ទីក្រុងវៀងចន្ទន៍៖ អ្នកដឹកនាំម្នាក់នៃក្រុមអ្នកជួយសង្គ្រោះអ្នកភូមិដែលជាប់ផុងនៅក្នុងរូងភ្នំប្រទេសឡាវថ្លែងថាគេត្រូវការបំពង់ឧស្ម័នអុកស៊ីហ្សែនច្រើនថែមទៀតដើម្បីធ្វើឱ្យដំណើរការជួយសង្គ្រោះប្រព្រឹត្តទៅដោយជោគជ័យ។ អ្នកភូមិទាំង៧នាក់បានដើរចូលទៅក្នុងរូងភ្នំស្ថិតនៅខេត្តសៃសុំប៊ុនកាលពីសប្ដាហ៍មុនដើម្បីរុករកមាស។ ប៉ុន្តែនៅសុខៗស្រាប់តែមានភ្លៀងធ្លាក់មួយមេធំ បណ្ដាលឱ្យបាក់ដីបិទជិតច្រកចេញចូលរូងភ្នំ។ នេះបើយោងតាមអ្នកស្ម័គ្រចិត្តក្នុងការជួយសង្គ្រោះម្នាក់ប្រាប់សារព័ត៌មានរបស់រដ្ឋ។
អ្នកភូមិយ៉ាងតិច៥នាក់ត្រូវគេរកឃើញថានៅរស់រានមានជីវិត។ ប៉ុន្តែមិនទាន់មាននរណាម្នាក់ត្រូវបានជួយសង្គ្រោះចេញមកខាងក្រៅរូងភ្នំនៅឡើយទេ។ លោកខេងខាត បុងខាវង្ស (Kengkard Bongkawong) ជាអ្នកជួយសង្គ្រោះម្នាក់បង្ហោះសារនៅលើបណ្ដាញសង្គមថាយើងត្រូវការបំពង់អុកស៊ីហ្សែនឱ្យបានច្រើនតាមដែលអាចធ្វើទៅបានដើម្បីបង្កើតជាប្រព័ន្ធបំពេញខ្យល់អុកស៊ីហ្សែនឡើងវិញនៅក្នុងរូងភ្នំ។
ក្រុមអ្នកស្ម័គ្រចិត្តនៅក្នុងបេសកកម្មជួយសង្គ្រោះលើកនេះនិយាយខុសៗគ្នាពាក់ព័ន្ធនឹងចំនួនអ្នកភូមិដែលក្រុមអ្នកហែលទឹកបានរកឃើញ។ ក្រុមអ្នកស្ម័គ្រចិត្តមកពីប្រទេសថៃថ្លែងកាលពីថ្ងៃពុធថាគេរកឃើញអ្នកភូមិ៥នាក់។ ចំណែកក្រុមអ្នកជួយសង្គ្រោះរបស់ប្រទេសឡាវថ្លែងថាគេរកឃើញអ្នកភូមិទាំង៧នាក់គ្រប់ចំនួនហើយ ហើយពួកគេមានសុវត្ថិភាពជាធម្មតា។ ហេតុនេះរបាយការណ៍ទាំង២នេះមិនដឹងថាត្រូវជឿមួយទុកមួយណាទេព្រោះមិនទាន់មានភស្តុតាងជាក់លាក់ដើម្បីបញ្ជាក់ការពិត។
ក្រុមអ្នកស្ម័គ្រចិត្តមកពីប្រទេសថៃបានចូលរួមនៅក្នុងប្រតិបត្តិការជួយសង្គ្រោះកាលពីថ្ងៃអាទិត្យ។ ក្នុងនោះក៏មានអ្នកមុជទឹកដែលធ្លាប់ចូលរួមជួយសង្គ្រោះក្មេងៗ១២នាក់ និងគ្រូបង្វឹកបាល់ទាត់របស់ពួកគេកាលពីឆ្នាំ២០១៨នៅរូងភ្នំថាមលួង ប្រទេសថៃផងដែរ។ ការជួយសង្គ្រោះនៅក្នុងពេលនោះល្បីល្បាញខ្លាំងណាស់ព្រោះសហគមន៍អន្តរជាតិ និងសារព័ត៌មានទូទាំងសាកលលោកផ្ដោតការយកចិត្តទុកដាក់យ៉ាងខ្លាំង៕ ប្រភព៖ Channel News Asia
ចែករំលែកព័តមាននេះ