ខេត្តកំពង់ឆ្នាំង ៖ ដើមកញ្ឆាស្រស់ចំនួន១៩៥គុម្ព ត្រូវបានដុតកម្ទេចចោលនៅមុខសាលាដំបូងខេត្តកាលពីវេលាម៉ោង២និង ៣០នាទីរសៀល ថ្ងៃទី២ សីហា ក្រោមអធិបតីភាពលោកពេញ វិបុល ព្រះរាជអាជ្ញាអមសាលាដំបូងខេត្ត និងមានការចូលរួមពីលោកយឹម សុភាស់ ស្នងការរងនគរបាលខេត្ត
ខេត្តកំពង់ឆ្នាំង ៖ ដើមកញ្ឆាស្រស់ចំនួន១៩៥គុម្ព ត្រូវបានដុតកម្ទេចចោលនៅមុខសាលាដំបូងខេត្តកាលពីវេលាម៉ោង២និង៣០នាទីរសៀល ថ្ងៃទី២ សីហា ក្រោមអធិបតីភាពលោកពេញ វិបុល ព្រះរាជអាជ្ញាអមសាលាដំបូងខេត្ត និងមានការចូលរួមពីលោកយឹម សុភាស់ ស្នងការរងនគរបាលខេត្ត ព្រមទាំងមន្ត្រីតុលាការ មន្ត្រីប៉ូលិសជាច្រើនរូបទៀត ។
លោកពេញ វិបុល បានថ្លែងមុនពេលដុតកម្ទេចដើមកញ្ឆាទាំងនោះថា ដើមកញ្ឆាទាំង១៩៥គុម្ពដែលត្រូវដុតកម្ទេចចោលនៅថ្ងៃនេះ គឺបានរឹបអូសពីជនសង្ស័យឈ្មោះសាង ទ្រី អាយុ៣៨ឆ្នាំ រស់នៅភូមិព្រែកគន្លង ឃុំកំពង់ត្រឡាចក្រោម ស្រុកកំពង់ត្រឡាច ដែលបានលួចដាំនៅដីចម្ការរបស់ខ្លួន ហើយត្រូវបានលោកដឹកនាំកម្លាំងមន្ត្រីជំនាញចុះដកហូតកាលពីថ្ងៃទី២៦ កក្កដា កន្លងទៅ និងត្រូវដុតកម្ទេចចោលក្នុងថ្ងៃនេះ ។ លោកព្រះរាជអាជ្ញាបានបន្តថា កញ្ឆាគឺជារុក្ខជាតិមានសារធាតុញៀនដែលច្បាប់បានហាមឃាត់មិនឱ្យដាំ ឬចរាចរឡើយ យោងតាមមាត្រា៣១ នៃច្បាប់ស្តីពីការត្រួតពិនិត្យសារធាតុញៀន។ ជនសង្ស័យឈ្មោះ សាង ទ្រី នេះត្រូវបានចោទប្រកាន់ពីបទដាំដុះរុក្ខជាតិមានសារធាតុញៀនដែលត្រូវពិន័យជាប្រាក់ពី១លានទៅ៤លានរៀល និងដាក់ពន្ធនាគារពី៦ខែទៅ២ឆ្នាំ ។បច្ចុប្បន្នជនសង្ស័យរូបនេះកំពុងស្ថិតនៅក្នុងពន្ធនាគារខេត្តជាបណ្តោះអាសន្នរង់ចាំសវនាការជម្រះក្តីនៅពេលក្រោយ បន្ទាប់ពីសមត្ថកិច្ចធ្វើការស៊ើបអង្កេតចប់សព្វគ្រប់៕
ចែករំលែកព័តមាននេះ