មេណាធ្វើ មេណាទទួល ! មន្ត្រីពាក់ព័ន្ធករណីខេត្តកំពត ត្រូវតែប្រឈមមុខច្បាប់ដាច់ខាត មិនថានរណាឡើយ
- កំពត
ខេត្តកំពត ៖ ស្នងការដ្ឋាននគរបាលខេត្តកំពតបានប្រកាសនាព្រឹកថ្ងៃទី៣១ ខែឧសភានេះថា ៖ មេណាធ្វើ មេណាអ្នកពាក់ពន្ធ័ ត្រូវតែប្រឈមមុខចំពោះផ្លូវច្បាប់ទាំងអស់ រួមទាំងរូបខ្ញុំផងដែរ ប្រសិនបើខ្ញុំមានការពាក់ពន្ធ័ក្នុងករណីខាងលើនេះ ។
ស្នងការដ្ឋាននគរបាលខេត្តកំពត បានបន្តថា ចំពោះអត្តសញ្ញាណរបស់មន្ត្រីដែលពាក់ព័ន្ធ គឺអង្គភាពសាមីជាអ្នកផ្សព្វផ្សាយ ហើយសារព័ត៌មានផ្សេងៗទៀតអាចដកស្រង់យករូបភាពបន្តពីស្នងការដ្ឋាននគរបាលខេត្តកំពតទៅផ្សព្វផ្សាយបន្ត នៅពេលចៅក្រមសើបសួរបញ្ចប់នីតិវិធី និងចេញដីការឃុំខ្លួនអ្នកទាំង៣២ នាក់នោះខ្ញុំនឹងបង្ហោះរូបអ្នកទាំងអស់នោះអោយសាធារណៈជនទាំងអស់បានឃើញក្នុងពេលឆាប់ៗនេះ ។
សូមរំលឹកថា ៖ កាលពីរសៀលថ្ងៃទី៣០ ខែឧសភានេះលោកស្នងការដ្ឋាននគរបាលខេត្តកំពត បានបង្ហោះសារថា ៖ ច្បាប់មិនបានបែងចែកថាជាកងកំលាំង ឬជាប្រជាពលរដ្ឋ ត្រូវអនុវត្តច្បាប់ខុសៗពីគ្នានោះទេ ច្បាប់ត្រូវអនុវត្តដោយតម្លាភាព និងស្មើរភាពគ្នា ចំពោះសមត្ថកិច្ចដែលបានធ្វើខុស ។ ចំពោះការពាក់ព័ន្ធចូលយកសម្ភារៈក្នុងទីតាំងបិតសៀលនៅក្នុងកាស៊ីណូព្រែកចាករបស់សមត្ថកិច្ច ដែលបានប្រចាំការនៅទីនោះកន្លងមកករណីខាងលើនេះ ត្រូវបានផ្ទេរសំណុំរឿងទៅតុលាការរាជធានីភ្នំពេញរួចហើយ មានមតិជាច្រើនបានលើកឡើងថា ហេតុអ្វីមិនបង្ហាញមុខសមត្ថកិច្ចដែលពាក់ពន្ធ័នោះ ។
ស្នងការដ្ឋាននគរបាលខេត្តកំពត បានបន្តទៀតថា ខ្ញុំសូមជម្រាបថា ករណីនេះត្រូវបន្តនីតិវិធីជាបន្តបន្ទាប់ទៀត គ្មានអ្វីដែលត្រូវលាក់បាំង និងការពារចំពោះបុគ្គលដែលល្មើសច្បាប់ និងបានធ្វើអោយប៉ះពាល់យ៉ាងធ្ងន់ធ្ងរដល់កិត្តិយសរបស់កងកំលាំងនគរបាលជាតិនោះទេ ៕
ចែករំលែកព័តមាននេះ