ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានចេញសេចក្តីជូនដំណឹងលេខ ០៩៣/២៦ សជណ ចុះថ្ងៃទី២៤ មេសា ឆ្នាំ២០២៦ ស្តីពីការកំណត់រដូវបិទនេសាទ និងការដាក់ចេញនូវវិធានការការពារត្រីមេពូជក្នុងរដូវពងកូន…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានចេញសេចក្តីជូនដំណឹងលេខ ០៩៣/២៦ សជណ ចុះថ្ងៃទី២៤ មេសា ឆ្នាំ២០២៦ ស្តីពីការកំណត់រដូវបិទនេសាទ និងការដាក់ចេញនូវវិធានការការពារត្រីមេពូជក្នុងរដូវពងកូន សម្រាប់តំបន់ទន្លេមេគង្គក្នុងភូមិសាស្ត្រខេត្តស្ទឹងត្រែង ។
យោងតាមសេចក្តីជូនដំណឹងរដូវបិទនេសាទក្នុងដែនទឹកនៃខេត្តស្ទឹងត្រែង នឹងត្រូវអនុវត្តចាប់ពីថ្ងៃទី០១ ខែឧសភា ឆ្នាំ២០២៦ រហូតដល់ថ្ងៃទី៣០ ខែកញ្ញា ឆ្នាំ២០២៦។ក្នុងអំឡុងពេលនេះ រដ្ឋបាលខេត្តហាមឃាត់ដាច់ខាត ការនេសាទដោយប្រើឧបករណ៍មងគ្រប់ប្រភេទ ដើម្បីផ្តល់ឱកាសដល់ត្រីមេពូជបង្កកំណើត។ទោះជាយ៉ាងណា បងប្អូនប្រជានេសាទនៅតែអាចធ្វើការនេសាទជាលក្ខណៈគ្រួសារ ដើម្បីផ្គត់ផ្គង់ជីវភាពប្រចាំថ្ងៃ ដោយប្រើប្រាស់ឧបករណ៍ដែលច្បាប់អនុញ្ញាត រួមមាន៖សៃយ៉ឺន, លប, សំណាញ់, អង្រុត, ចាន់, តុម, ទ្រូ, កញ្ច្រែងដងត្រី និងសន្ទូចផ្លែមួយ។
រដ្ឋបាលខេត្ត និងខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទ បានសង្កត់ធ្ងន់ថា ត្រូវបញ្ឈប់ជាបន្ទាន់នូវរាល់សកម្មភាពនេសាទខុសច្បាប់ ដូចជា៖ការប្រើប្រាស់ឧបករណ៍ឆក់គ្រប់ប្រភេទ។ ការប្រើសារធាតុពុល និងគ្រឿងផ្ទុះ។ល។រាល់ការបំពាននឹងត្រូវប្រឈមមុខនឹងការផ្ដន្ទាទោសតាមច្បាប់ជាធរមាន ដោយសារឧបករណ៍ទាំងនេះបង្កវិនាសធ្ងន់ធ្ងរដល់ធនធានមច្ឆជាតិ ។
លោក ស្រី សំវិចិត្រ នាយខណ្ឌរដ្ឋបាលជលផលខេត្តស្ទឹងត្រែង បានផ្ដល់ទិន្នន័យថា ៖ក្នុងរយៈពេល ៤ខែដើមឆ្នាំ២០២៦ នេះ ផលនេសាទដែលប្រមូលបានពីធម្មជាតិមានបរិមាណសរុប ១,៨៥០តោន។ជាមួយគ្នានេះ ក្នុងកិច្ចប្រតិបត្តិការការពារធនធានជលផល កម្លាំងជំនាញសហការជាមួយសហគមន៍នេសាទ ឆ្មាំអភិរក្ស និងបណ្តាអង្គភាពមានសមត្ថកិច្ចពាក់ព័ន្ធសម្រេចបាននូវលទ្ធផលដូចខាងក្រោម៖បង្ក្រាប និងដកហូតមង សរុបប្រវែង ១៨,៦៦៥ ម៉ែត្រ ដែលលួចនេសាទក្នុងតំបន់ហាមឃាត់។ដកហូតសន្ទូចរនងចំនួន ១៥,៧៤៨ ផ្លែ។ ទូក-ម៉ាស៊ីន ០១គ្រឿង និងទ្រុងប្រោសត្រី ០១គ្រឿង។
លោកបន្ថែមថា៖មន្ត្រីជំនាញក៏បាន ធ្វើកិច្ចសន្យាជាមួយប្រជានេសាទចំនួន ៣០នាក់ និងចុះផ្សព្វផ្សាយអប់រំណែនាំដល់ពលរដ្ឋបានចំនួន ៣៥នាក់ផងដែរ ។ ជាមួយគ្នានេះអាជ្ញាធរខេត្ត ក៏បានអំពាវនាវដល់សាធារណជន និងបងប្អូនប្រជានេសាទទាំងអស់ ចូលរួមគោរពតាមសេចក្តីជូនដំណឹងនេះឱ្យមានប្រសិទ្ធភាព ដើម្បីធានានិរន្តរភាពត្រីមេពូជសម្រាប់កូនចៅជំនាន់ក្រោយ ៕
ចែករំលែកព័តមាននេះ