ជប៉ុន និងវៀតណាម ព្រមព្រៀងគ្នាជំរុញពាណិជ្ជកម្មទ្វេភាគីឱ្យដល់ ៦០ពាន់លានដុល្លារ នៅឆ្នាំ២០៣០
ប្រទេសវៀតណាម ៖ ប្រទេសជប៉ុន និងវៀតណាម កាលពីថ្ងៃទី២ ខែឧសភា ឆ្នាំ២០២៦ បានព្រមព្រៀងគ្នា ដើម្បីជំរុញពាណិជ្ជកម្មទ្វេភាគីដល់ ៦០…
ប្រទេសវៀតណាម ៖ ប្រទេសជប៉ុន និងវៀតណាម កាលពីថ្ងៃទី២ ខែឧសភា ឆ្នាំ២០២៦ បានព្រមព្រៀងគ្នា ដើម្បីជំរុញពាណិជ្ជកម្មទ្វេភាគីដល់ ៦០ ពាន់លានដុល្លារអាមេរិក នៅឆ្នាំ ២០៣០ ខណៈដែលទីក្រុងតូក្យូ កំពុងស្វែងរកការពង្រឹងខ្សែសង្វាក់ផ្គត់ផ្គង់ធនធានសំខាន់ៗ អំឡុងពេលជម្លោះការទូតជាមួយប្រទេសចិន និងវិបត្តិនៅតំបន់មជ្ឈិមបូព៌ា។ នេះបើតាមប្រភពពីទីភ្នាក់ងារសារព័ត៌មាន Anadolu របស់តួកគី និងប្រភពផ្សេងទៀតបានចេញផ្សាយ។
យោងតាមប្រភពពីសារព័ត៌មានវៀតណាម (Vietnam News) បានរាយការណ៍ថា ភាគីទាំងពីរក៏បានព្រមព្រៀងគ្នា ជំរុញការវិនិយោគជប៉ុននៅវៀតណាមលើទឹកប្រាក់ចំនួន ៥ ពាន់លានដុល្លារក្នុង១ឆ្នាំ ឱ្យបានឆាប់តាមដែលអាចធ្វើទៅបាន ដោយលើកទឹកចិត្តសហគ្រាសជប៉ុនឱ្យវិនិយោគលើគម្រោងបច្ចេកវិទ្យាកម្រិតខ្ពស់ជាមួយការផ្ទេរបច្ចេកវិទ្យា និងគាំទ្រដល់អាជីវកម្មវៀតណាមដែលវិនិយោគនៅជប៉ុនផងដែរ។
កិច្ចព្រមព្រៀងនេះសម្រេចបាន អំឡុងកិច្ចប្រជុំកំពូលរវាងនាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) និងនាយករដ្ឋមន្ត្រីវៀតណាម ឡេ មិញ ហ៊ុង (Le Minh Hung) នៅទីក្រុងហាណូយ។ នាយករដ្ឋមន្ត្រីទាំងពីរក៏បានចុះហត្ថលេខាលើឯកសារសហប្រតិបត្តិការទ្វេភាគីចំនួន ៦ មុនពេលធ្វើសន្និសីទសារព័ត៌មានរួមគ្នា បន្ទាប់ពីកិច្ចប្រជុំកំពូល។
យោងតាមសារព័ត៌មានជប៉ុន Kyodo ក៏បានរាយការណ៍ថា ទាក់ទងនឹងវិស័យអាទិភាពសម្រាប់កិច្ចសហប្រតិបត្តិការទ្វេភាគី មេដឹកនាំទាំងពីរក៏បានឯកភាពគ្នាលើការពិភាក្សាបន្ថែមទៀត ឆ្ពោះទៅរកការកសាងខ្សែសង្វាក់ផ្គត់ផ្គង់ ដែលអាចទ្រាំទ្របានសម្រាប់ធនធានរ៉ែសំខាន់ៗ និងធ្វើការដើម្បីគាំទ្រដល់ការផ្គត់ផ្គង់ប្រេងសម្រាប់រោងចក្រចម្រាញ់ប្រេងធំជាងគេបំផុតមួយរបស់ប្រទេសវៀតណាម ដែលមានទីតាំងស្ថិតនៅចម្ងាយជាង ២០០ គីឡូម៉ែត្រពីទីក្រុងហាណូយ រោងចក្រចម្រាញ់ប្រេង និងប្រេងឥន្ធនៈ Nghi Son គឺជាក្រុមហ៊ុនរួមគ្នាដែលពាក់ព័ន្ធនឹងដៃគូវៀតណាម ជប៉ុន និងគុយវ៉ែត។
ការវិវត្តនេះ គឺជាផ្នែកមួយនៃកិច្ចខិតខំប្រឹងប្រែងរបស់ជប៉ុនក្នុងការប្រើប្រាស់កញ្ចប់ថវិកា ១០ ពាន់លានដុល្លារ ដើម្បីជួយដល់បណ្តាប្រទេសក្នុងតំបន់អាស៊ីផ្សេងទៀត ទប់ទល់នឹងកង្វះខាតការផ្គត់ផ្គង់ប្រេងឥន្ធនៈ និងការរំខានដល់ខ្សែសង្វាក់ផ្គត់ផ្គង់ ចំពេលមានការបិទច្រកសមុទ្រហ័រមូស (Hormuz) ដែលជាសរសៃឈាមសំខាន់សម្រាប់ពាណិជ្ជកម្មថាមពលសកល។
ទន្ទឹមជាមួយគ្នានោះ ភាគីទាំងពីរក៏បានលើកឡើងពីសក្តានុពលនៃកិច្ចសហប្រតិបត្តិការថាមពលនុយក្លេអ៊ែរនៅដើមឆ្នាំ ២០៤០ ផងដែរ។ មិនតែប៉ុណ្ណោះ ជប៉ុនក៏មានទំនោរក្នុងការរួមបញ្ចូលវៀតណាមនៅក្នុងក្របខ័ណ្ឌជំនួយសន្តិសុខផ្លូវការរបស់ខ្លួន ដែលបានចាប់ផ្តើមនៅឆ្នាំ ២០២៣ ដើម្បីផ្តល់សព្វាវុធ និងបរិក្ខារការពារជាតិដល់បណ្តាប្រទេសដែល មានទស្សនវិស័យដូចគ្នា៕
ចែករំលែកព័តមាននេះ