ទីក្រុងតេអេរ៉ង់៖ យោធាអាមេរិកបើកប្រតិបត្តិការវាយប្រហារអ៊ីរ៉ង់ជាថ្មីកាលពីយប់មិញបន្ទាប់ពីលោកដូណាល់ត្រាំប្រកាសថាអ៊ីរ៉ង់ឥឡូវនេះកំពុងចរចាដោយគ្មាននៅសេសសល់អ្វីនៅក្នុងដៃដើម្បីតថ្លៃគ្នានោះទេ។ លោកក៏សូមបញ្ជាក់ផងដែរថាការបោះឆ្នោតសភានាខែវិច្ឆិកាខាងមុខនេះគ្មានឥទ្ធិពលអ្វីដែលធ្វើឱ្យលោកត្រូវចរចាឱ្យមានកិច្ចព្រមព្រៀងជាមួយអ៊ីរ៉ង់ទាំងប្រញាប់ប្រញាល់ពេកនោះដែរ។ កងទ័ពអាមេរិកបានបាញ់ទម្លាក់ដ្រូនរបស់អ៊ីរ៉ង់ចំនួនបួនគ្រឿងដែលអាចនឹងបង្កការគំរាមកំហែងចំពោះសន្តិសុខនៅច្រកសមុទ្រហ័រម៉ូស។ នេះបើយោងតាមមន្ត្រីរដ្ឋាភិបាលអាមេរិកដែលសូមមិនបញ្ចេញឈ្មោះ។
យោធាអាមេរិកក៏បានបើកការវាយប្រហារទៅលើស្ថានីយគ្រប់គ្រងនៅតំបន់បាន់ដា អាបាស់ (Bandar Abbas) ដែលត្រៀមបញ្ជូនដ្រូនទី៥ទៅច្រកហ័រម៉ូស។ សេចក្ដីលម្អិតអំពីការវាយប្រហារនោះត្រូវបានលាតត្រដាងបន្ទាប់ពីលោកត្រាំបង្ហាញទំនុកចិត្តថារដ្ឋាភិបាលរបស់លោកកំពុងបោះជំហានទៅមុខក្នុងការដោះស្រាយបញ្ហាសង្គ្រាមនេះទោះបីការចរចាគ្នាហាក់ដូចជាមិនសូវរីកចម្រើនទៅមុខយ៉ាងណាក្ដី។ លោកកំពុងស្វះស្វែងរកការដោះស្រាយជម្លោះដើម្បីបើកច្រកសមុទ្រហ័រម៉ូសឡើងវិញ និងដើម្បីទទួលការជឿជាក់ពីសំណាក់អ្នកខាងក្រៅទៅលើរូបលោកថាលោកអាចធ្វើឱ្យសមត្ថភាពនុយក្លេអ៊ែររបស់អ៊ីរ៉ង់រលាយសាបសូន្យ។
ក្រុមអ្នកសារធារណរដ្ឋនិយមកំពុងតែមិនសូវសប្បាយចិត្តប៉ុន្មានទេចំពោះការប្រកាន់ជំហររបស់ត្រាំ។ ដូចដែលបញ្ហាកំពុងកើតមានបច្ចុប្បន្ននេះអីចឹងគឺថាលោកត្រាំប្រឈមនឹងការសុខចិត្តទទួលយកការបិទបញ្ចប់សង្គ្រាមទាំងឆិនឆៃ ហើយទទួលលទ្ធផលទាំងមិនជាទីគាប់ចិត្តនោះឡើយ។ ទោះជាយ៉ាងណាក្ដី លោកត្រាំប្រកាសកាលពីយប់មិញច្រានចោលការគិតថាគម្រោងបោះឆ្នោតពាក់កណ្ដាលអាណត្តិនាពេលខាងមុខនេះអាចជាកត្តាកំណត់យុទ្ធសាស្ត្រក្នុងការចរចាជាមួយអ៊ីរ៉ង់។
ត្រាំថាលោកគ្មានខ្វល់នឹងការបោះឆ្នោតនោះទេ។ ប៉ុន្តែលោកទទួលស្គាល់ថាមានកិច្ចការជាច្រើនទៀតដែលត្រូវធ្វើ។ លោកថាមានចំណុចវាស់វែងបានដែលថាភាគីជម្លោះទាំង២អាចនឹងដើរដល់។ ត្រាំនៅតែអះអាងថាអ៊ីរ៉ង់ចង់ចរចាគ្នាឱ្យមានកិច្ចព្រមព្រៀងជាខ្លាំង។ រហូតមកដល់ពេលនេះ ពួកគេមិនទាន់ដើរដល់ដំណាក់កាលនោះនៅឡើយទេ។ យើងមិនពេញចិត្តទាល់តែសោះនឹងការចរចានេះ៕ ប្រភព៖ AP
ចែករំលែកព័តមាននេះ