ខេត្តកណ្តាល ៖ ឈើគគីរអត់ច្បាប់ជាង១០ម៉ែត្រគូប ដឹកតាមកាណូតពីរគ្រឿងបម្រុងនាំចេញទៅប្រទេសវៀតណាម ត្រូវប៉ូលិសការិយាល័យប្រឆាំងបទល្មើសសេដ្ឋកិច្ចស្ទាក់ចាប់បាន កាលពីវេលាម៉ោង១និង៣០នាទីរសៀលថ្ងៃទី១ សីហា ខណៈកាណូតបើកតាមទន្លេបាសាក់ដល់ខាងមុខវត្តខ្ពបភូមិ
ខេត្តកណ្តាល ៖ ឈើគគីរអត់ច្បាប់ជាង១០ម៉ែត្រគូប ដឹកតាមកាណូតពីរគ្រឿងបម្រុងនាំចេញទៅប្រទេសវៀតណាម ត្រូវប៉ូលិសការិយាល័យប្រឆាំងបទល្មើសសេដ្ឋកិច្ចស្ទាក់ចាប់បានកាលពីវេលាម៉ោង១និង៣០នាទីរសៀលថ្ងៃទី១ សីហា ខណៈកាណូតបើកតាមទន្លេបាសាក់ដល់ខាងមុខវត្តខ្ពបភូមិលេខ៤ ឃុំសំពៅពូន ស្រុកកោះធំ ខេត្តកណ្តាល។
មន្ត្រីប៉ូលិសឱ្យដឹងថា កាលពីថ្ងៃទី១ សីហា ប៉ូលិសប្រឆាំងបទល្មើសសេដ្ឋកិច្ចខេត្តបានប្រទះឃើញកាណូតពីរគ្រឿងដឹកឈើពេញ បើកតាមបណ្តោយទន្លេបាក់ក្នុងភូមិសាស្ត្រ ស្រុកកោះធំ ក៏សុំយោបល់ពីលោកឧត្តមសេនីយ៍ត្រីអ៊ាវ ចំរើន ស្នងការនគរបាលខេត្តកណ្តាល ហើយលោកបញ្ជាឱ្យកម្លាំងប្រឆាំងបទល្មើសសេដ្ឋកិច្ច សហការជាមួយប៉ូលិសការពារព្រំដែន និងប៉ូលិសស្រុកកោះធំស្ទាក់ចាប់បាននៅចំណុចមុខវត្តខ្ពប ភូមិលេខ៤ ឃុំសំពៅពូន ស្រុកកោះធំ កាលពីម៉ោង១និង៣០នាទីរសៀលថ្ងៃទី១ ខែសីហា និងឃាត់ម្ចាស់កាណូតពីរនាក់មកសាកសួរទើបដឹងថា ឈើទាំងនោះគឺអត់ច្បាប់ដឹកមកពីខេត្តក្រចេះ។
មន្ត្រីប៉ូលិសឱ្យដឹងទៀតថា កាណូតដឹកឈើទាំងពីគ្រឿងនោះគឺនៅថ្មីសន្លាងមិនទាន់លាបជ័រ ទេ ដែលម្ចាស់បម្រុងដឹកយកទៅលក់នៅប្រទេសវៀតណាម ទាំងកាណូត ទាំងឈើគគីរតែម្តង។ ឈើគគីរទាំងនោះប្រភេទក្តារសន្លឹកមានបណ្តោយវែងៗ សរុបទាំងអស់ចំនួន២០៥សន្លឹក ស្មើនឹង១០,១៧៧ម៉ែត្រគូប និងកាណូត២គ្រឿងទៀតត្រូវបានរឹបអូសយក ហើយប្រគល់ទៅឱ្យសមត្ថកិច្ចជំនាញមេព្រៃនៅល្ងាចថ្ងៃដដែល។
ម្ចាស់ឈើម្នាក់ឈ្មោះទឹម ទូច ភេទប្រុស អាយុ៤០ឆ្នាំ និងម្នាក់ទៀតឈ្មោះសែ សារិន ភេទប្រុស អាយុ២៩ឆ្នាំ អ្នកទាំងពីរ មានទីលំនៅក្នុងភូមិព្រៃផ្គាំឃុំព្រៃផ្គាំ ស្រុកអង្គរបុរី ខេត្តតាកែវ។
មន្ត្រីប៉ូលិសឱ្យដឹងថា ម្ចាស់ឈើទាំងពីរនាក់បានទៅទិញកាណូត និងឈើគគីរពីខេត្តក្រចេះហើយបើកតាមទន្លេ រហូតដល់ស្រុកកោះធំទំនងជាវង្វេងរកព្រែកបើកចូលទៅស្រុកអង្គរបុរីមិនឃើញក៏ត្រូវសមត្ថកិច្ចប្រទះឃើញឃាត់សាកសួរដឹងថា អត់មានច្បាប់អ្វីទាំងអស់។ ម្ចាស់ឈើទាំងពីរនាក់ត្រូវបានអប់រំ ហើយដោះលែងវិញ គឺរឹបអូសយកតែឈើ និងកាណូតប្រគល់ឱ្យសមត្ថកិច្ចជំនាញប៉ុណ្ណោះ៕
ចែករំលែកព័តមាននេះ