ទីក្រុងបាងកក ៖ ថៃ ដែលជាប្រទេសមានសេដ្ឋកិច្ចធំលំដាប់ទី២ នៅអាស៊ីអាគ្នេយ៍ បានស្វាគមន៍ភ្ញៀវទេសចរបរទេសចំនួន១៣,៤៣លាននាក់ ចាប់ពីថ្ងៃទី១ ខែមករា ដល់ថ្ងៃទី២៤ ខែឧសភា ឆ្នាំ២០២៦ ធ្លាក់ចុះ២,៧៨% បើធៀបនឹងរយៈពេលដូចគ្នា កាលពីឆ្នាំមុន ទោះបីជាចំនួនភ្ញៀវទេសចរប្រចាំសប្តាហ៍បានងើបឡើងវិញថ្មីៗនេះ ដោយសារតម្រូវការធ្វើដំណើរកម្សាន្តក្នុងថ្ងៃឈប់សម្រាក និងការតភ្ជាប់ជើងហោះហើរកាន់តែល្អប្រសើរឡើងយ៉ាង ណាក៏ដោយ។ នេះបើតាមប្រភពពីសារព័ត៌មាន VnExpress ចេញផ្សាយនៅថ្ងៃទី២៨ ខែឧសភា ឆ្នាំ២០២៦។
ដោយស្រង់សម្តីដោយសារព័ត៌មានថៃ The Nation រដ្ឋមន្ត្រីក្រសួងទេសចរណ៍ និងកីឡារបស់ថៃ លោក ស៊ូរ៉ាសក្តិ ផាន់ឆារឿនវូរ៉ាគុល (Surasak Phancharoenworakul) បានឱ្យដឹងថា ប្រទេសចិននៅតែជាប្រភពភ្ញៀវទេស ចរធំជាងគេរបស់ប្រទេសថៃ ដោយមានចំនួន ២,២៣លាននាក់ បន្ទាប់មក គឺម៉ាឡេស៊ីចំនួន១,៥លាននាក់ និងឥណ្ឌាចំនួន១លាននាក់ ។
ក្រសួងទេសចរណ៍ថៃបានកត់សម្គាល់ថា ទីផ្សារឥណ្ឌាបានឈានដល់ដំណាក់កាលសំខាន់មួយ ដោយចំនួនភ្ញៀវមកដល់សរុបលើសពី១លាននាក់។ វិស្សមកាលសិក្សានៅម៉ាឡេស៊ី និងឥណ្ឌា ក៏បានជួយជំរុញការធ្វើដំណើរជាលក្ខណៈគ្រួសារមកកាន់ប្រទេសថៃផងដែរ ដែលរួមចំណែកដល់ការកើនឡើងចំនួនភ្ញៀវអំឡុងពេលនោះ។ មន្ត្រីទេសចររំពឹងថា ចំនួនភ្ញៀវបរទេសនឹងកើនឡើងបន្ថែមទៀតក្នុងសប្តាហ៍ខាងមុខនេះ ដែលជំរុញដោយកត្តាធ្វើដំណើរវិជ្ជមានជាច្រើន។
កត្តាទាំងនេះរួមមាន ថ្ងៃឈប់សម្រាកបុណ្យសាសនា Eid al-Adha រយៈពេលវែង ដែលត្រូវបានប្រារព្ធឡើងនៅ
ទូទាំងតំបន់មជ្ឈិមបូព៌ា និងអាស៊ី បូករួមទាំងការធ្វើឱ្យល្អប្រសើរឡើងនូវស្ថានភាពថាមពលនៅក្នុងប្រទេសថៃ ដែលតម្លៃប្រេងឥន្ធនៈមានស្ថិរភាព ស្របតាមទីផ្សារសកល និងការដាក់ឱ្យអនុវត្តយុទ្ធនាការទេសចរណ៍ ដែលជួយពង្រឹងរូបភាពរបស់ប្រទេសថៃ ក្នុងនាមជាគោលដៅសុវត្ថិភាពសម្រាប់ភ្ញៀវទេសចរអន្តរជាតិ។ ស្របពេលដែលរដ្ឋាភិបាលថៃរំពឹងថា នឹងមានភ្ញៀវទេសចរបរទេសប្រហែល៣៣,៥លាននាក់នៅឆ្នាំនេះ ពោលកើនឡើងពីជិត៣៣លាននាក់ កាលពីឆ្នាំមុន ៕
ចែករំលែកព័តមាននេះ