សមត្ថកិច្ចបង្ក្រាបបទល្មើសឆក់ត្រី និងដកហូតឧបករណ៍នេសាទខុសច្បាប់ជាបន្តបន្ទាប់ ក្នុងរដូវបិទនេសាទត្រីពងកូន
- ស្ទឹងត្រែង
ខេត្តស្ទឹងត្រែង ៖ ក្នុងយុទ្ធនាការរឹតបន្តឹងការអនុវត្តច្បាប់ក្នុងរដូវបិទនេសាទ និងការពាររដូវត្រីពងកូន ខណ្ឌរដ្ឋបាលជលផលស្ទឹងត្រែង បានសហការជាមួយគណៈកម្មការសហគមន៍នេសាទអូរម្រះ និងអាជ្ញាធរពាក់ព័ន្ធ ចុះល្បាតយ៉ាងសស្រាក់សស្រាំពេញ២៤ម៉ោង លើ ២៤ម៉ោង ដោយបានបង្ក្រាប និងដកហូតវត្ថុតាងបទល្មើសជលផលជាបន្តបន្ទាប់ កាលពីយប់ថ្ងៃទី០២ ខែមិថុនា ឆ្នាំ២០២៦ ត្រង់ចំណុចព្រំប្រទល់ខេត្តស្ទឹងត្រែង និងក្រចេះ។
ក្នុងប្រតិបត្តិការនោះ ក្រុមការងារបានបង្ក្រាបករណីនេសាទដោយប្រើឧបករណ៍ឆក់ចំនួន ០១ករណី។ នៅពេលឃើញកម្លាំងសមត្ថកិច្ច ជនសង្ស័យបានបើកទូកបុកច្រាំង រួចរត់គេចខ្លួនឡើងគោកបាត់ស្រមោល ដោយបន្សល់ទុកនូវវត្ថុតាងរួមមាន៖ ទូកភ្ជាប់ម៉ាស៊ីនចំនួន ០១ គ្រឿងក្បាលឆក់ (អាំងវែរទ័រ) ចំនួន០១គ្រឿង អាគុយចំនួន០២គ្រឿង ថ្នងដងត្រី ចំនួន០១គ្រឿង ។
បច្ចុប្បន្ន ក្រុមការងារជំនាញកំពុងបន្តស្រាវជ្រាវស្វែងរកអត្តសញ្ញាណជនសង្ស័យ ដើម្បីកសាងសំណុំរឿងចាត់ការតាមនីតិវិធីច្បាប់យ៉ាងម៉ឺងម៉ាត់ ។ ដោយឡែក ក្រុមការងារទី២ ក៏បានចុះល្បាតក្នុងតំបន់គ្រប់គ្រង និងការពារសត្វផ្សោត «តំបន់ត្បូងខ្លា» ស្រុកសៀមបូក ដោយបានរកឃើញ និងដកហូតសន្ទូចរនងខុសច្បាប់ចំនួន០១ខ្សែ ប្រវែង១៥០ម៉ែត្រ (ស្មើនឹង៦៥ផ្លែ) ផងដែរ។
ជាមួយគ្នានេះ អាជ្ញាធរមានសមត្ថកិច្ចនិងអង្គភាពស្ថាប័នពាក់ព័ន្ធ ជាពិសេសខណ្ឌរដ្ឋបាលជលផលតែងអប់រំណែនាំដល់ប្រជាពលរដ្ឋជាញឹកញាប់មិនថា ក្នុងរដូវបិទនេសាទ ឬបើកនេសាទអំពីផលប៉ះពាល់ទាំងឡាយណា ដែលបង្កមហន្តរាយដល់ធនធានជលផល ជាពិសេសទៅទៀតនោះ គឺការប្រើប្រាស់ឧបករណ៍ឆក់ដែលជាកក្តានាំអោយអន្តរាយដល់ត្រី។
ការប្រើប្រាស់ឧបករណ៍នេះ ទោះបីត្រីនៅគម្លៀតពីចរន្តអគ្គិសនីដែលមិនអាចធ្វើអោយងាប់ក្តី តែវាបានរងផលប៉ះពាល់ដល់ការបន្តពូជ ដោយសារចរន្តអគ្គិសនីធ្វើស្វិតពងលែងញាស់ ឬលែងបន្តពូជបានរៀងរហូត ។ និយាយជារួមការប្រើប្រាស់ឧបករណ៍ឆក់ គឺជាទង្វើបំផ្លិចបំផ្លាញធនធានធម្មជាតិយ៉ាងធ្ងន់ធ្ងរ ដែលមិនត្រឹមតែសម្លាប់ត្រីមេពូជ និងកូនត្រីតូចៗនៅក្នុងតំបន់នោះទេ ប៉ុន្តែវាក៏បានបំផ្លាញដល់ប្រព័ន្ធអេកូឡូស៊ីជម្រក បង្កហានិភ័យដល់សត្វផ្សោតទន្លេមេគង្គ និងអាចបង្កគ្រោះថ្នាក់ដល់អាយុជីវិតមនុស្សថែមទៀតផង។
យោងតាមច្បាប់ស្តីពីជលផលនៃព្រះរាជាណាចក្រកម្ពុជាការប្រើប្រាស់ចរន្តអគ្គិសនី ឬឧបករណ៍ឆក់គ្រប់ប្រភេទក្នុងសកម្មភាពនេសាទ ត្រូវចាត់ទុកជា «បទល្មើសជលផលថ្នាក់ទី១»។ យោងតាមមាត្រា៩៨នៃច្បាប់នេះ ជនប្រព្រឹត្តត្រូវប្រឈមមុខនឹងការផ្តន្ទាទោសដាក់ពន្ធនាគារពី ០៣ (បី)ឆ្នាំ ដល់០៥ (ប្រាំ) ឆ្នាំ ហើយវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល ។
គួរបញ្ជាក់ផងដែរថា សម្រាប់ភូមិសាស្ត្រខេត្តស្ទឹង៊ត្រែង រដូវបិទនេសាទ ឬរដូវត្រីពងកូន បានចាប់ផ្តើមអនុវត្តជាផ្លូវការចាប់ពីថ្ងៃទី០១ ខែឧសភា រហូតដល់ខែបើកនេសាទឡើងវិញនៅថ្ងៃទី៣០ ខែកញ្ញា ។ នេះគឺជាដំណាក់កាលដ៏មានសារៈសំខាន់បំផុតសម្រាប់អនុញ្ញាតឱ្យត្រីមេពូជអាចពងកូន និងបន្តពូជបង្កើនផលស្តុកត្រីឡើងវិញ។
ខណ្ឌរដ្ឋបាលជលផល និងអាជ្ញាធរខេត្តស្ទឹងត្រែង នៅតែបន្តអំពាវនាវយ៉ាងទទូចដល់បងប្អូនប្រជានេសាទទាំងអស់ ៖ ១-បញ្ឈប់ជាបន្ទាន់ រាល់ការប្រើប្រាស់ឧបករណ៍ខុសច្បាប់ ជាពិសេសឧបករណ៍ឆក់ និងមងក្រឡាធំៗក្នុងតំបន់អភិរក្ស ។ ២-ចូលរួមគោរពច្បាប់ ជលផលដោយស្មារតីទទួលខុសត្រូវខ្ពស់ ដើម្បីរក្សាប្រភពស្បៀងអាហារ និងធនធានជលផលសម្រាប់កូនចៅជំនាន់ក្រោយ ។ ៣-រាយការណ៍ជាបន្ទាន់ ជូនសមត្ថកិច្ចក្នុងករណីជួបប្រទះសកម្មភាពលួចលាក់នេសាទខុសច្បាប់ ។
ពាក់ព័ន្ធ នឹងជំនាញរដ្ឋបាលជលផលសមត្ថកិច្ចជំនាញនៃខេត្តស្ទឹងត្រែង និងក្រចេះ នឹងបន្តកិច្ចសហការគ្នាយ៉ាងស្អិតរមួត ដើម្បីចុះល្បាត និងចាត់វិធានការច្បាប់ ២៤ ម៉ោងលើ ២៤ ម៉ោង ដោយគ្មានការលើកលែងឡើយ ចំពោះបុគ្គលណាដែលហ៊ានបំពានច្បាប់ បំផ្លាញអនាគតមច្ឆជាតិខ្មែរ ៕
ចែករំលែកព័តមាននេះ