ទីក្រុងវ៉ាស៊ីនតោន៖ យោធាអាមេរិកថ្លែងថាខ្លួនបានវាយប្រហារជាលក្ខណៈការពារខ្លួនកាលពីយប់មិញទៅលើប្រទេសអ៊ីរ៉ង់ភាគខាងត្បូង។ នៅក្នុងចំណោមនោះ អាមេរិកក៏វាយប្រហារទីតាំងដាក់ជើងទម្របាញ់មីស៊ីល និងទូកប្រើប្រាស់សម្រាប់ដាក់ពង្រាយគ្រាប់មីននៅលើផ្ទៃសមុទ្រផងដែរ។ ដូច្នេះ អាមេរិកនៅតែវាយប្រហារអីចឹងទោះបីលោកត្រាំប្រកាសនៅលើបណ្ដាញសង្គមថាដំណើរការចរចារីកចម្រើនទៅមុខគួរឱ្យកត់សម្គាល់ក៏ដោយ។ មានន័យថាជានយោបាយវាយគ្នាផង និងចរចាគ្នាផង។
វរសេនីយធីម ហ័រឃីន (Tim Hawkins) ដែលជាអ្នកនាំពាក្យបញ្ជាការដ្ឋានកណ្ដាលយោធាអាមេរិកថ្លែងថាការវាយប្រហារលើកនេះធ្វើឡើងដើម្បីការពារកងទ័ពរបស់យើងដែលរងការវាយប្រហារពីកងទ័ពអ៊ីរ៉ង់។ ប៉ុន្តែពួកយោធាខិតខំអត់ធ្មត់ណាស់នៅអំឡុងពេលនៃបទឈប់បាញ់នេះ។ សេចក្ដីលម្អិតនៃការវាយប្រហារនោះមិនទាន់ទទួលបានភ្លាមៗនោះទេ ឧទាហរណ៍ដូចជាថាតើការគំរាមកំហែងពីសំណាក់កងទ័ពអ៊ីរ៉ង់ទៅលើកងទ័ពអាមេរិកនោះគំរាមលើអ្វីខ្លះ? ម៉្យាងទៀត ថាតើអាមេរិកធ្វើដូច្នេះចង់មានន័យដូចម្ដេចខណៈដែលភាគីទាំង២កំពុងចរចាគ្នា?
កាលពីមុននេះ លោកត្រាំថ្លែងថាប្រសិនបើមានកិច្ចព្រមព្រៀងបញ្ចប់សង្គ្រាមគួរណាស់រួមបញ្ចូលទាំងប្រទេសដទៃទៀតដូចជាអារ៉ាប៊ីសាអូឌីត និងប៉ាគីស្ថានដើម្បីចូលរួមនៅក្នុងកិច្ចព្រមព្រៀងអាប្រាហាម អឹខត (Abraham Accord) ដែលជាកិច្ចព្រមព្រៀងសម្របសម្រួលដោយអាមេរិកតាំងពីពេលលោកត្រាំកាន់អំណាចនៅអាណត្តិទីមួយ។ កិច្ចព្រមព្រៀងនេះមានគោលដៅធ្វើប្រក្រតីកម្មទំនាក់ទំនងជាមួយអ៊ីស្រាអែល។
ការស្នើសុំរបស់ត្រាំកើតមានឡើងចំពេលដែលការចរចាឱ្យមានកិច្ចព្រមព្រៀងជាមួយអ៊ីរ៉ង់កំពុងរងការរិះគន់ពីក្រុមអ្នកសាធារណរដ្ឋនិយមដូចគ្នា។ ពួកគេចង់ឱ្យត្រាំប្រកាន់ជំហរឱ្យបានម៉ឺងម៉ាត់បន្តិចចំពោះអ៊ីរ៉ង់។ បើដូច្នេះមែន វានឹងបន្ថែមភាពស្មុគស្មាញផ្នែកការទូតថែមទៀតដែលធ្វើឱ្យការចរចាមិនងាយត្រូវរ៉ូវគ្នានោះឡើយ។ លោកត្រាំយល់ថាអារ៉ាប៊ីសាអូឌីត និងកាតាគួរតែជាភាគីដែលអាចចុះហត្ថលេខាជាបណ្ដើរៗតាំងពីពេលនេះឱ្យហើយទៅ រួមជាមួយប៉ាគីស្ថាន តួកគី អេហ្ស៊ីប និងហ្សកដង់។ បារ៉ែន និងអារ៉ាប់រួមជាប្រទេសដំបូងគេបំផុតដែលចូលរួមកិច្ចព្រមព្រៀងនេះកាលពីឆ្នាំ២០២០៕ ប្រភព៖ AP និងប្រភពដទៃទៀត
ចែករំលែកព័តមាននេះ