក្រុម ក៏ដូចជាបង្គោលដ៏រឹងមាំនៅតំបន់បម្រើ និងជាកីឡាករដ៏សំខាន់ នោះជាប្រធានក្រុម Granit Xhaka
កាតា ដែលជាប្រទេសម្ចាស់ផ្ទះការប្រកួត World Cup ឆ្នាំ២០២២ ឡើងដល់ការប្រកួតឆ្នាំនេះ ដោយបានបញ្ចប់ក្នុងចំណាត់ថ្នាក់កំពូលនៃពូល A ការប្រកួតជម្រុះជុំទី៤នៅអាស៊ី ដូច្នេះបង្ហាញថា ពួកគេពិតជាមានសមត្ថភាពគ្រប់គ្រាន់សម្រាប់ព្រឹត្តិការណ៍ឆ្នាំនេះ។
-ចំណាត់ថ្នាក់ FIFA ៖ ៥៥
-ឱកាសឈ្នះក្នុងពូល ៖ តិចតួច
-កីឡាករលេចធ្លោ ៖ ខ្សែបម្រើស្លាបឆ្វេងដ៏ឆ្នើម Akram Afif ក៏ដូចជាខ្សែបម្រើការពារវ័យក្មេង Mohamed al-Mannai
បូស្នី និង ហឺហ្សេហ្គោវីណា ធ្លាប់ឡើងដល់ជុំផ្តាច់ព្រ័ត្រ World Cup តែម្តងគត់ កាលពីឆ្នាំ ២០១៤ ដោយមិនអាចឆ្លងផុតវគ្គចែកពូល។ ប៉ុន្តែមកលើកនេះ បូស្នី ធ្វើឱ្យគ្រប់គ្នាភ្ញាក់ផ្អើលយ៉ាងខ្លាំង ដោយបានទម្លាក់វែលស៍ក្នុងវគ្គពាក់កណ្តាលផ្តាច់ព្រ័ត្រ និងផ្តួលម្ចាស់ជើងឯក World Cup ៤ សម័យកាល អ៊ីតាលី ដោយការទាត់បាល់ប៉េណាល់កាត់សេចក្តីក្នុងវគ្គផ្តាច់ព្រ័ត្រ ការប្រកួតជម្រុះជុំចុងក្រោយទ្វីបអឺរ៉ុប ដើម្បីបានកៅអីមកកាន់ World Cup ឆ្នាំ២០២៦។
-ចំណាត់ថ្នាក់ FIFA ៖ ៦៥
-ឱកាសឈ្នះក្នុងពូល ៖ ពួកគេបានផ្តួលអ៊ីតាលី ដូច្នេះយ៉ាងហោចណាស់ក៏អាចជាគូប្រជែងដ៏ស្វិតស្វាញប្រចាំពូល
-កីឡាករលេចធ្លោ ៖ ខ្សែប្រយុទ្ធ Edin Džeko នៅតែជាកីឡាករដ៏លេចធ្លោដដែល បើទោះស្ថិតក្នុងវ័យ៤០ឆ្នាំក៏ដោយ
កាលវិភាគប្រកួតទី ១
-ម្ចាស់ផ្ទះកាណាដា ប៉ះ បូស្នី ម៉ោង ២ ឈានព្រឹកចូលថ្ងៃទី១៣ ខែមិថុនា
-កាតា ប៉ះ ស្វីស ម៉ោង ២ ឈានចូលព្រឹកថ្ងៃទី១៤ ខែមិថុនា
កាលវិភាគប្រកួតទី ២
-ស្វីស ប៉ះ បូស្នី ម៉ោង ២ ឈានចូលព្រឹកថ្ងៃទី១៩ ខែមិថុនា
-ម្ចាស់ផ្ទះកាណាដា ប៉ះ កាតា ម៉ោង ៥ ព្រឹកព្រលឹមថ្ងៃទី១៩ ខែមិថុនាកាលវិភាគប្រកួតទី ៣
-ស្វីស ប៉ះ ម្ចាស់ផ្ទះកាណាដា ម៉ោង ២ ឈានចូលព្រឹកថ្ងៃទី២៥ ខែមិថុនា
-បូស្នី ប៉ះ កាតា ម៉ោង ២ ឈានចូលព្រឹកថ្ងៃទី២៥ ខែមិថុនា៕ ប្រភព ៖ Yahoo Sports និងប្រភពផ្សេងទៀត
ចែករំលែកព័តមាននេះ