ប្រទេសឥណ្ឌា ៖ កូនកំលោះជនជាតិឥណ្ឌាចំនួន៤២នាក់ បានក្លាយជាជនរងគ្រោះនៃពិធីមង្គលការឆបោក (Scams) រួមគ្នាដ៏កក្រើកនៅលើប្រព័ន្ធផ្សព្វផ្សាយពិភពលោក ដែលបានកើតឡើងនៅក្នុងរដ្ឋម៉ាដហ៊ី ប្រាដេស (Madhya Pradesh) ដែលជារដ្ឋមានផ្ទៃដីធំលំដាប់ទី២របស់ប្រទេសឥណ្ឌា។ នេះបើយោងតាមប្រភពពី Indian Express, India Times, NDTV និងប្រភពផ្សេងទៀតបានចេញផ្សាយ។
កូនកំលោះសរុប៤២នាក់ មកស្រុកផ្សេងគ្នានៃរដ្ឋម៉ាដហ៊ី ប្រាដេស ត្រូវបានរាយការណ៍ថា បានបង្ហាញខ្លួន សម្រាប់ថ្ងៃមង្គលការរបស់ពួកគេជាមួយគ្រួសារ និងសាច់ញាតិ ដោយអ្នកខ្លះបានស្លៀកពាក់ឈុតកូនកំលោះ Sherwani ពណ៌ស្រស់ឆើតឆាយ ពាក់កម្រងផ្កា ស្បែកជើងកូនកំលោះ និងយួរប្រអប់ដែកដាក់នំផ្អែមថែមទៀត ជាមួយទឹកមុខរីករាយ។ ប៉ុន្តែអ្វីៗមិនដូចការរំពឹង ដោយកូនក្រមុំមិនបានលេចវត្តមានក្នុងថ្ងៃដ៏ពិសេសនោះ សូម្បីតែម្នាក់ ហើយបន្ទាប់ពីឈរចាំអស់រាប់ម៉ោង ទើបកូនកំលោះទាំងនោះដឹងខ្លួនថា ចាញ់បោកមេអណ្តើក ធ្លាក់ចូលក្នុងល្បិចពិធីមង្គលការ Scams។
តាមរបាយការណ៍ស៊ើបអង្កេតរបស់ប៉ូលិសរដ្ឋម៉ាដហ៊ី ប្រាដេស បានអះអាងថា ល្បិចឆបោកនេះ ត្រូវបានរៀបចំឡើងជាប្រព័ន្ធតែម្តង ដោយជនឆបោកបានលួចទាញយករូបភាពនារីស្អាតៗជាច្រើនចេញពីគណនីបណ្តាញសង្គមផ្សេងៗ ដូចជា Instagram ជាដើម រួចហើយផ្ញើទៅឱ្យគ្រួសារខាងបុរសទាំងនោះមើល ដោយភូតថា កូនក្រមុំមកពីមណ្ឌលកុមារកំព្រាក្នុងទីក្រុងអ៊ីនឌ័រ (Indore) ដែលកំពុងតែស្វែងរកគូស្រករ។
ក្រុមឆបោកបានតម្រូវឱ្យគ្រួសារខាងប្រុសម្នាក់បង់ប្រាក់ថ្លៃចុះឈ្មោះ និងរៀបចំពិធីចាប់ពី ១០ ០០០ ដល់ ២៥ ០០០ រូពី ឬប្រហែល ១០៥ ដល់២៦០ដុល្លារអាមេរិក។ ចំនួនទឹកប្រាក់សរុប ពាក់ព័ន្ធនឹងការឆបោកនេះ ត្រូវបានប៉ាន់ប្រមាណថា មានចំនួនប្រមាណ ១០៤០០ ដុល្លារអាមេរិក។
ក្រុមឆបោកបានណាត់គ្រួសារកូនកំលោះទាំងអស់ ឱ្យមកជួបជុំគ្នានៅទីតាំងសាសនាមួយកន្លែងនៅទីក្រុងឌីវ៉ាស (Dewas) នៅថ្ងៃទី២៤ ខែឧសភា ឆ្នាំ២០២៦ ដើម្បីរៀបចំពិធីមង្គលការរួមគ្នាតែម្តង ។ ប៉ុន្តែនៅពេលក្រុមគ្រួសារ សាច់ញាតិខាងប្រុសទៅដល់តាំងពីម៉ោង៨ព្រឹក ប៉ុន្តែនៅកន្លែងនោះ គ្មានការរៀបចំពិធីមង្គលការ ឬពិធីសាសនាអ្វីទាំងអស់ ហើយសំខាន់បំផុតនោះ គ្មានទាំងកូនក្រមុំ និងអ្នករៀបចំកម្មវិធីណាម្នាក់នៅទីនោះឡើយ ហើយទូរសព្ទពួកគេត្រូវបានបិទទាំងអស់ថែមទៀត។
ក្រោយពីមានការតវ៉ា និងដាក់ពាក្យបណ្តឹងពីជនរងគ្រោះទាំងអស់ សមត្ថកិច្ចបានបើកការស៊ើបអង្កេតភ្លាមៗ
រហូតឈានដល់ការចាប់ខ្លួនជនសង្ស័យឈ្មោះ Mukesh Bairagi ព្រមទាំងភរិយាឈ្មោះ Sunita រួមទាំងបក្សពួកម្នាក់ទៀត។ ករណីនេះ ត្រូវបានចុះបញ្ជីចោទប្រកាន់ជាផ្លូវការពីបទឆបោក និងកៀរគរប្រាក់ដោយខុសច្បាប់ ក្រោមមាត្រានៃក្រមព្រហ្មទណ្ឌ ហើយបច្ចុប្បន្ន ប៉ូលិសកំពុងតែបន្តស្វែងរកចាប់ខ្លួនសមាជិកក្រុមឆបោកនេះ មួយចំនួនទៀត ដែលកំពុងរត់គេចខ្លួន ៕
ចែករំលែកព័តមាននេះ