ទីក្រុងប៉ារីស ៖ មនុស្សជាង ៤០០ នាក់ត្រូវបានប៉ូលិសចាប់ខ្លួន នៅទូទាំងប្រទេសបារាំង បន្ទាប់ពីការអបអរសាទរប្រែក្លាយជាភាពចលាចល ក្រោយជ័យជម្នះក្រុម PSG លើក្រុម Arsenal វគ្គផ្តាច់ព្រ័ត្រពានរង្វាន់ UEFA Champions League កាលយប់ពីថ្ងៃទី៣០ ខែឧសភា ឆ្នាំ២០២៦ កន្លងទៅ។ បើតាមរបាយការណ៍ចុងក្រោយពីក្រសួងមហាផ្ទៃបារាំង មនុស្សចំនួន ៤១៦ នាក់ត្រូវបានចាប់ខ្លួន ដោយក្នុងនោះមាន ២៨០ នាក់ ស្ថិតនៅក្នុងទីក្រុងប៉ារីស។ នេះបើតាមប្រភពពី BBC និង The Sun បានចេញផ្សាយ។
PSG ការពារតំណែងជើងឯកដោយជោគជ័យ និងជាការឈ្នះជើងឯកទ្វីបអឺរ៉ុបជាលើកទី២ និងជាប់គ្នារបស់ខ្លួន បន្ទាប់ពីយកឈ្នះ Arsenal តាមរយៈការទាត់បាល់ប៉េណាល់កាត់សេចក្តីលទ្ធផល ៤-៣ បន្ទាប់ពីបញ្ចប់ ១២០ នាទីស្មើគ្នា ១-១ នៅឯកីឡដ្ឋាន Puskás Aréna ទីក្រុងប៊ុយដាប៉ែស (Budapest) ប្រទេសហុងគ្រី។
ហ្វូងមនុស្សយ៉ាងច្រើនកុះករបានសម្រុកចេញទៅកាន់ដងផ្លូវជាច្រើន ជាពិសេសមហាវិថី Champs-Élysées។ ក្រុមអ្នកគាំទ្រខ្លះបានដុតកាំជ្រួច និងដុតកង់អគ្គិសនីចតជាជួរសម្រាប់ទុកជួល ក៏ដូចជាបានវាយកម្ទេចកញ្ចក់ហាងទំនិញមួយចំនួនផងដែរ។ កងកម្លាំងប៉ូលិសប្រឆាំងកុបកម្មបានប្រើប្រាស់ឧស្ម័នបង្ហូរទឹកភ្នែកដើម្បីបំបែកហ្វូងមនុស្សដែលបង្កភាពវឹកវរ ដោយក្នុងនោះមន្ត្រី៧នាក់បានរងរបួស។ បើតាមរបាយការណ៍បឋមអំពីការខូខាតរួមមាន រថយន្ត ៦ គ្រឿង ទីតាំងអាជីវកម្ម ២ កន្លែង និងទីតាំងចំណតរង់ចាំឡានក្រុង១កន្លែងត្រូវបានបំផ្លិចបំផ្លាញ។
រដ្ឋមន្ត្រីក្រសួងមហាផ្ទៃបារាំង លោក Laurent Nuñez បានថ្កោលទោសចំពោះទង្វើនេះថាជាទង្វើមិនអាចទទួលយកបានទាល់តែសោះ។ ចំណែកមេដឹកនាំស្តាំនិយម លោកស្រី Marine Le Pen បានសរសេរលើបណ្តាញសង្គម X ដូច្នេះថា «មើលទភមានតែនៅក្នុងប្រទេសបារាំងទេ ដែលជ័យជម្នះរបស់ក្លិបបាល់ទាត់មួយ បង្កឱ្យមានកុបកម្ម»៕
ចែករំលែកព័តមាននេះ