កុំកាត់ផ្តាច់ក្តីស្រមៃផ្កាក្រពុំ ! រួមគ្នាគាំទ្រយុទ្ធនាការជាតិបញ្ឈប់អាពាហ៍ពិពាហ៍វ័យក្មេង ដើម្បីអនាគតដ៏ត្រចះត្រចង់របស់កុមារី
- ភ្នំពេញ
រាជធានីភ្នំពេញ ៖ អាពាហ៍ពិពាហ៍ គឺជាការចាប់ផ្តើមនៃទំព័រជីវិតដ៏ថ្មីសន្លាងមួយដែលត្រូវការភាពចាស់ទុំ ទំនួលខុសត្រូវ និងសេចក្តីសុខ ។ ប៉ុន្តែវានឹងប្រែជារនាំងខណ្ឌ បំបែកក្តីសង្ឃឹម និងជាស្រមោលអន្ធកាលទៅវិញ ប្រសិនបើវាត្រូវបានបង្កើតឡើងនៅខុសពេលវេលា ។ នាសម័យបច្ចុប្បន្ន «អាពាហ៍ពិពាហ៍វ័យក្មេង» ឬការរៀបការទាំងមិនទាន់គ្រប់អាយុ (ក្រោម១៨ ឆ្នាំ) នៅតែជាដុំដំបៅដ៏រ៉ាំរ៉ៃ ដែលកំពុងបំផ្លាញអនាគតរបស់កុមារី និងយុវវ័យជាច្រើនទាំងមិនដឹងខ្លួន ។
ជាក់ស្តែងអង្គការយូនីសេហ្វកម្ពុជា (UNICEF Cambodia) បានដាស់តឿនសតិអារម្មណ៍សង្គមជាតិទាំងមូល ដោយបានប្រកាស នាថ្ងៃទី ២៨ ខែឧសភា នេះថា ៖ បើក្មេងស្រីមិនមែនជាកូនក្រមុំ តើពួកគេជានរណា ? ពួកគេ គឺជាសិស្ស ។ ជាកូនស្រី ដែលមានក្ដីស្រមៃ ។ ជាអនាគតអ្នកវិទ្យាសាស្ត្រ សាស្ត្រាចារ្យ សិល្បករ វិចិត្រករដ៏ឆ្នើម មេដឹកនាំ ដែលបង្កើតការផ្លាស់ប្តូរវិជ្ជមាននៅក្នុងសង្គម ។ ពួកគេជាកុមារ ដែលមានអនាគតដ៏ត្រចះត្រចង់ មិនមែនជាជនរងគ្រោះ ដែលត្រូវដើរលើផ្លូវដែលគេកំណត់ឲ្យទាំងវ័យក្មេងនោះឡើយ ។ រួមគ្នា យើងអាចបញ្ឈប់អាពាហ៍ពិពាហ៍វ័យក្មេងបាន ។
ក្នុងនោះដែរ បើយោងតាមផេកក្រសួងកិច្ចការនារីកម្ពុជា បានប្រកាសនាថ្ងៃទី២៧ ខែឧសភានេះថា ៖ កន្លងមក ក្រសួងកិច្ចការនារីសហការ និងគាំទ្រដល់រដ្ឋបាលខេត្តរតនគិរី បានរៀបចំ និងអនុវត្តលើផែនការសកម្មភាពប្រកបដោយប្រសិទ្ធភាពលើការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះវ័យជំទង់ នៅខេត្តរតនគិរី ។
ក្រសួងកិច្ចការនារី កំពុងដឹកនាំសម្របសម្រួល និងរៀបចំ «ផែនការសកម្មភាពជាតិស្តីពីការបង្ការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះ នៅវ័យជំទង់ ឆ្នាំ ២០២៦-២០៣០» ដោយមានកិច្ចសហការ និងគាំទ្រដ៏ល្អពីក្រសួង ស្ថាប័ន និងអង្គការដៃគូ រួមទាំងរដ្ឋបាលថ្នាក់ក្រោមជាតិ ដើម្បីបង្ការទប់ស្កាត់ និងឆ្លើយតបអាពាហ៍ពិពាហ៍នៅវ័យក្មេង ជាពិសេសការលើកកម្ពស់ការឆ្លើយតបពីអ្នកពាក់ព័ន្ធ និងយុទ្ធនាការចលនាមហាជន ក្នុងការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ ។
សូមបញ្ជាក់ថា កុមារីគ្រប់រូបមានសិទ្ធិពេញលេញក្នុងការរៀបចំវាសនាដោយខ្លួនឯង ។ ដៃរបស់ពួកគេគួរតែជាដៃដែលកាន់កាបូបរៀន និងបង្កើតភាពអស្ចារ្យទៅកាន់ពិភពលោក មិនមែនជាដៃដែលត្រូវបីកូនទាំងទឹកភ្នែក និងការស្តាយក្រោយនោះឡើយ ។
បន្ថែមពីនេះទៀត ក្មេងស្រីគ្រប់រូប មានអនាគតដ៏ត្រចះត្រចង់រង់ចាំនៅខាងមុខ ។ ពួកគេមិនមែនជាជនរងគ្រោះ ដែលត្រូវដើរលើផ្លូវដែលគេគូសវាស និងកំណត់ឱ្យទាំងវ័យក្មេង ដោយសារតែដានប្រពៃណីហួសសម័យនោះឡើយ ។
លើសពីនេះ ការបញ្ឈប់អាពាហ៍ពិពាហ៍វ័យក្មេង គឺការបើកទ្វារសេរីភាព និងផ្តល់ស្លាបឱ្យកុមារីគ្រប់រូបបានហោះហើរទៅកាន់ក្តីស្រមៃរបស់ពួកគេ ។ ចូលរួមទាំងអស់គ្នា ដើម្បីការពារផ្កាក្រពុំទាំងនេះឱ្យរីកស្គុសស្គាយប្រកបដោយភាពស្រស់បំព្រង ។
ជាមួយគ្នានោះដែរ ការលុបបំបាត់អាពាហ៍ពិពាហ៍វ័យក្មេង គឺជាកាតព្វកិច្ចរួមរបស់ឪពុកម្តាយ អាជ្ញាធរ និងយើងទាំងអស់គ្នា ។ តាមរយៈការលើកកម្ពស់ការអប់រំ និងការផ្តល់តម្លៃដល់កុមារី យើងកំពុងតែកសាងសង្គមមួយប្រកបដោយភាពស៊ីវិល័យ ចំណេះដឹង និងសមធម៌ ៕
ចែករំលែកព័តមាននេះ