អន្តរជាតិ ៖ សហព័ន្ធបាល់ទាត់ពិភពលោក (FIFA) នឹងត្រូវចំណាយប្រាក់ច្រើនជាង ៩ពាន់អឺរ៉ូ ឬប្រមាណ ១ ១០០០ដុល្លារអាមេរិកក្នុង១ថ្ងៃសម្រាប់កីឡាករម្នាក់ ដើម្បីផ្តល់ជូនក្លិបដែលកីឡាករពួកគេទៅចូលរួមប្រកួតព្រឹត្តិការណ៍ World Cup ឆ្នាំ ២០២៦។ នេះបើ តាមការចេញផ្សាយពីលោក Fabrizio Romano អ្នកកាសែតបាល់ទាត់ជនជាតិអ៊ីតាលីដ៏ល្បីល្បាញ និងប្រភពពីកាសែតអេស្ប៉ាញ AS ក៏ដូចជាប្រភពផ្សេងទៀត។
FIFA World Cup 2026 ដែលចាប់ផ្តើមនៅថ្ងៃទី១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦ ដែលសហរដ្ឋអាមេរិក កាណាដា ម៉ិកស៊ិកធ្វើជាម្ចាស់ផ្ទះរួមគ្នានោះ នឹងក្លាយជាការប្រកួតលើកដំបូងបំផុតដែលមាន ៤៨ ប្រទេសចូលរួម ដូច្នេះកីឡាករដែលចូលរួមក៏កាន់តែច្រើនជាងពេលណាៗទាំងអស់ផងដែរ។
ទន្ទឹមនឹងនោះ FIFA នឹងបំបែកកំណត់ត្រាចាស់របស់ខ្លួន តាមរយៈការរកប្រាក់ចំណូលបានច្រើនបំផុតពីព្រឹត្តិការណ៍មួយនេះ បើទោះបីជាស្ថាប័នក្បាលម៉ាស៊ីនបាល់ទាត់ពិភពលោកនឹងត្រូវចំណាយប្រាក់បង់ជូនបណ្តាក្លិបមានកីឡាករចូលរួមប្រកួតច្រើនជាងមុនយ៉ាងណាក៏ដោយ។
ក្លិបដែលមានកីឡាករប្រកួត World Cup ឆ្នាំនេះ នឹងបានសំណងហិរញ្ញវត្ថុតាមរយៈកម្មវិធីមូលនិធិអត្ថប្រយោជន៍ក្លិបរបស់ FIFA ចំនួនសរុប ៣៥៥លានដុល្លារអាមេរិក ដែលជាចំនួនច្រើនបំផុត។ មូលនិធិនេះ ត្រូវបានបង្កើតឡើងតាំងពីឆ្នាំ ២០១០ ជាចំណែកប្រាក់ចំណេញរកបានពីការប្រកួត និងការឧបត្ថម្ភនានា ហើយត្រូវបម្រុងទុកពិសេស សម្រាប់ចែកចាយដល់ក្លិបទាំងឡាយណាដែលបានចុះឈ្មោះចូលរួមកម្មវិធីនេះ។
ការផ្តល់ជូននេះ ដើម្បីជួយគាំទ្រផ្នែកហិរញ្ញវត្ថុ និងលើកទឹកចិត្តដល់ក្លិបដែលចាយពេល និងធនធានក្នុងការអភិវឌ្ឍកីឡាករ ក៏ដូចជាផ្តល់សំណងលើហានិភ័យផ្សេងៗ ដូចជាការពារនៅពេលកីឡាកររងរបួសក្នុងកាតព្វកិច្ចជម្រើសជាតិជាដើម។
ក្លិបនីមួយៗនឹងទទួលបានការផ្តល់ជូនជាប្រចាំថ្ងៃនេះ គិតចាប់តាំងពីថ្ងៃកីឡាករពួកគេចាកចេញទៅចូលរួមជាមួយក្រុមជម្រើសជាតិផ្លូវការ រហូតដល់១ថ្ងៃបន្ទាប់ពីការប្រកួតវគ្គផ្តាច់ព្រ័ត្ររបស់ក្រុមជម្រើសជាតិនោះក្នុងព្រឹត្តិការណ៍ World Cup ឆ្នាំ២០២៦។ ជាមួយគ្នានោះ គ្រប់ក្លិបមានកីឡាករប្រកួត World Cup នៅឆ្នាំនេះ ត្រូវបានធានាថានឹងទទួលបានប្រាក់ប្រហែល ២៥ម៉ឺនដុល្លារក្នុងកីឡាករម្នាក់ បើទោះបីជាប្រទេសរបស់ពួកគេធ្លាក់ចេញតាំងពីវគ្គចែកពូលយ៉ាងណាក៏ដោយ៕
ចែករំលែកព័តមាននេះ