ខេត្តស្ទឹងត្រែង ៖ តំបន់ប្រតិបត្តិការសឹករងខេត្ត បានពង្រឹងសមត្ថភាពនាយទាហាន និងពលទាហាន ដើម្បីត្រៀមយកប្រៀបឈ្នះលើសមរភូមិមុខ ដែលមាននាយទាហាន-ពលទាហានចំនួន៦០នាក់បានបើកប្រតិបត្តិការបា.ញ់ស៊ីប គ្រាប់ពិតនៅភូមិសាស្រ្តភ្នំកាច់គួរ ភូមិអូរព្រះ ឃុំអូរគ្រៀង ស្រុកសំបូរ
ខេត្តស្ទឹងត្រែង ៖ តំបន់ប្រតិបត្តិការសឹករងខេត្ត បានពង្រឹងសមត្ថភាពនាយទាហាន និងពលទាហាន ដើម្បីត្រៀមយកប្រៀបឈ្នះលើសមរភូមិមុខ ដែលមាននាយទាហាន-ពលទាហានចំនួន៦០នាក់បានបើកប្រតិបត្តិការបាញ់ស៊ីបគ្រាប់ពិតនៅភូមិសាស្រ្តភ្នំកាច់គួរ ភូមិអូរព្រះ ឃុំអូរគ្រៀង ស្រុកសំបូរ ក្នុងទឹកដីខេត្តក្រចេះ កាលពីព្រឹកថ្ងៃទី១ សីហា។
លោកវរសេនីយ៍ឯក វ៉ាន់ ដារ៉ាសិទ្ធិ គ្រូហ្វឹកហ្វឺនបានបញ្ជាក់ថា បន្ទាប់ពីបានធ្វើការហ្វឹកហាត់អស់រយៈពេលជាង១ខែកន្លងមកនេះ តំបន់ប្រតិបត្តិការសឹករងខេត្តបានធ្វើការបាញ់គ្រាប់ពិត ដើម្បីអនុវត្តន៍សមត្ថភាពជាក់ស្តែងឲ្យដឹងពីទេពកោសល្យរបស់សិក្ខាកាមជានាយទាហាន-ពលទាហាន ក៏ដូចជាការប្រឡងពីសមត្ថភាពផងដែរ។ លោកវរសេនីយ៍ឯកបានឲ្យដឹងទៀតថា ក្រោយពីចំណាយពេលអស់៣ម៉ោងក្នុងការបាញ់ស៊ីបគ្រាប់ពិតនេះ ក្នុងចំណោមនាយទាហាន និងពលទាហានទាំង៦០នាក់យើងបានរកឃើញអ្នកពូកែ២នាក់ បង្គួរ១៣នាក់ មធ្យម១០នាក់ និងខ្សោយ៣៥នាក់ ។
លោកឧត្តមសេនីយ៍ត្រី លី សូរ៉ារិទ្ធ មេបញ្ជាការរងយោធភូមិភាគទី១បានមានប្រសាសន៍ថា ការបើកយុទ្ធនាការបាញ់គ្រាប់ពិតនេះ ពិតមែនតែការហ្វឹកហាត់មានរយៈពេលខ្លីក៏ដោយ ក៏សកម្មភាពអនុវត្តន៍របស់យើងសម្រេចបានលទ្ធផលល្អ។ សកម្មភាពនេះបញ្ជាក់ឲ្យឃើញពីភាពអង់អាចក្លាហានពិតៗ ធ្វើឱ្យតំបន់ប្រតិបត្តិការសឹករងកាន់តែមានកម្លាំងធនធានយ៉ាងរឹងមាំ ក្នុងការចូលរួមការពារទឹកដីជូនជាតិមាតុភូមិ ពិសេសអនុវត្តបានយ៉ាងត្រឹមត្រូវតាមគោលនយោបាយរបស់រាជរដ្ឋាភិបាល ។
លោកឧត្តមសេនីយ៍ត្រី ស្វាយ ញ៉ន មេបញ្ជាការតំបន់ប្រតិបត្តិការសឹករងខេត្ត បានមានប្រសាសន៍ឱ្យដឹងផងដែរថា នាយទាហាន-ពលទាហានយើងបានទទួលការសិក្សារៀនសូត្រទាំងនយោបាយយោធា ច្បាប់ និងហ្វឹកហ្វឺនផ្នែកបច្ចេកទេសពង្រឹងបានទាំងបរិមាណនិងគុណភាព។ លោកមេបញ្ជាការបានមានប្រសាសន៍ទៀតថា បច្ចុប្បន្នថ្វីត្បិតតែសភាពការណ៍នៅតាមព្រំដែនមានសភាពធូរស្រាល និងប្រក្រតីល្អយ៉ាងណាក៏ដោយ ក៏នាយទាហាននិងពលទាហានយើងនៅតែហ្វឹកហាត់បង្កើនសមត្ថភាពរបស់ខ្លួនត្រៀមជានិច្ចក្នុងការការពារទឹកដីរបស់យើង ។
លោកមេបញ្ជាការបានផ្តាំផ្ញើដល់នាយទាហាន-ពលទាហានទាំងអស់ត្រូវខិតខំប្រឹងប្រែងហ្វឹកហាត់បង្កើនសមត្ថភាពខ្លួនឯងបន្តទៀត ពិសេសត្រូវសិក្សារៀនសូត្រនិងដកស្រង់បច្ចេកទេសពីមិត្តភក្តិដែលមានស្នាដៃល្អ និងត្រូវគោរពវិន័យឲ្យបានត្រឹមត្រូវធ្វើឲ្យខ្លួនឯងក្លាយជាកងទ័ពល្អរបស់ប្រទេសជាតិ៕
ចែករំលែកព័តមាននេះ