មន្ទីរបរិស្ថានបដិសេធព័ត៌មានស្តីពីការជីករ៉ែមាសខុសច្បាប់នៅឧទ្យានជាតិវើនសៃ-សៀមប៉ាង
- ស្ទឹងត្រែង
ខេត្តស្ទឹងត្រែង ៖ អាជ្ញាធរមានសមត្ថកិច្ច និងមន្ត្រីជំនាញនៃមន្ទីរបរិស្ថាន បានចេញមុខបដិសេធទាំងស្រុង ចំពោះការចុះផ្សាយរបស់សារព័ត៌មានក្នុងស្រុកមួយ (N3) ដែលបានលើកឡើងថា មានជនជាតិវៀតណាមលួចលាក់ធ្វើអាជីវកម្មរ៉ែមាសយ៉ាងអនាធិបតេយ្យនៅក្នុងតំបន់ឧទ្យានជាតិវើនសៃ-សៀមប៉ាង ។
ការបដិសេធនេះ ធ្វើឡើងបន្ទាប់ពីកម្លាំងចម្រុះបានចុះទៅពិនិត្យ និងស្វែងរកដល់ទីតាំងជាក់ស្តែង រយៈពេល២ថ្ងៃជាប់ៗគ្នា ប៉ុន្តែពុំមានឃើញស្លាកស្នាមអ្វីឡើយ ។ យោងតាមរបាយការណ៍របស់ការិយាល័យឧទ្យានជាតិបានឱ្យដឹងថា ភ្លាមៗបន្ទាប់ពីទទួលបានព័ត៌មាន កាលពីថ្ងៃទី២៦ ខែឧសភា ឆ្នាំ២០២៦ កម្លាំងអន្តរាគមន៍ចម្រុះរួមមាន៖ មន្ត្រីឧទ្យានុរក្សកងរាជអាវុធហត្ថស្រុកសៀមប៉ាង ប៉ុស្តិ៍នគរបាលរដ្ឋបាលឃុំសន្តិភាព និងកម្លាំងយោធាផ្នែកសឹករងសៀមប៉ាង បានចុះទៅដល់ចំណុចភ្នំតូច ត្រង់និយាមកា(687719-1555118)ជាបន្ទាន់ ។
នៅទីតាំងនោះ កម្លាំងជំនាញពុំបានរកឃើញសកម្មភាពល្មើសច្បាប់ណាមួយឡើយ ហើយថែមទាំងបានសម្រាកដេកព្រៃល្បាត ដើម្បីឃ្លាំមើលការចេញចូលយ៉ាងតឹងរ៉ឹងថែមទៀតផង។ តាមការបញ្ជាក់ពីមន្ត្រីឧទ្យានជាតិធានាឱ្យកាន់តែច្បាស់លាស់ នៅថ្ងៃទី២៧ ខែឧសភា លោក ស៊ឹម ប៉ូលីន ប្រធានការិយាល័យឧទ្យានជាតិ បានដឹកនាំកម្លាំងបន្ថែម ដោយសហការជាមួយគណៈបញ្ជាការឯកភាពរដ្ឋបាលស្រុកសៀមប៉ាង និងសហគមន៍តំបន់ការពារធម្មជាតិអូកាពីន ចុះទៅពិនិត្យម្តងទៀតនៅត្រង់ចំណុចនិយាមកា (687726-1555114) ស្ថិតក្នុងភូមិសាស្ត្រគិរីបាសក្រោម ឃុំសន្តិភាព ស្រុកសៀមប៉ាង ខេត្តស្ទឹងត្រែង។ ជាលទ្ធផល គឺមិនមានស្លាកស្នាម ឬសកម្មភាពកាយដីរុករករ៉ែ ដូចការចោទប្រកាន់របស់ប្រព័ន្ធផ្សព្វផ្សាយនោះឡើយ ។
បច្ចុប្បន្ន មន្ត្រីជំនាញនៃមន្ទីរបរិស្ថានខេត្តស្ទឹងត្រែង ក៏បានដំឡើងកិច្ចសហការទ្វេដង ជាមួយមន្ត្រីឧទ្យានុរក្សនៃមន្ទីរបរិស្ថានខេត្តរតនគិរី ដើម្បីរួមគ្នាបង្កើនការល្បាត ការពារ និងទប់ស្កាត់បទល្មើសធនធានធម្មជាតិគ្រប់ប្រភេទ នៅតាមបណ្តោយព្រំប្រទល់រវាងខេត្តទាំងពីរឱ្យកាន់តែមានស្របតាមច្បាប់ជាធរមាន ។ ក្រុមអ្នកតាមដាននិយាយថា បើរកមិនឃើញ ឬគ្មានការរំលោភមែន គឺពិតជាល្អហើយ ។ ប៉ុន្តែ ប្រសិនបើមានការលាក់លៀមណាមួយ… មន្ត្រីទាំងឡាយប្រាកដជា «ធ្ងន់.ក» មិនខានឡើយ …ហេ! ហេ!
ចែករំលែកព័តមាននេះ