ទីក្រុងប៉េកាំង ៖ នៅក្នុងសុន្ទរកថាបើកកិច្ចប្រជុំកំពូលផ្លូវការ នៅថ្ងៃទី១៤ ខែឧសភា ឆ្នាំ២០២៦ នាទីក្រុងប៉េកាំង ប្រធានាធិបតីចិន លោក ស៊ី…
ទីក្រុងប៉េកាំង ៖ នៅក្នុងសុន្ទរកថាបើកកិច្ចប្រជុំកំពូលផ្លូវការ នៅថ្ងៃទី១៤ ខែឧសភា ឆ្នាំ២០២៦ នាទីក្រុងប៉េកាំង ប្រធានាធិបតីចិន លោក ស៊ី ជិនពីង (Xi Jinping) បានអំពាវនាវផ្លូវការទៅកាន់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ឱ្យប្រទេសទាំងពីរធ្វើជាដៃគូ មិនមែនជាគូប្រជែងនឹងគ្នា។ នេះបើតាមប្រភពពី BBC, CNN, Reuters, The Guardian, Aljazeera និងប្រភពផ្សេងទៀតបានចេញផ្សាយ។
ការថ្លែងបែបនេះ បានធ្វើឡើងចំពេលមេដឹកនាំមហាអំណាចសេដ្ឋកិច្ចពិភពលោកទាំងពីរកំពុងបើកកិច្ចចរចាដ៏មានសារៈសំខាន់ ដែលពិភពលោកកំពុងតែតាមដានយ៉ាងយកចិត្តទុកដាក់ជាទីបំផុត។
លោក ស៊ី បានសង្កត់ធ្ងន់ថា ប្រទេសទាំងពីរគួរតែជួយគ្នាទៅវិញទៅមកដើម្បីជោគជ័យ និងសម្រេចបាននូវវិបុលភាពរួមគ្នា។ ជាការឆ្លើយតប លោក ត្រាំ បានសម្តែងការអបអរសាទរ និងលើកឡើងថាវាជាកិត្តិយស ដែលបានជួបពិភាក្សាជាមួយលោក ស៊ី ដោយបានហៅលោក ស៊ី ថា មេដឹកនាំដ៏អស្ចារ្យ ហើយទំនាក់ទំនងរវាងមហាអំណាចទាំងពីរ នឹងប្រសើរជាងពេលណាៗទាំងអស់ ដោយលោកបានបន្ថែមថា បើទោះបីជាមានការលំបាក ឬឧបសគ្គកន្លងមកយ៉ាងណាក៏ដោយ ក៏ថ្នាក់ដឹកនាំទាំងពីរតែងតែអាចរកដំណោះស្រាយបានតាមរយៈការប្រាស្រ័យទាក់ទងគ្នា។
តាមការរំពឹងទុករបៀបវារៈសំខាន់ៗនៃកិច្ចចរចារវាងមេដឹកនាំកំពុងទាំងពីររូប សម្រាប់ដំណើរទស្សនកិច្ចរយៈពេល៣ថ្ងៃ (ថ្ងៃទី ១៣-១៥ ឧសភា) របស់លោកប្រធានាធិបតី ត្រាំ រួមមាន៖ សង្គ្រាមសេដ្ឋកិច្ច និងពន្ធដារ ដោយមេដឹកនាំទាំងពីរពិភាក្សាអំពីការបន្តពន្យារពេលការផ្អាកអនុវត្តពន្ធកម្រិតខ្ពស់ ដើម្បីអនុញាតឱ្យប្រទេសទាំងពីរបង្កើនការបញ្ជាទិញកសិផល យន្តហោះ Boeing និងសណ្តែកសៀងជាដើម។
សង្គ្រាមនៅអ៊ីរ៉ង់ និងវិបត្តិថាមពល ដោយលោក ត្រាំ រំពឹងថានឹងជំរុញឱ្យចិនប្រើប្រាស់ឥទ្ធិពលសេដ្ឋកិច្ចខ្លួនលើអ៊ីរ៉ង់ ដើម្បីជួយបញ្ចប់សង្គ្រាម និងបើកច្រកសមុទ្រហ័រមូស (Hormuz) ឡើងវិញ។
បញ្ហាកោះតៃវ៉ាន់ លោក ស៊ី ត្រូវបានរំពឹងថានឹងទាមទារឱ្យអាមេរិកកាត់បន្ថយការលក់អាវុធទៅឱ្យតៃវ៉ាន់ បូករួមទាំងបញ្ហបច្ចេកវិទ្យា និងបញ្ញាសិប្បនិម្មិត (AI) ដោយការចរចាត្រូវបានរំពឹងលើការគ្រប់គ្រងហានិភ័យនៃ AI និងការរឹតបន្តឹងលើការនាំចេញបន្ទះឈីបរបស់អាមេរិក។ ស្របពេលលោក ត្រាំ ក៏បានអញ្ជើញបណ្តាមេដឹកនាំពាណិជ្ជកម្មអាមេរិកជាច្រើនរូបចូលរួមក្នុងដំណើរទស្សនកិច្ចនេះផងដែរ ជាពិសេសលើវិស័យបច្ចេកវិទ្យា៕
ចែករំលែកព័តមាននេះ