អ៉ីស្រាអែល-លីបង់៖ ប្រធានាធិបតីអាមេរិក លោកដូណាល់ត្រាំ ប្រកាសនាថ្ងៃទី១ មិថុនា ថា នឹងមិនមានកងកម្លាំងអ៉ីស្រាអែល លើកទៅកាន់ក្រុងបេរូតឡើយ និងថា កងទាហានអ៉ីស្រាអែលដែលកំពុងលើកទៅកាន់ទីនោះត្រូវបានបកក្រោយវិញរួចហើយ ក្រោយពីលោកពិភាក្សាជាមួយនាយករដ្ឋមន្ត្រីអ៉ីស្រាអែលលោកបេនចាមីននេតាន់យ៉ាហ៊ូ និងក្រុមហេសប៊ុលឡាហ៍ ។
ក្នុងសារមួយតាមបណ្ដាញសង្គម TRUTH SOCIAL លោកត្រាំថ្លែងថា លោកបានទាក់ទងតាមរយៈអាជ្ញាកណ្ដាលជាមួយពួកហេសប៊ុលឡាហ៍ ហើយពួកគេបានព្រមព្រៀងថា រាល់ការបាញ់ផ្លោងលើអ៉ីស្រាអែលនឹងបញ្ឈប់ បើអ៊ីស្រាអែលមិនវាយប្រហារលើពួកគេទេនោះ។ ពួកគេក៏លែងវាយប្រហារអ៉ីស្រាអែលទៀតដែរ ។ លោកត្រាំក៏អះអាងដែរថា លោកបានជួបពិភាក្សាតាមទូរស័ព្ទជាមួយនា យករដ្ឋមន្ត្រីអ៉ីស្រាអែល លោកបេនចាមីននេតាន់យ៉ាហ៊ូដែលសន្យាថា នឹងមិនបញ្ជូនកងទ័ពទៅកាន់ក្រុងបេរូត ខណៈអ៉ីស្រាអែលគំរាមវាយប្រហារលើតំបន់ជាយក្រុងភាគខាងត្បូងនៃក្រុងនោះ ដែលជាទីតាំងធំរបស់ហេសប៊ុលឡាហ៍ និងជាគោលដៅវាយប្រហាររបស់អ៉ីស្រាអែលចាប់តាំងពីច្រើនខែមកហើយ ។
នាយករដ្ឋមន្ត្រីអ៉ីស្រាអែលប្រកាសនាថ្ងៃទី៣១ ឧសភា ថា ចង់បង្កើនការវាយលុកប្រឆាំងពួកហេសប៊ុលឡាហ៍នៅលីបង់ដោយលោកចាត់ទុក ការវាយដណ្ដើមយកទីតាំងមានវិមាន BEAUFORT លីបង់របស់កងទ័ពលោកថា ជារបត់ដ៏សំខាន់។ បែបនេះ នាំឲ្យបារាំងស្នើកោះប្រជុំជាបន្ទាន់ក្រុមប្រឹក្សាសន្តិសុខអ.ស.ប នាថ្ងៃទី១ មិថុនា ។ ពេលដែលកងទ័ពអ៉ីស្រាអែលធ្វើការវាយលុកកាន់តែខ្លាំងក្លាលើលីបង់ ប្រធានាធិបតីបារាំងលោកអេមម៉ានុយអែលម៉ាក្រុងអះអាងតាមបណ្ដាញសង្គមXថា គ្មានការលើកហេតុផលណាមួយ ចំពោះការបង្កើនសង្គ្រាមកាន់តែខ្លាំងរបស់អ៉ីស្រាអែលឡើយ។
រដ្ឋមន្ត្រីការបរទេសបារាំងលោកហ្សង់ម៉ានុយអែលបារ៉ូតបានស្នើឲ្យកោះប្រជុំបន្ទាន់ក្រុមប្រឹក្សាសន្តិសុខអ.ស.ប នាថ្ងៃទី១ មិថុនា នោះ។ ការវាយដណ្ដើមយកទីក្រុងដែលមានវិមាន BEAUFORT កសាងឡើងតាំងពីសតវត្សទី១២មកពីសំណាក់អ៉ីស្រាអែល ព្រោះនោះជាទីតាំងយុទ្ធសាស្ត្រមួយស្ថិតនៅទីខ្ពស់នាភាគខាងត្បូងលីបង់ អាចបើកផ្លូវឲ្យកងទ័ពអ៉ីស្រាអែលវាយរុលទៅមុខឆ្ពោះមកកាន់់តំបន់ណាប៉ាបាទីយេ និងបន្តលើកទៅកាន់ក្រុងបេរូត ៕
ចែករំលែកព័តមាននេះ