សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀហ្សេឡេនស្គី បានផ្ញើសារលិខិតមួយច្បាប់ជូនចំពោះសមភាគីអាមេរិកលោកដូណាល់ ណាល់ត្រាំ ដើម្បីសុំឲ្យលោកជួយផ្ដល់មីស៊ីលថែមទៀត សម្រាប់ប្រព័ន្ធការពារអាកាសប៉ាទ្រីយ៉ូត ជាឧបករណ៍ការពារសំខាន់ សម្រាប់ប្រឈមមុខនឹងការបង្កើនការវាយប្រហាររបស់រុស្សុី ។
សារលិខិតនោះចុះហត្ថលេខា កាលពីថ្ងៃទី២៦ ឧសភា ២ថ្ងៃបន្ទាប់ពីការវាយប្រហារយ៉ាងបំផ្លិចបំផ្លាញបំផុតរបស់រុស្សុីប្រឆាំងអ៊ុយក្រែន ជាមួយការប្រើដ្រូនដល់ជិត៦០០គ្រឿង និងមីស៊ីលប្រមាណជា៩០គ្រាប់ ក្នុងនោះមានទាំងមីស៊ីលបាលីស្ទិករយៈមធ្យមលឿនជាងសំឡេងថ្មីមានសមត្ថភាពនុយក្លេអ៊ែរធុន ORECHNIK ។
រុស្សុីនៅបន្តគំរាមកំហែងថ្មីទៀតពីការវាយប្រហារខ្លាំងក្លាលើរដ្ឋធានីអ៊ុយក្រែនក្រុងគៀវ បន្ទាប់ពីការវាយប្រហារខ្លាំងក្លាបំផុត កាលពីយប់ថ្ងៃទី២៣ មក ២៤ ឧសភា បណ្ដាលឲ្យមានការខូចខាតធំធេងបំផុត ។ រុស្សុីបន្តអំពាវនាវដល់បណ្ដាជនបរទេសដែលរស់នៅក្នុងក្រុងគៀវនិងបុគ្គលិកការទូត ចាកចេញពីរដ្ឋធានីអ៊ុយក្រែនមុនការវាយប្រហារថ្មីៗទៀត ។
ក្នុងសេចក្ដីប្រកាសមួយក្រសួងការបរទេសរុស្សុីព្រមានថា ការវាយប្រហារថ្មីៗនឹងកើតមានប្រឆាំងបណ្ដាមជ្ឈមណ្ឌលចេញការសម្រេចចិត្ត និងបណ្ដាសហគ្រាសឧស្សាហកម្មយោធានៅក្រុងគៀវ។ រដ្ឋមន្ត្រីការបរទេសរុស្សុីលោកស័រហ្គេយឡាវរ៉ូវ នាថ្ងៃទី២៥ ឧសភា បានស្នើដល់សហរដ្ឋអាមេរិក ឲ្យជម្លៀសបុគ្គលិកការទូតនិងពលរដ្ឋខ្លួនចេញពីរដ្ឋធានីអ៊ុយក្រែន ពេលលោកជួបសន្ទនាតាមទូរស័ព្ទជាមួយសមភាគីអាមេរិកលោកម៉ាកូរ៉ូប៊ីយ៉ូ ។
ការខូចខាតក្នុងការវាយប្រហារទ្រង់ទ្រាយធំរបស់រុស្សុិលើក្រុងគៀវ បង្ហាញយ៉ាងច្បាស់ពីការចំណុះរបស់អ៊ុយក្រែនចំពោះបណ្ដាសម្ព័ន្ធមិត្ត ដើម្បីការពារដែនអាកាសខ្លួនប្រឆាំងមីស៊ីលរុស្សុី។
ក្នុងសារលិខិតជូនលោកត្រាំលោកហ្សេឡេនស្គីបន្តថា យើងយល់ថាអាមេរិកក៏កំពុងបន្តធានារ៉ាប់រងដល់កិច្ចការពាររបស់ខ្លួនផ្ទាល់ និងការពារបណ្ដាសម្ព័ន្ធមិត្តនិងដៃគូ។ ក៏ប៉ុន្តែក្រោយពីអ្វីៗដែលយើងបានឆ្លងកាត់ជាមួយគ្នាតើយើងមិនសមទទួលបានការជួយក្នុងចំណោមសម្ព័ន្ធមិត្តឬ? ទំនាក់ទំនងរវាងប្រធានាធិបតីអាមេរិកនិងសមភាគអ៊ុយក្រែន មានការលំបាកខ្លាំងចាប់តាំងពីលោកត្រាំវិលចូលកាន់កាប់សេតវិមានជាថ្មីមក៕
ចែករំលែកព័តមាននេះ