ទីក្រុងវ៉ាស៊ីនតោន៖ ថ្មីៗនេះ អាជ្ញាធរអាមេរិករកឃើញរូងក្រោមដី១កន្លែងថ្មីទៀតដែលក្រុមទុច្ចរិតប្រើប្រាស់សម្រាប់រត់ពន្ធគ្រឿងញៀន។ ផ្លូវក្រោមដីនេះលាតសន្ធឹងចាប់ពីទីក្រុងទីជូអាណា (Tijuana) នៃប្រទេសម៉ិកស៊ីកូ ដល់ច្រកចេញចូលកំពង់ផែអូតៃ មេសា (Otay Mesa) គិតទៅមានបណ្ដោយប្រវែង៥៩០ម៉ែត្រ, ជម្រៅ១៦,៨ម៉ែត្រទៅក្រោមដី និងកម្ពស់១,៤ម៉ែត្រ។ សមត្ថកិច្ចខាងស៊ើបអង្កេតរបស់អាមេរិកថ្លែងថារូងក្រោមដីនេះមានរៀបជញ្ជាំងទប់ដីយ៉ាងរឹងមាំ មានផ្លូវដែក មានប្រព័ន្ធខ្យល់អុកស៊ីហ្សែនគ្រប់គ្រាន់ មានបណ្ដាញអគ្គិសនី ហើយអាចចេញចូលដោយប្រើប្រាស់ជណ្ដើរយន្ត។
វីឌីអូដែលផ្សព្វផ្សាយដោយក្រសួងយុត្តិធម៌អាមេរិកបង្ហាញជណ្ដើរចាក់បេតុងយ៉ាងមាំទាំដែលនាំឆ្ពោះទៅរកច្រកក្រោមដីនោះ។ ច្រកនោះមានផ្ទាំងសិលា និងជញ្ជាំងបេតុងសម្រាប់ទប់ដីមិនឱ្យបាក់។ ក្រុមអ្នកស៊ើបអង្កេតរបស់ក្រសួងសន្តិសុខមាតុភូមិអាមេរិកបានចំណាយពេលជាច្រើនខែមកហើយដើម្បីតាមដានដំណើរចេញចូលរបស់មនុស្សនៅម្ដុំហាងលក់ទំនិញ១កន្លែងក្បែរព្រំដែនអាមេរិក-ម៉ិកស៊ីកូ។ នៅពេលពួកគេវាយឆ្មក់ចូលទៅក្នុងរូងនោះ គេរកឃើញគ្រឿងញៀនកូកាអ៊ីនទម្ងន់ជាងមួយតោន។
គេជឿជាក់ថាគ្រឿងញៀនទាំងនោះត្រូវបានដឹកជញ្ជូនឆ្លងកាត់រូងក្រោមដីនោះ រួចហើយលើកដាក់ទៅលើឡានទ្រុងធំៗ។ សមត្ថកិច្ចថ្លែងថាក្រុមឧក្រិដ្ឋជននៅតែរិះរកវិធីប្រើប្រាស់ព្រំដែនដើម្បីបម្រើឱ្យមហិច្ឆតាទុច្ចរិតរបស់ពួកគេ។ ប៉ុន្តែពួកគេមើលស្រាលការប្ដេជ្ញាចិត្តរបស់បុរស-ស្ត្រីដែលការពារព្រំដែននេះពេកហើយ។ ការរកឃើញផ្លូវក្រោមដីនេះគឺជាសក្ខីភាពបង្ហាញអំពីការចាប់ដៃគូសហការ និងការប្ដេជ្ញាចិត្តដោយឥតងាករេនៃភ្នាក់ងារអនុវត្តច្បាប់របស់ប្រទេសទាំងពីរ។
មនុស្សបួននាក់ (ក្នុងនោះ២នាក់មកពីទីក្រុងសាន់ឌីអេហ្គោ (San Diego) និង២នាក់ទៀតមកពីប្រទេសម៉ិកស៊ីកូ) ត្រូវបានចោទប្រកាន់តាមផ្លូវតុលាការរួចហើយពីបទជាប់ពាក់ព័ន្ធនៅក្នុងការនាំគ្រឿងញៀនចូលអាមេរិក។ ក្រសួងយុត្តិធម៌អាមេរិកឱ្យដឹងថាចាប់តាំងពីឆ្នាំ១៩៩៣មក សមត្ថកិច្ចរកឃើញច្រកផ្លូវក្រោមដីចំនួន៩៩ខ្សែនៅសង្កាត់ខាងត្បូង (South District) រដ្ឋកាលីហ្វ័រញ៉ា។ នៅក្នុងចំណោមនោះ ច្រកផ្លូវក្រោមដីចំនួន២៨ខ្សែត្រូវគេចាត់ទុកថាមានលក្ខណៈទំនើប។ រូងក្រោមដីសម្រាប់ដឹកជញ្ជូនគ្រឿងញៀនដែលសមត្ថកិច្ចរកឃើញលើកចុងក្រោយកាលពីមុននេះគឺនៅឆ្នាំ២០២២៕ ប្រភព៖ France 24
ចែករំលែកព័តមាននេះ