រាជធានីភ្នំពេញ ៖ រហូតមកដល់ពេលនេះ ស្ថានភាពជំងឺតារាសម្តែងនាយ តាក់ ស៊ី វិវត្តន៍កាន់តែធ្ងន់ធ្ងរឡើង រហូតឈានដល់កាត់ម្រាមដៃជើងអស់មួយចំនួន ដើម្បីបន្តការព្យាបាលជំងឺទឹកនោមផ្អែមដែលបានញាំញីដល់តារារូបនេះអស់ជាច្រើនឆ្នាំ ។…
រាជធានីភ្នំពេញ ៖ រហូតមកដល់ពេលនេះ ស្ថានភាពជំងឺតារាសម្តែងនាយ តាក់ ស៊ី វិវត្តន៍កាន់តែធ្ងន់ធ្ងរឡើង រហូតឈានដល់កាត់ម្រាមដៃជើងអស់មួយចំនួន ដើម្បីបន្តការព្យាបាលជំងឺទឹកនោមផ្អែមដែលបានញាំញីដល់តារារូបនេះអស់ជាច្រើនឆ្នាំ ។
តារាកំប្លែងនាយ តាក់ ស៊ី ត្រូវបានក្រុមគ្រួសារបញ្ជូនមកព្យាបាលនៅក្នុងមន្ទីរពេទ្យអស់ជាច្រើនថ្ងៃ ដោយសារជំងឺទឹកនោមផ្អែមរបស់លោកធ្វើទុក្ខយ៉ាងខ្លាំង ក្នុងពេលដែលការព្យាបាលនេះ ក្រុមគ្រូពេទ្យតម្រូវឲ្យលោកកាត់ម្រាមដៃ និងជើងមួយចំនួនចោលដោយសារដំបៅស៊ីរាលមិនអាចទុកបាន ។
យ៉ាងណា ក្រោយសម្រាកព្យាបាលនៅមន្ទីរពេទ្យមួយរយៈនោះ បច្ចុប្បន្ន រូបលោកបាន
ត្រឡប់មកសម្រាកព្យាបាលជំងឺនៅឯគេហដ្ឋានវិញ ប៉ុន្តែនៅតែស្ថិតនៅក្នុងការតាមដាននៃការវិវត្តន៍ជំងឺរបស់លោកពីក្រុមគ្រូពេទ្យនៅឡើយ ។
ពាក់ព័ន្ធស្ថានភាពជំងឺនាពេលនេះ តារាកំប្លែងនាយ តាក់ ស៊ី បានអះអាងប្រាប់កោះសន្តិភាពតាមសារអេឡិចត្រូនិចថា ជំងឺរបស់លោកគឺតម្រូវឲ្យកាត់ម្រាមដៃ និងម្រាមជើងបន្ថែមទាំងសងខាង ដោយសារតែដំបៅស៊ីរាលមិនអាចទុកបានឡើយ ។
លោកថា ក្រុមគ្រូពេទ្យបានប្រាប់លោកពីស្ថានភាពជំងឺ គឺដោយសារយើងស្ទះសសៃឈាមមិនអាចរត់ដល់ចុងដៃចុងជើង បណ្តាលឲ្យស្ពឹក ជាហេតុធ្វើឲ្យមានដំបៅ ហើយក្លាយរាលដាល ទើបមិនអាចទុកបានត្រូវតែកាត់ ។
លោកបញ្ជាក់ថា បច្ចុប្បន្ន លោកបានកាត់ម្រាមដៃឆ្វេង២ម្រាម ដៃស្តាំ២ម្រាម ជើងស្តាំ២ម្រាម និងជើងឆ្វេង១ម្រាម ហើយមុខរបួសអាចជាសះស្បើយ ឬមិនអាចគឺអាស្រ័យលើកម្រិតជាតិស្ករឡើង ឬចុះ ខណៈពេលដែលស្ថានភាពនៅតែមិនធូរនោះ លោកអាចនឹងប្រឈមការកាត់បន្ថែមទៀត ។
នាយ តាក់ ស៊ី បានបន្ថែមទៀតថា ដោយសារស្ថានភាពជំងឺរបស់លោកកំពុងមានស្ថានភាពធ្ងន់ធ្ងរ និងរ៉ាំរ៉ៃនោះ លោកបានសម្រេចលក់របស់ទ្រព្យដែលមានអស់ជាច្រើន ដើម្បីយកថវិកាមកសម្រួលការព្យាបាល និងផ្គត់ផ្គង់ជីវភាពប្រចាំថ្ងៃ ព្រោះបច្ចុប្បន្ន លោកមិនអាចសម្តែងបានទៀតឡើយ ។
លោកបញ្ជាក់ថា គិតមកដល់ពេលនេះ លោកបានចំណាយការព្យាបាលអស់ប្រមាណជិតមួយម៉ឺនដុល្លារហើយ ក្នុងពេលដែលលោកនៅតែស៊ូទ្រាំបន្តការព្យាបាលជំងឺទាំងនៅមន្ទីរពេទ្យ និងនៅផ្ទះ ។
គួរបញ្ជាក់ថា តារាកំប្លែងនាយតាក់ស៊ី បានផ្ទុកនូវជំងឺទឹកនោមផ្អែមនេះជាង១០ឆ្នាំមកហើយ ខណៈពេលកន្លងមក ដោយសារតែជំងឺមួយនេះបានរួមរឹត និងធ្វើទុក្ខដល់រូបលោកយ៉ាងខ្លាំងរហូតធ្វើឲ្យត្រូវបង្ខំចិត្តផ្អាកការសម្តែងសម្រាប់យកពេលព្យាបាលជំងឺនៅផ្ទះ ៕
ចែករំលែកព័តមាននេះ