ទីក្រុងតេអេរ៉ង់៖ ថ្ងៃនេះ អ៊ីរ៉ង់ និងអាមេរិកពន្លះគ្នាមួយប្រាវដើម្បីកុំឱ្យបាក់មុខម្ខាងៗ ឬត្រូវគេហៅថាជាខ្លាក្រដាស។ អ៊ីរ៉ង់បាញ់មីស៊ីលតម្រង់ទៅរកមូលដ្ឋានកងទ័ពអាកាសរបស់អាមេរិកដើម្បីជាការសងសឹកករណីដែលអាមេរិកវាយប្រហារនូវអ្វីដែលខ្លួនហៅថាជាការបញ្ចេញដ្រូនជាច្រើនគ្រឿងរបស់អ៊ីរ៉ង់ដើម្បីចេញប្រតិបត្តិការក្បែរច្រកសមុទ្រហ័រម៉ូស។ ម៉្យាងទៀត អ៊ីរ៉ង់ធ្វើដូច្នេះបន្ទាប់លោកដូណាល់ត្រាំច្រានចោលពាក្យចចាមអារ៉ាមដែលថាលោកអាចនឹងចរចាជាមួយអ៊ីរ៉ង់ជាលក្ខណៈឆិនឆៃដើម្បីឱ្យឆាប់មានកិច្ចព្រមព្រៀង។
ការវាយប្រហារលើកនេះថ្វីដ្បិតមានទំហំតូច ប៉ុន្តែបានរំលេចឱ្យឃើញថាដំណើរការចរចាគ្នាមានភាពផុយស្រួយយ៉ាងខ្លាំង។ មន្ត្រីរដ្ឋាភិបាលអាមេរិកប្រាប់ថាយោធាអាមេរិកបានបាញ់ទម្លាក់ដ្រូនរបស់អ៊ីរ៉ង់៤គ្រឿង និងវាយប្រហារទីតាំងមួយនៅទីក្រុងកំពង់ផែបាន់ដា អាបាស់ (Bandar Abbas) ដែលប្រុងបញ្ជូនដ្រូនបន្ថែមទៀតទៅច្រកហ័រម៉ូស។ មន្ត្រីរូបនោះថ្លែងថាវិធានការទាំងនេះធ្វើឡើងដោយមានកំណត់, ជាការការពារខ្លួនសុទ្ធសាធ និងខិតខំថ្នាក់ថ្នមសភាពការណ៍ដើម្បីថែរក្សាបទឈប់បាញ់ឱ្យនៅគង់វង្ស។
បើគេស្ដាប់ពីខាងអ៊ីរ៉ង់វិញម្ដង ឆ្មាំបដិវត្តឥស្លាមប្រកាសថាខ្លួនបានបាញ់មីស៊ីលសំដៅទៅរកមូលដ្ឋានយោធាអាមេរិកព្រោះអាមេរិកវាយប្រហារទីតាំងក្បែរអាកាសយានដ្ឋានបាន់ដា អាបាស់កាលពីព្រឹកមិញ។ នេះបើយោងតាមការផ្សាយរបស់ទីភ្នាក់ងារព័ត៌មានថាស់នីម (Tasnim)។ ឆ្មាំបដិវត្តឥស្លាមមិនបានប្រកាសថាមូលដ្ឋានយោធាអាមេរិកដែលខ្លួនវាយប្រហារនោះមានឈ្មោះអ្វីទេ។ ពួកគេព្រមានជាថ្មីថាបើខ្លួនទទួលរងការវាយប្រហារបែបនេះទៀត ខ្លួននឹងចាត់វិធានការសងសឹកកាន់តែខ្លាំង។
ប្រទេសគុយវែតដែលជាកន្លែងតាំងនៅនៃមូលដ្ឋានយោធាដ៏ធំមួយរបស់អាមេរិកថ្លែងថាខ្លួនបានចាត់ការទប់ទល់នឹងការវាយប្រហារដោយមីស៊ីល និងដ្រូន។ ប៉ុន្តែគុយវែតមិនបានបញ្ជាក់ឱ្យបានច្បាស់ថាតើការវាយប្រហារនោះមានប្រភពចេញពីប្រទេសណាទេ។ ងាកទៅមើលប្រទេសលីបង់វិញម្ដង អ៊ីស្រាអែលថ្លែងថាខ្លួនចាប់ផ្ដើមវាយប្រហារទីតាំងយោធារបស់ក្រុមហេសបូឡានៅទីក្រុងទីរ៉េហើយ (Tyre)។ ក្រុមហេសបូឡាអះអាងការវាយប្រហាររបស់អ៊ីស្រាអែលនោះបានសម្លាប់យុទ្ធជនរបស់ម្នាក់។ អ៊ីស្រាអែលអះអាងថាយន្តហោះរបស់បច្ចាមិត្តជ្រៀតចូលដែនអាកាសរបស់ខ្លួន ហើយធ្វើឱ្យខ្លួនបញ្ចេញសំឡេងស៊ីរ៉ែនប្រកាសអាសន្ននៅភាគខាងជើង៕ ប្រភព៖ Reuters
ចែករំលែកព័តមាននេះ