រាជធានីភ្នំពេញ៖ ករណីប្ដីអត់ខាន់ស្លាបោះបង់ប្រពន្ធមានផ្ទៃពោះជាង២ខែ ដោយជឿតាមការចាក់រុកបំបែកបំបាក់ពីសំណាក់ឪពុកម្ដាយ និងក្រុមគ្រួសារដែលមិនពេញចិត្តនាង ហើយថែមទាំងបង្ខិតបង្ខំឲ្យនាងរំលូតកូនចោលទៀតនោះ ត្រូវបានបានដោះស្រាយចប់ហើយ ។ ប៉ុន្តែពុំមែនបានន័យថា ប្ដីអត់ខាន់ស្លារូបនោះនិងឪពុកម្ដាយ ព្រមទាំងក្រុមគ្រួសាររបស់គេ…
រាជធានីភ្នំពេញ៖ ករណីប្ដីអត់ខាន់ស្លាបោះបង់ប្រពន្ធមានផ្ទៃពោះជាង២ខែ ដោយជឿតាមការចាក់រុកបំបែកបំបាក់ពីសំណាក់ឪពុកម្ដាយ និងក្រុមគ្រួសារដែលមិនពេញចិត្តនាង ហើយថែមទាំងបង្ខិតបង្ខំឲ្យនាងរំលូតកូនចោលទៀតនោះ ត្រូវបានបានដោះស្រាយចប់ហើយ ។ ប៉ុន្តែពុំមែនបានន័យថា ប្ដីអត់ខាន់ស្លារូបនោះនិងឪពុកម្ដាយ ព្រមទាំងក្រុមគ្រួសាររបស់គេ ព្រមទទួលយកនាងឲ្យត្រឡប់ចូលផ្ទះវិញនោះទេ ពួកគេនៅតែមិនទទួលស្គាល់នាងដដែល ។ គួររំលឹកថា ទាក់ទងស្នេហា២ឆ្នាំ នាងមានផ្ទៃពោះជាង២ខែ ប្រុសស្នេហ៍និងក្រុមគ្រួសារ បង្ខំឲ្យនាងយកកូនចេញ
ដោយឡែកនៅវេលាព្រឹកថ្ងៃទី១២ ខែឧសភា ឆ្នាំ២០២៦ ភាគីខាងប្រុស និងក្រុមគ្រួសារបានចូលខ្លួនទៅដោះស្រាយជាមួយនារីរងគ្រោះ នៅសាលាសង្កាត់កំបូល ក្រោមការជួយសម្របសម្រួល ពីសំណាក់អាជ្ញាធរខណ្ឌកំបូល និងអាជ្ញាធរសង្កាត់កំបូល ពួកគេបានព្រមបង់ប្រាក់ឲ្យនាងរងគ្រោះត្រឹមតែ១,៥០០ដុល្លារដូចមុនដដែល ។ ខណៈនោះដោយសារតែខ្ជិលរញ៉េរញ៉ៃវែងឆ្ងាយតទៅទៀត ទើបនារីអភ័ព្វខាងលើនិងក្រុមគ្រួសាររបស់នាងយល់ព្រមទទួលយកទាំងការឈឺចាប់ឲ្យចប់រឿងតែម្ដងទៅ បន្ទាប់មក នាងរងគ្រោះក៏បានឡាយបកស្រាយ តាមសារព័ត៌មានឲ្យសាធារណៈជនបានដឹងថារឿងនោះបានដោះស្រាយចប់ហើយ ។
សូមបញ្ជាក់ថា ប្ដីប្រពន្ធអត់ខាន់ស្លាខាងលើនោះឈ្មោះកុសលដូចគ្នា ដោយប្ដីឈ្មោះសុះ កុសល អាយុ៣១ឆ្នាំ មុខរបរកម្មករឃ្លាំងរោងចក្រ ជាបុរសពោះម៉ាយកូន១ មានទីលំនៅបច្ចុប្បន្នភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ។ ចំណែកប្រពន្ធឈ្មោះផល កុសល អាយុ២៧ឆ្នាំ មុខរបរកម្មការិនីរោងចក្រនៅក្នុងតំបន់សេដ្ឋកិច្ចពិសេសភ្នំពេញ មានទីលំនៅបច្ចុប្បន្នផ្ទះលេខ៣៨៧ ផ្លូវលេខ២១ ភូមិប្រធាតុ(ក) ឃុំព្រែកស្ដី ស្រុកកោះធំ ខេត្តកណ្ដាល ។
ភ្លើងស្នេហារវាងបុរសពោះម៉ាយកូន១ និងនាងក្រមុំកម្មការិនីរោងចក្រម្នាក់ នេះ បានកើតឡើងទាំងការមិនពេញចិត្ត និងតាមបំបែកពីសំណាក់ឪពុកម្ដាយនិងក្រុមគ្រួសារខាងប្រុស ប៉ុន្តែអ្នកទាំង២ នៅតែព្យាយាមសាងភាពផ្អែមល្ហែមជាមួយគ្នា រហូតយកគ្នាជាប្ដីប្រពន្ធអត់ខាន់ស្លារស់ក្រោមដំបូលផ្ទះខាងប្រុសតែមួយ ។ ប៉ុន្តែអ្វីដែលនឹកស្មានមិនដល់នោះ បន្ទាប់ពីដឹងថានាងមានផ្ទៃពោះជាង២ខែ ស្រាប់តែប្រុសស្នេហ៍បានផ្លាស់ប្ដូរចិត្តទាំងស្រុង ផ្លាស់ពីការស្រលាញ់នាងដល់ឆ្អឹង ទៅជាការស្អប់នាងដល់ឆ្អឹងទៅវិញ ព្រោះតែជឿតាមការចាក់រុកបំបែកបំបាក់ពីឪពុកម្ដាយនិងក្រុមគ្រួសារ ។ ប្រុសស្នេហ៍បានគេចលែងជួបមុខនាង និងប្លុកឆាតហ្វេសប៊ុក បិទទូរស័ព្ទចោល មិនឲ្យនាងចូលផ្ទះ និងបោះបង្វិចខោអាវនាងចេញពីផ្ទះ មិនតែប៉ុណ្ណោះរូបគេនិងក្រុមគ្រួសារ បានបង្ខំឲ្យនាងរំលូតកូនចេញនៅនៅចំពោះមុខអាជ្ញាធរនិងសមត្ថកិច្ចទៀតផង នេះបើតាមការរៀបរាប់ប្រាប់ឲ្យដឹងពីនារីខាងលើ ។
បន្ទាប់មកនាងបានប្ដឹងទៅកាន់នគរបាលប៉ុស្តិ៍កំបូលឲ្យជួយអន្តរាគមន៍ ហើយនគរបាល ក៏បានហៅឲ្យជួបដោះស្រាយគ្នា ខណៈនោះនាងទាមទារប្រាក់អាហារកិច្ចទុកសម្រាលកូន និងចិញ្ចឹមកូនចំនួន៥ពាន់ដុល្លារ ។ ប៉ុន្តែប្ដីនិងគ្រួសារឲ្យតែ១,៥០០ដុល្លារ ហើយបានគំរាមនាងថា «យកមិនយកក៏ហីទៅ ចង់ទៅប្ដឹងដល់ណាក៏ប្ដឹងទៅ ទោះអ្នកកាសែតទៅជួយក៏អញមិនឲ្យចូលផ្ទះអញដែរ » ។ ពេលនោះនាងអត់ព្រមយកឡើយ ។ ដោយដោះស្រាយមិនត្រូវគ្នា នគរបាលប៉ុស្តិ៍ ក៏ប្រាប់ឲ្យនាងប្ដឹងទៅសាលាសង្កាត់កំបូលវិញ បន្ទាប់មកសាលាសង្កាត់បានធ្វើលិខិតអញ្ជើញប្ដីនាងឲ្យចូលដោះស្រាយនៅថ្ងៃទី៨ ខែឧសភា ។ ប៉ុន្តែប្ដីនាងគេចរហូតដល់ថ្ងៃទី១២ ខែឧសភានេះទើបចូលដោះស្រាយ និងបង់ប្រាក់ឲ្យនារីរងគ្រោះតែ១,៥០០ដុល្លារដដែលដូចមុនដែរ ហើយដោយខ្ជិលវែងឆ្ងាយតទៅទៀត ទើបនារីរងគ្រោះនិងក្រុមគ្រួសារព្រមទទួលយកបញ្ចប់រឿង ហើយក្រុមគ្រួសាររបស់នាង ក៏យកនាងត្រលប់ទៅផ្ទះវិញ ព្រោះនាងគ្មានកន្លែងស្នាក់នៅ ហើយចាញ់កូនមានអាការៈវិលមុខ ក្អួតចង្អោរទៀតផង មិនអាចបន្តធ្វើការបានឡើយ ៕
ចែករំលែកព័តមាននេះ