ដឹងកំហុស! អ្នកបើកឡានម្នាក់សុំទោសជាសាធារណៈរឿងបើកភ្លើងសារ៉ែន និងអ្នកថតបង្ហោះសារភាពថាបញ្ចូលសំឡេងថែម
- ភ្នំពេញ
រាជធានីភ្នំពេញ ៖ បុរសជាអ្នកបើកបររថយន្តដឹកជញ្ជូនក្រុមហ៊ុន វិរៈប៊ុនថាំ ម្នាក់ ត្រូវបានការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ កោះហៅមកចាត់វិធានការភ្លាមៗ នៅថ្ងៃទី៣១ ខែឧសភា ឆ្នាំ២០២នេះ ក្រោយពីមានការបង្ហោះវីដេអូរថយន្តនេះ បើកភ្លើងសារ៉ែនពេញដងផ្លូវ ។
ថ្មីៗនេះបន្ទាប់ពីមានការបង្ហោះផ្សព្វផ្សាយតាមបណ្តាញសង្គម រូបភាពវីដេអូករណីរថយន្តដឹកជញ្ជូនក្រុមហ៊ុនវិរៈប៊ុនថាំ បំពាក់ភ្លើងសារ៉ែននៅលើរថយន្តនាំឲ្យរងការរិះគន់ពីអ្នកលេងបណ្តាញសង្គមនោះហើយ នៅថ្ងៃទី៣១ ខែឧសភា ឆ្នាំ២០២៦ ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានធ្វើការកោះហៅបុរសម្នាក់ ជាអ្នកបើកបររថយន្តនោះមកកាន់ការិយាល័យនគរបាលចរាចរណ៍ផ្លូវគោក ដើម្បីសួរនាំ ។ នេះបើយោងតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានប្រកាសនារសៀលថ្ងៃទី៣១ ខែឧសភានេះ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបន្តថា នៅចំពោះមុខសមត្ថកិច្ច អ្នកបើកបររថយន្តបានឱ្យដឹងថា នៅថ្ងៃទី២៩ ខែឧសភា ឆ្នាំ២០២៦ វេលាម៉ោងប្រមាណ៧ ពេលយប់ ខ្លួនបានធ្វើដំណើរចេញពីជ្រោយចង្វារ ក្នុងគោលបំណងទៅម្តុំព្រៃទា ដោយបានបើករថយន្តតាមផ្លូវទំនប់៧០ ខណៈនោះគាត់បានបើកភ្លើងសារ៉ែនពិតប្រាកដមែន អំឡុងពេលបើកបរ ប៉ុន្តែគាត់សូមបដិសេធមិនបានបើកសារ៉ែនសំឡេងនោះទេ គឺអ្នកដែលថតវីដេអូនោះដាក់សំឡេងសារ៉ែនបន្ថែម ហើយក៏បានបង្ហោះក្នុងបណ្តាញសង្គមតែម្តង ។
បន្ទាប់ពីសួរនាំរួច បុរសខាងលើបានសារភាពកំហុសឆ្គងរបស់ខ្លួន និងបានសុំទោសជាសាធារណៈចំពោះការបំពាក់ភ្លើងសារ៉ែនខុសច្បាប់ ។
ទន្ទឹមនោះសមត្ថកិច្ចក៏បានធ្វើការអប់រំណែនាំ និងធ្វើកិច្ចសន្យាព្រមានលើកទី១ ដោយតម្រូវឱ្យដោះភ្លើងសារ៉ែនចេញ និងមិនឱ្យកើតមានឡើងជាលើកទីពីរទៀតនោះឡើយ ក្រោយដោះភ្លើងសារ៉ែននោះចេញហើយ ទើបសមត្ថកិច្ចអនុញ្ញាតឱ្យត្រឡប់ទៅផ្ទះវិញ ។
ដោយឡែកចំពោះបុរសម្នាក់ដែលបានថតបង្ហោះផ្សព្វផ្សាយរថយន្តខាងលើ ក៏ចេញមកបង្ហោះសារភាពថាខ្លួនបានដាក់ច្នៃបន្ថែមសំឡេងសារ៉ែនពិតប្រាកដ ដោយរថយន្តនោះមិនបានបើកសំឡេងសារ៉ែននោះទេ ការចេញបកស្រាយនេះ គឺកុំឲ្យមហាជនមានយល់ច្រឡំ ៕
ចែករំលែកព័តមាននេះ