ADផ្ទាំងផ្សព្វផ្សាយពាណិជ្ជកម្ម

បែកធ្លាយ ! រឿងលោកស្រីមេឃុំសំបួរ ដើរដាក់សំណើដេញថ្លៃ ធ្វើឱ្យក្រុមហ៊ុនដទៃទៀតហួសចិត្ត

3 ម៉ោង មុន

ស្វាយរៀង
១០ ខែ ឧសភា ឆ្នាំ ២០២៦ ម៉ោង ១៤:៣៣

ខេត្តស្វាយរៀង ៖ មហាជនខកចិត្តយ៉ាងខ្លាំង ដោយឃើញលោកស្រីមេឃុំសំបួរ ស្រុកស្វាយទាប បានកាន់សំណើរទៅដាក់ដេញថ្លៃគម្រោងកែលម្អផ្លូវដីក្រាលបេតុងអាម៉េ ១ខ្សែនៅឃុំពពែត ហើយជាលទ្ធផលលោកស្រីមេឃុំសំបួរទទួលបានគម្រោងយកទៅអនុវត្តបង្កឲ្យក្រុមហ៊ុនដែលមកចូលរួមដាក់សំណើរដេញថ្លៃហួសចិត្ត ហើយផ្តល់ព័ត៌មានឲ្យអ្នកសារព័ត៌មានជួយផ្សាយដែលលោកស្រីមេឃុំសំបួរ បើកក្រុមហ៊ុនធ្វើអាជីវកម្មខុសប្រកតីមិនគួរអាជ្ញាធរស្រុកស្វាយទាបមើលរំលង…

លោក កុយ សារ៉េន ស្មៀនឃុំពពែត បានប្រាប់អ្នកសារព័ត៌មានយើងថា កាលពីព្រឹកថ្ងៃទី ៨ ឧសភា ឆ្នាំ ២០២៦ នៅសាលាឃុំពពែត ស្រុកស្វាយទាបបានរៀបចំដាក់គម្រោងដេញថ្លៃកែលម្អផ្លូវដីក្រាលបេតុងអាម៉េ ០១ខ្សែ ប្រវែង ២៦០ម៉ែត្រ ទទឹង ០៥ម៉ែត្រ កម្រាស់ ០,១៥ម៉ែត្រ ធ្វើស្លាកសញ្ញាគម្រោងថែទាំ ០៦ ខែ ០១ ។ តម្លៃប៉ាន់ស្មាន ១៤២,៨៦១,០០០រៀល មានក្រុមហ៊ុនចំនួន ០៦ ក្រុមហ៊ុនបានចូលរួមដាក់សំណើរដេញថ្លៃ ជាជលទ្ធផលបានទៅលើលោកស្រី គង់ សាផាន (មេឃុំសំបួរ) ក្រុមហ៊ុន សែម សូលីណាឌីហ្សាញខន់ស្ត្រាក់សិនឯ.ក ដាក់តម្លៃ ៧០,៤៦០,០០០រៀល តម្លៃទាបអាចទទួលយកបាន (ចុះតម្លៃទាបក្រោម ៥០%) ។

មហាជនបានលើកឡើងទៀតថា ក្នុងឆ្នាំ ២០២៦ នេះគេសង្កេតឃើញថា មានមន្ត្រីរាជការ ក្រុមប្រឹក្សាឃុំ មានឈ្មោះជាតំណាងក្រុមហ៊ុន ដើរដាក់សំណើរដេញថ្លៃ ស្ទើគ្រប់គម្រោង ក្នុងខេត្តស្វាយរៀង ដូចជាលោកស្រីមេឃុំសំបួរ បានកាន់សំណើរដើរដាក់ដេញថ្លៃគម្រោង យ៉ាងរលូន គ្មានខ្វល់ពីការងារផ្តល់សេវាជូនប្រជាពលរដ្ឋទេ ហើយលោកអភិបាលស្រុកស្វាយទាប មន្ត្រីលទ្ធកម្មស្រុកខេត្តក៏គ្មានចំណាត់ការអ្វីដែរ ។

ទាក់ទិនករណីនេះដែរ លោកស្រី គង់ សាផាន មេឃុំសំបួរ ដែលធ្វើជាតំណាងឲ្យក្រុមហ៊ុនសែមសូលីណាឌីហ្សាញខន់ស្ត្រាក់សិនឯ.ក បានឆ្លើយបំភ្លឺថា លោកស្រី មកដាក់សំណើរដេញថ្លៃជំនួសឲ្យក្រុមហ៊ុនក្មួយ មិនដឹងថា ការធ្វើនេះខុស ឬត្រូវទេ ។ ចំណែកមន្ត្រីជំនាញ ផ្នែកលទ្ធកម្មម្នាក់សុំមិនបញ្ចេញឈ្មោះបានបញ្ជាក់ នីតិវិធីនៃការដាក់សំណើរដេញថ្លៃគឺ បុគ្គលដែលមកជាតំណាងឲ្យក្រុមហ៊ុន ដើម្បីដាក់សំណើរដេញថ្លៃគឺត្រូវមានលិខិតស្នើសុំពីក្រុមហ៊ុន សាមី ដោយភ្ជាប់មកជាមួយនូវឈ្មោះបុគ្គលជាអ្នកតំណាង និងអត្តសញ្ញាណប័ណ្ណសញ្ញាតិខ្មែរ ១សន្លឹក ទើបមានសិទ្ធិជាតំណងចូលដាក់សំណើដេញថ្លៃ ហើយខណៈដាក់សំណើរដេញថ្លៃ រួចពេលបើកស្រោមសំបុត្រសំណើ ក្រុមការងារ ម្ចាស់គម្រោង មន្ត្រីលទ្ធកម្ម ពិនិត្យស្រោមសំបុត្រ មើលឈ្មោះអ្នកជាតំណាងត្រឹមត្រូវតាមការដាក់បុគ្គលជាតំណាងដែរឬទេ បើខុសប្រកតីឬមិនគ្រប់តាមលក្ខខណ្ឌនៃការដេញថ្លៃ គឺក្រុមការងារម្ចាស់គម្រោងមិនប្រគល់គម្រោងឲ្យទៅក្រុមហ៊ុននោះទទួលការទេ ។ ហើយចំពោះមានបុគ្គលដែលមកធ្វើជាតំណាងមកដាក់ដេញថ្លៃនោះ ក្រុមហ៊ុនផ្សេងគេស្គាល់ថា ជាមន្ត្រី គឺខុសប្រកតីអាចជំទាស់បាន។

ទាក់ទិនករណីនេះដែរ មិនអាចរកការបំភ្លីពីលោកអភិបាលស្រុកស្វាយទាបបានទេរហូតមកដល់រសៀលថ្ងៃទី ១០ ឧសភា ២០២៦ នេះ ។ ចំណែកមន្ត្រីលទ្ធកម្មស្រុកស្វាយទាបក៏មិនអាចរកការបំភ្លឺបានដែរ ។ ហើយអ្វីដែលមហាជនហួសចិត្តនោះគឺថ្ងៃបើកគម្រោងដេញថ្លៃគឺគេឃើញវត្តមានលោកមន្ត្រីលទ្ធកម្មស្រុកស្វាយទាប លោកអភិបាលរងស្រុកស្វាយទាប ១រូបធ្វើជាអធិបតីក្នុងពិធីដាក់សំណើរដេញថ្លៃនោះ តើលោកមន្ត្រីលទ្ធកម្មស្រុកស្វាយទាប និងលោកអភិបាលរងស្រុកស្វាយទាបមិនស្គាល់លោកស្រី គង់ សាផាន មេឃុំសំបួរឬ ? ទើបដំណើរការដេញថ្លៃរលូនបែបនេះ ៕

ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព