រាជធានីភ្នំពេញ ៖ ទីបំផុត សាលាឧទ្ធរណ៍ភ្នំពេញ នៅថ្ងៃទី២១ ខែមេសា ឆ្នាំ២០២៦ បានចេញលិខិតជូនដំណឹងស្តីពីការប្រកាសសាលដីកា លើបណ្តឹងឧទ្ធរណ៍របស់លោក កឹម…
រាជធានីភ្នំពេញ ៖ ទីបំផុត សាលាឧទ្ធរណ៍ភ្នំពេញ នៅថ្ងៃទី២១ ខែមេសា ឆ្នាំ២០២៦ បានចេញលិខិតជូនដំណឹងស្តីពីការប្រកាសសាលដីកា លើបណ្តឹងឧទ្ធរណ៍របស់លោក កឹម សុខា ដែលប្តឹងជំទាស់ នឹងសាលក្រមរបស់សាលាដំបូងរាជធានីភ្នំពេញ បានផ្តន្ទាទោសដាក់ពន្ធនាគារកំណត់រយៈពេល២៧ឆ្នាំ ជាប់ចោទពីបទ សន្និដ្ឋិភាពជាមួយបរទេស ។
ក្នុងលិខិតជូនដំណឹងនោះ បានបញ្ជាក់ថា ក្រុមប្រឹក្សាជំនុំជម្រះទី១១ នៃសភាព្រហ្មទណ្ឌសាលាឧទ្ធរណ៍ភ្នំពេញ សូមជម្រាបជូន លោក លោកស្រី ជាមេធាវីតំណាងឲ្យដើមបណ្តឹងរដ្ឋប្បវេណី និងមេធាវីការពារសិទ្ធិឲ្យជនជាប់ចោទឈ្មោះ កឹម សុខា ឲ្យបានជ្រាបថា សំណុំរឿងព្រហ្មទណ្ឌលេខ ៥៥៦ ចុះថ្ងៃទី៥ ខែឧសភា ឆ្នាំ២០២៣ ដែលមានជនជាប់ចោទឈ្មោះ កឹម សុខា ជាប់ចោទពីបទ សន្និដ្ឋិភាព ជាមួយបរទេស ក្រុមប្រឹក្សាជំនុំជម្រះកំណត់យកថ្ងៃទី៣០ ខែមេសា ឆ្នាំ២០២៦ វេលាម៉ោង៩និង៣០នាទីព្រឹកនៅបន្ទប់សវនាការទី១ ដើម្បីប្រកាសសាលដីកា ។ អាស្រ័យដូចបានជម្រាបជូនខាងលើសូមលោក លោកស្រី ជ្រាបជាដំណឹង ។
សូមជម្រាបថា សាលាឧទ្ធរណ៍ភ្នំពេញ បានលើកពេលប្រកាសសាលដីកា ទៅថ្ងៃក្រោយដោយមិនកំណត់ លើសំណុំរឿងលោក កឹម សុខា អតីតប្រធានគណបក្សសង្គ្រោះជាតិ បន្ធាប់ពីសវនាការបើកការសាកសួរដេញដោលជាសាធារណអស់រយៈពេល២ថ្ងៃ ពីបទ”សន្និភាព ជាមួយបរទេស ឬបទ.ឃុបឃិតត្រូវរ៉ូវគ្នាជាមួយបរទេស” ។
សវនាការបានធ្វើឡើងនៅថ្ងៃទី៨ និងទី៩ ខែមេសា ឆ្នាំ២០២៦ ហើយជាថ្ងៃចុងក្រោយដែលតុលាការបានផ្តល់សិទ្ធិឲ្យលោក គឹម សុខា ធ្វើសំណូមពរទៅកាន់អង្គសវនាការ ក្នុងនោះលោក កឹម សុខា ក៏បានធ្វើសំណូមពរមាន ៣ ចំណុច ៖
ទី១.សុំឲ្យបដិសេធចោលសាលក្រមសាលាដំបូងរាជធានីភ្នំពេញ ទុកជាអសាបង់ទាំងស្រុង ។ ពីព្រោះបើតម្កល់សាលក្រមនេះ គឺមិនត្រឹមតែអយុត្តិធម៌សម្រាប់ខ្ញុំទេ គឺអយុត្តិធម៌ដល់ប្រទេសដែលរងការចោទថាត្រូវរ៉ូវជាមួយខ្ញុំ ទាំងគេមិនបានដឹងអ្វីសោះ ហើយគេជាប្រទេសមានគុណជួយខ្មែរ ។ ការបដិសេធសាលក្រម គឺដើម្បីប្រយោជន៍ប្រទេសកម្ពុជាយើងទាំងអស់គ្នា ។
ទី២.សុំមេត្តាសម្រេចឲ្យខ្ញុំរួចផុតពីបទចោទប្រកាន់ទាំងអស់ ។ ព្រោះខ្ញុំគ្មានចេតនាក្បត់ជាតិ គ្មានគប់គិតត្រូវរ៉ូវជាមួយបរទេសទេ ។ ខ្ញុំចង់ចូលរួមជួយជាតិ ចង់បង្ហាញសាមគ្គីភាពជាតិខ្មែរ ខ្ញុំស្រឡាញ់ជាតិខ្មែរ ។
ទី៣.ចំពោះមុខខ្ញុំសុំឲ្យខ្ញុំមានសេរីភាពពីពេលនេះតទៅ ។ ខ្ញុំដឹងថា ខណៈបច្ចុប្បន្ននេះ ខ្ញុំអាចជួយជាតិ ខ្ញុំអាចស្រែកឲ្យមានការគាំទ្ររាជរដ្ឋាភិបាល ក្នុងការការពារទឹកដីដែលកំពុងរងការឈ្លាន ពាន ឲ្យគេជួយខ្មែរ ជួយរាជរដ្ឋាភិបាលបាន ។
សូមជម្រាបទៀតថា កាលពីថ្ងៃទី៣ ខែមីនា ឆ្នាំ២០២៣ លោក កឹម សុខា ត្រូវបានសាលាដំបូងរាជធានីភ្នំពេញ បើកសវនាការសាកសួរដេញដោលជាបន្តបន្ទាប់ចំនួន៦៦ លើក ចាប់ពីថ្ងៃទី១៥ ខែមករា ឆ្នាំ ២០២០ រហូតដល់ថ្ងៃទី២១ ខែធ្នូ ឆ្នាំ ២០២២ និងបានសម្រេចផ្តន្ទាទោសជនជាប់ចោទ ឈ្មោះ កឹម សុខា ភេទប្រុស កើតថ្ងៃទី២៧ ខែមិថុនា ឆ្នាំ១៩៥៣ សញ្ជាតិ ខ្មែរ ដាក់ពន្ធនាគារកំណត់រយៈពេល ២៧ (ម្ភៃប្រាំពីរ) ឆ្នាំ ពីបទ “សន្និដ្ឋិភាពជាមួយបរទេស ឬបទឃុបឃិតត្រូវរ៉ូវគ្នាជាមួយបរទេស” ប្រព្រឹត្តនៅប្រទេសកម្ពុជា និងទីកន្លែងផ្សេងទៀត កាលពីអំឡុងឆ្នាំ២០១០ ដល់ថ្ងៃទី៣ ខែកញ្ញា ឆ្នាំ២០១៧ ជាបទល្មើសព្រហ្មទណ្ឌ និងត្រូវផ្តន្ទាទោស តាមបញ្ញត្តិមាត្រា៤៣៩ និងមាត្រា ៤៤៣ នៃក្រមព្រហ្មទណ្ឌ និងដកជាស្ថាពរនូវសិទ្ធិបោះឆ្នោត សិទ្ធិឈរឈ្មោះឱ្យគេបោះឆ្នោត និងសិទ្ធិធ្វើសកម្មភាពនយោបាយផ្សេងទៀត តាមបញ្ញត្តិមាត្រា៤៥០ នៃក្រមព្រហ្មទណ្ឌ ព្រមទាំងដាក់ជនជាប់ចោទឱ្យស្ថិតនៅក្រោមវិធានការត្រួតពិនិត្យតាមផ្លូវតុលាការ ។ ក្រោយពីសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសយ៉ាងដូច្នោះ លោក កឹម សុខា ពឹងពាក់មេ ធាវីសម្រេចប្តឹងឧទ្ធរណ៍តាមកំណត់ច្បាប់ ។ ហើយគិតចាប់តាំងពីឆ្នាំ២០២៤ សាលាឧទ្ធរណ៍ភ្នំពេញបានបើកសវនាការលើបណ្តឹងប្រឆាំងនឹងសាលក្រមសាលាដំបូងរាជធានីភ្នំពេញ ចំនួនជាង១០ លើក រហូតដល់ដំណាក់កាលចុងក្រោយសាលាឧទ្ធរណ៍ភ្នំពេញបានបញ្ចប់ការជំនុំជម្រះនៅថ្ងៃទី៩ ខែមេសា ឆ្នាំ២០២៦ និងលើកសាលដីកា នៅចុងខែមេសានេះ ៕
ចែករំលែកព័តមាននេះ