ខេត្តបាត់ដំបង ៖ បុរសម្នាក់ត្រូវរន្ទះបាញ់ស្លាប់នៅក្នុងរោងចាំស្រែមួយកន្លែង ក្នុងភូមិកំប៉ូវ ឃុំភ្នំសំពៅ ស្រុកបាណន់ ដោយពុំមាននរណាបានដឹង លុះដល់ព្រឹកថ្ងៃទី ០៩ ឧសភា…
ខេត្តបាត់ដំបង ៖ បុរសម្នាក់ត្រូវរន្ទះបាញ់ស្លាប់នៅក្នុងរោងចាំស្រែមួយកន្លែង ក្នុងភូមិកំប៉ូវ ឃុំភ្នំសំពៅ ស្រុកបាណន់ ដោយពុំមាននរណាបានដឹង លុះដល់ព្រឹកថ្ងៃទី ០៩ ឧសភា ទើបម្ចាស់រោងប្រទះឃើញសាកសព ហើយក៏រាយការណ៏ប្រាប់សមត្ថកិច្ច ដើម្បីចុះត្រូតពិនិត្យ។
ជនរងគ្រោះឈ្មោះ លឿម ភាព ភេទប្រុសអាយុ៤៩ឆ្នាំ នៅភូមិ ឃុំកើតហេតុ។
នាយប៉ុស្តិ៍រដ្ឋបាល ស្ដីទី លោក ម៉ី រតនា បាននិយាយថា បើតាមការពិនិត្យ និង យោងតាមការបំភ្លឺពីអ្នកភូមិផង គឺ ជនរងគ្រោះត្រូវរន្ទះបាញ់ស្លាប់តាំងល្ងាចថ្ងៃទី ០៨ ឧសភា ពេលគាត់ជ្រកក្នុងរោងចាំស្រែខាងលើ និង ស្របពេលនោះមានភ្លៀង និង ផ្ទគររន្ទះយ៉ាងខ្លាំងផង។
លោកបានបញ្ជាក់ថា ជនរងគ្រោះដេកស្លាប់ក្នុងរោងចាំស្រែរបស់ឈ្មោះ ជួប អៀប ភេទស្រីអាយុ៦៦ឆ្នាំ។ គេឃើញដំបូលរោងប្រក់ស័ង្កសីបានធ្លុះធ្លាយ ហើយសរសរោងមានស្នាមប្រេះបែករយះ ដោយសារត្រូវរន្ទះបាញ់ផង។ តាមការបំភ្លឺពីម្ចាស់រោង ដែលបានបញ្ជាក់ប្រាប់សមត្ថកិច្ចថា គាត់បានប្រទះឃើញសាកសពជនរងគ្រោះ ពេលគាត់ទៅស្រែ ហើយដើរចូលទៅក្នុងរោង។
គាត់ឃើញជនរងគ្រោះ ដេកស្លាប់នៅក្នុងរោង។ ឃើញដំបូលរោងស័ង្កសីរយះធ្លុះធ្លាយ ហើយឈើធ្នឹមខាងលើរយះប្រេះបែក ដែលគាត់សង្ស័យត្រូវរន្ទះបាញ់។ ព្រោះកាលពីរសៀលថ្ងៃទី ០៨ ឧសភា មានភ្លៀងធ្លាក់ខ្លាំង លាយឡំជាមួយផ្គររន្ទះ និង ខ្យល់កន្ត្រាក់ផង។ គាត់បញ្ជាក់ប្រាប់សមត្ថកិច្ចថា ដំបូលរោងចាំស្រែគាត់ គ្មានស្នាមធ្លុះធ្លាយ ឬ បាក់បែកសរសរឬធ្នឹមទេ តែពេលនេះត្រូវរន្ទះបាញ់ធ្វើឲកយខូចខាត ហើយត្រូវជនរងគ្រោះដែលជ្រកក្នុងរោងបណ្ដាលឲ្យស្លាប់ទៀត។
សមត្ថកិច្ចដែលចុះពិនិត្យទីតាំងកើតហេតុ ក៏បានបញ្ជាក់ដែរថា បើតាមពិនិត្យលើស្លាកស្នាម និង ស្ថានភាពជនរងគ្រោះ ពិតជាស្លាប់ដោយសារបាតុភូតធម្មជាតិ(រន្ទះបាញ់)មែន នៅពេលគាត់កំពុងជ្រកភ្លៀងនៅក្នុងរោងចាំស្រែនោះ៕
ចែករំលែកព័តមាននេះ