ព្រឹត្តិការណ៍ជិះកង់ពីភ្នំពេញទៅសៀមរាបដើម្បីប្រមូលថវិកាជូនមន្ទីរពេទ្យកុមារអង្គរ
- ភ្នំពេញ
រាជធានីភ្នំពេញ ៖ ព្រឹត្តិការណ៍ជិះកង់ដើម្បីទាំងអស់គ្នា លើកទី៣ ឆ្នាំ២០២៦ ក្រោមប្រធានបទ «ជិះកង់ដើម្បីកុមារកម្ពុជាអបអរទិវាជិះកង់ពិភពលោក និងទិវាកុមារអន្តរជាតិ» ដែលបានចេញដំណើរនៅព្រឹកកាលពីព្រឹកថ្ងៃទី៣០ ខែឧសភា ឆ្នាំ២០២៦ ចម្ងាយ ៣១០គីឡូម៉ែត្រ ពីរាជធានីភ្នំពេញឆ្ពោះទៅមន្ទីរពេទ្យកុមារអង្គរ ខេត្តសៀមរាប ក្រោមជំនួយឧបត្ថម្ភគាំទ្រដោយសម្ព័ន្ធកីឡាទោចក្រយានអន្តរជាតិ (UCI) បានបិទបញ្ចប់ដោយជោគជ័យ និងប្រកបដោយភាពសប្បាយរីករាយ។
លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានគូសបញ្ជាក់ថា អ្នកចុះឈ្មោះចូលរួមជិះកង់មានចំនួន១៨០នាក់ ប៉ុន្តែសម្រាប់អ្នកត្រៀមចូលរួមជិះកង់ដោយមិនបានចុះអាចឡើងដល់ជាង៥០០នាក់ ដោយពួកគាត់ជិះកង់អមដំណើរ និងជូនដំណើរតាមផ្លូវកាត់ទីតាំងខេត្តរបស់គាត់ ។ ចំណែកខេត្តដែលមានអ្នកចូលរួមជិះកង់អមដំណើរច្រើនជាងគេ គឺសៀមរាប ហើយនៅក្នុងថ្ងៃដដែលសរុបកីឡាករចូលរួមមានចំនួនជាង៥០០នាក់។
លោកអគ្គលេខាធិការ សង្កត់ធ្ងន់ថា នេះជាឆ្នាំទី៣ហើយដែលសហព័ន្ធកីឡាទោចក្រយានកម្ពុជាបានរៀបចំព្រឹត្តិការណ៍ជិះកង់បែបនេះ ដើម្បីសប្បុរសធម៌ ដោយជិះកង់ពីភ្នំពេញទៅខេត្តសៀមរាប។
ចំពោះគោលបំណងចម្បងនៃការរៀបចំព្រឹត្តិការណ៍ជិះកង់ដើម្បីទាំងអស់គ្នានេះគឺធ្វើឡើងដើម្បីអបអរសាទរទិវាជិះកង់ពិភពលោក (World Bicycle Day 3 June ) និងទិវាកុមារអន្តរជាតិ (International Children Day 1 June) និងការជិះកង់ដើម្បីសហគមន៍ ជួយរៃអង្គាស និងកៀរគរថវិកា សម្ភារៈជួយដល់មន្ទីរពេទ្យកុមារអង្គរ ខេត្តសៀមរាប ។ ព្រមទាំងបន្តបំផុសការផ្សព្វផ្សាយឱ្យកាន់តែទូលំទូលាយជូនដល់កីឡាករ កីឡាការិនី និងមហាជនឱ្យចូលរួមលេងកីឡាជិះកង់ ដើម្បីសុខភាព មិត្តភាព សាមគ្គីភាពកាន់តែល្អប្រសើរឡើងបន្ថែមទៀត។
តាមរយៈការរៀបចំនេះ សហព័ន្ធចង់ឱ្យក្រុមជិះកង់នៅខេត្តបានចូលរួមសហការគ្នាក្នុងដំណើរជិះកង់កម្សាន្ត ដើម្បីគោលដៅសប្បុរសធម៌ និងការជិះកង់ចម្ងាយឆ្ងាយទៅកាន់ខេត្តសៀមរាប ក៏ដូចជាគោលដៅរួមចំណែកដល់ការផ្សព្វផ្សាយវិស័យកីឡាជិះកង់ និងវិស័យទេសចរណ៍នៅខេត្តសៀមរាបផងដែរ។
សហព័ន្ធកីឡាទោចក្រយានកម្ពុជាចាត់ទុកថា ព្រឹត្តិការណ៍ជិះកង់ដ៏ធំប្រចាំឆ្នាំនេះ គឺដើម្បីរួមចំណែកដល់កិច្ចការសប្បុរសធម៌ ក៏ដូចជាលើកស្ទួយដល់កីឡាទោចក្រយានកម្ពុជាមានសកម្មភាពកាន់តែផុសផុលឡើងបន្ថែមទៀត ៕
ចែករំលែកព័តមាននេះ