ឯកអគ្គរដ្ឋទូតកូរ៉េប្រចាំកម្ពុជាបង្ហាញការគាំទ្រការបោសសម្អាត Online Scams
- បន្ទាយមានជ័យ
ខេត្តបន្ទាយមានជ័យ ៖ ឯកអគ្គរដ្ឋទូតនៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា
ឯកឧត្តម គីម ឆាងយ៉ុង (KIM CHANGYONG) បានបង្ហាញនូវការគាំទ្រចំពោះយុទ្ធនាការបោសសម្អាតបទល្មើសឆបោកតាមប្រព័ន្ធបច្ចេកវិទ្យា(Online Scams) ក្នុងប្រទេសកម្ពុជា ពិសេស នៅខេត្តបន្ទាយមានជ័យ និងគាំទ្ររាល់កិច្ចសហការក្នុងការបង្ក្រាបបទល្មើសនេះ ដែលជាបញ្ហាស្មុគស្មាញរីករាលដាលនៅក្នុងទូទាំងពិភពលោក ។
ឯកឧត្តមឯកអគ្គរដ្ឋទូត គីម ឆាងយ៉ុង បានថ្លែងការគាំទ្របែបនេះ ក្នុងពេលចូលជួបសម្តែងការគួរសមជាមួយនឹងឯកឧត្តម អ៊ុំ រាត្រី អភិបាលខេត្តបន្ទាយមានជ័យ ពិភាក្សាលើប្រធានបទ បទល្មើសបោកប្រាស់ និងស្ថានភាពព្រំដែន នៅក្នុងភូមិសាស្ត្រខេត្ត កាលពីព្រឹកថ្ងទី២៨ ខែមេសា ឆ្នាំ២០២៦ កន្លងទៅ នៅសាលប្រជុំសាលាខេត្ត ។
ក្នុងជំនួបនោះ ឯកឧត្ដម អ៊ុំ រាត្រី បានបញ្ជាក់ថា អនុវត្តនូវបញ្ជារបស់ប្រមុខរាជរដ្ឋាភិបាលកម្ពុជា រដ្ឋបាលខេត្តបាននិងកំពុងខិតខំយកចិត្តទុកដាក់យ៉ាងខ្លាំង ដោយបានដាក់ចេញផែនការសកម្មភាព និងចាត់វិធានការជំរុញអនុវត្តយ៉ាងសកម្មក្នុងការបង្ក្រាបបទល្មើសឆបោកតាមប្រព័ន្ធបច្ចេកវិទ្យា ចុះត្រួតពិនិត្យ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា(Online Scams) ។
ដោយមានការសម្របសម្រួលនីតិវិធីពីព្រះរាជអាជ្ញារងនៃអយ្យការអមសាលាដំបូងខេត្ត សមត្ថកិច្ចពាក់ព័ន្ធបានចុះពិនិត្យទីតាំងសង្ស័យមានជនបរទេសរស់នៅប្រមូលផ្ដុំ លួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា និងបទល្មើសផ្សេងៗ នៅក្នុងភូមិសាស្ត្រសង្ស័យ និងបានចុះប្រតិបត្តិការបង្ក្រាបជាបន្តបន្ទាប់ ។
ឯកឧត្តមឯកអគ្គរដ្ឋទូត បានបង្ហាញនូវការកោតសរសើរប្រមុខរាជរដ្ឋាភិបាលកម្ពុជា សម្តេច
មហាវរបធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញនូវផែនការបោសសម្អាតបទល្មើសឆបោកតាមប្រព័ន្ធបច្ចេកវិទ្យា(Online Scams) ដែលកំពុងអនុវត្តទទួលបានជោគជ័យ និងបានធ្វើការបង្ក្រាបឧក្រិដ្ឋជនឆបោកតាមប្រព័ន្ធបច្ចេកវិទ្យាជាបន្តបន្ទាប់ ។
ជាមួយគ្នានេះ ឯកឧត្តមឯកអគ្គរដ្ឋទូត ក៏បានអរគុណអាជ្ញាធរខេត្តបន្ទាយមានជ័យ ពិសេសឯកឧត្តម អ៊ុំ រាត្រី អភិបាលខេត្ត ដែលបានយកចិត្តទុកដាក់ចំពោះបងប្អូនប្រជាជនកូរ៉េដែលកំពុងរស់នៅ និងធ្វើការងារនៅក្នុងខេត្តបន្ទាយមានជ័យ ក្នុងការការពារសុខសុវត្ថិភាពជាក់ស្តែង ក្នុងកំឡុងពេលមានជម្លោះតាមបន្ទាត់ព្រំដែន ។ ពិសេសអាជ្ញាធរខេត្តបន្ទាយមានជ័យ បានយកចិត្តទុកដាក់ទៅលើសុខទុក្ខរបស់បងប្អូនប្រជាពលរដ្ឋភៀសសឹក រួមទាំងកុមារភៀសសឹក ក៏ដូចជាជនបរទេស ជនជាតិកូរ៉េ ដែលរស់នៅក្នុងខេត្ត ទទួលបានការការពារសុវត្ថិភាពយ៉ាងល្អប្រសើរ ៕
ចែករំលែកព័តមាននេះ