រាជធានីភ្នំពេញ ៖ បញ្ហាសន្តិសុខសកល ជាពិសេសការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងឧក្រិដ្ឋកម្មឆ្លងដែន បានក្លាយជាប្រធានបទដ៏សំខាន់ក្នុងជំនួបសម្តែងការគួរសមរវាង លោកជំទាវ យ៉ិនទៀង ពុទ្ធិរស្មី រដ្ឋលេខាធិការក្រសួងការបរទេស…
រាជធានីភ្នំពេញ ៖ បញ្ហាសន្តិសុខសកល ជាពិសេសការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងឧក្រិដ្ឋកម្មឆ្លងដែន បានក្លាយជាប្រធានបទដ៏សំខាន់ក្នុងជំនួបសម្តែងការគួរសមរវាង លោកជំទាវ យ៉ិនទៀង ពុទ្ធិរស្មី រដ្ឋលេខាធិការក្រសួងការបរទេស និងលោកជំទាវ Betty Oyella BIGOMBE ឯកអគ្គរដ្ឋទូតអ៊ូហ្កង់ដា។
ជាក់ស្តែងក្រសួងការបរទេស បានប្រកាសនាព្រឹកថ្ងៃទី២៤ ខែមេសា ឆ្នាំ២០២៦នេះថា ៖ នៅថ្ងៃទី២៣ ខែមេសា ឆ្នាំ២០២៦ តាងនាមឯកឧត្ដមឧបនាយករដ្ឋមន្ត្រីរដ្ឋមន្ត្រីការបរទេស និងសហប្រតិបត្តិការអន្តរជាតិ លោកជំទាវ យ៉ិនទៀង ពុទ្ធិរស្មី រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ បានទទួលជំនួប សម្តែងការគួរសមរបស់លោកជំទាវ Betty Oyella BIGOMBE ឯកអគ្គរដ្ឋទូតអ៊ូហ្កង់ដា ប្រចាំកម្ពុជា នៅទីស្ដីការក្រសួង ។
ក្រសួងការបរទេស បានបន្តថា ក្នុងជំនួបនេះ ភាគីទាំងពីរបានផ្លាស់ប្តូរទស្សនៈគ្នាទៅវិញទៅមក ពាក់ព័ន្ធនឹងការពង្រឹងកិច្ចសហប្រតិបត្តិការទ្វេភាគី ដើម្បីបន្តអភិវឌ្ឍចំណងមិត្តភាពឱ្យកាន់តែរីកចម្រើន ។ ភាគីទាំងពីរក៏បានពិភាក្សាអំពីអាទិភាពរួម និងស្វែងរកកិច្ចសហប្រតិបត្តិការផ្សេងៗពាក់ព័ន្ធនឹងការប្រយុទ្ធប្រឆាំងបញ្ហាឧក្រិដ្ឋកម្មឆ្លងដែន ការជួញដូរមនុស្ស ការឆបោកតាមប្រព័ន្ធបច្ចេកវិទ្យា និងបញ្ហាជម្លោះព្រំដែនរវាងកម្ពុជា និងថៃផងដែរ ។
លើសពីរនេះ លោកជំទាវរដ្ឋលេខាធិការ បានជម្រាបជូនលោកជំទាវឯកអគ្គរដ្ឋទូត អំពីនីតិវិធីដែលអាចផ្លាស់ប្តូរ ក្រោយច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យារបស់កម្ពុជាចូលជាធរមាន។
លោកជំទាវរដ្ឋលេខាធិការ បានស្នើភាគីអ៊ូហ្កង់ដា ជួយគាំទ្របេក្ខភាពរបស់កម្ពុជា ជាសមាជិកក្រុមប្រឹក្សាសេដ្ឋកិច្ច និងសង្គម (Economic and Social Council – ECOSOC) សម្រាប់អណត្តិឆ្នាំ២០២៨ ដល់២០៣០ និងជាសមាជិកគណៈកម្មាធិការអន្តររដ្ឋាភិបាល សម្រាប់ការការពារបេតិកភណ្ឌវប្បធម៌អរូបី (Intergovernmental Committee for the Safeguarding of Intangible Cultural Heritage – ICS-ICH)សម្រាប់អណត្តិឆ្នាំ២០២៦ ដល់ ២០៣០ ៕
ចែករំលែកព័តមាននេះ