អន្តរជាតិ ៖ បណ្តាអ្នកជំនាញបានលើកឡើងថា ការបិទច្រកសមុទ្រហ័រមូស (Hormuz) បានជំរុញឱ្យតម្រូវការប្រេងរបស់សហរដ្ឋអាមេរិកកើនឡើងខ្ពស់។ នេះបើតាមប្រភពពី BBC បានចេញផ្សាយនៅថ្ងៃទី២២ ខែមេសា…
អន្តរជាតិ ៖ បណ្តាអ្នកជំនាញបានលើកឡើងថា ការបិទច្រកសមុទ្រហ័រមូស (Hormuz) បានជំរុញឱ្យតម្រូវការប្រេងរបស់សហរដ្ឋអាមេរិកកើនឡើងខ្ពស់។ នេះបើតាមប្រភពពី BBC បានចេញផ្សាយនៅថ្ងៃទី២២ ខែមេសា ឆ្នាំ២០២៦។
នៅក្នុងការបង្ហោះសារមួយលើបណ្តាញសង្គម Truth Social កាលពីថ្ងៃទី២០ ខែមេសា ឆ្នាំ២០២៦ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា ថ្នាក់ដឹកនាំអ៊ីរ៉ង់បានបង្ខំឱ្យកប៉ាល់រាប់រយគ្រឿងធ្វើដំណើរឆ្ពោះទៅកាន់បណ្តារដ្ឋរបស់សហរដ្ឋអាមេរិកដែលសម្បូរប្រេង ដូចជារដ្ឋតិចសាស់ (Texas), រដ្ឋល្វីស្យាណា (Louisiana) និងរដ្ឋអាឡាស្កា (Alaska)។
បើទោះជាវាមិនច្បាស់អំពីប្រភេទកប៉ាល់ដែលលោក ត្រាំ បានលើកឡើងក៏ពិតមែន ប៉ុន្តែបើតាមបណ្តាអ្នកវិភាគការដឹកជញ្ជូន និងពាណិជ្ជកម្មសកលបានប្រាប់ BBC ថា ការបិទច្រកសមុទ្រហ័រមូសដោយអ៊ីរ៉ង់ ពិតជាបានជំរុញឱ្យមានការកើនឡើងនៃតម្រូវការប្រេងឆៅរបស់សហរដ្ឋអាមេរិកប្រាកដមែន។
ច្រកហ័រមូស គឺជាចំណុចឆ្លងកាត់ដ៏សំខាន់មួយសម្រាប់ប្រេងឆៅឈូងសមុទ្រពែរ្ស ប៉ុន្តែការដឹកជញ្ជូនត្រូវបានរំខានយ៉ាងធ្ងន់ធ្ងរ ចាប់តាំងពីការចាប់ផ្តើមសង្គ្រាមសហរដ្ឋអាមេរិក និងអ៊ីស្រាអែលជាមួយអ៊ីរ៉ង់ នៅថ្ងៃទី២៨ ខែកុម្ភៈ ឆ្នាំ២០២៦។ ដូច្នេះដោយសារតែមិនអាចចូលដឹកប្រេងឆៅពីមជ្ឈិមបូព៌ាតាមរយៈច្រកហ័រមូសបាននោះ បណ្តាក្រុមហ៊ុននាំចូលត្រូវស្វែងរកប្រភពផ្គត់ផ្គង់ផ្សេងជំនួសវិញ។
យោងតាមទិន្នន័យពីក្រុមហ៊ុនវិភាគសមុទ្រ Kpler បានបង្ហាញថា កប៉ាល់ដឹកប្រេងចំនួន៧១គ្រឿង ដែលជាប្រភេទកប៉ាល់ដឹកប្រេងខា្នតយក្ស (VLCCs) កំពុងធ្វើដំណើរទៅកាន់សហរដ្ឋអាមេរិក បើធៀបទៅនឹង ២៧ គ្រឿងជាមធ្យម កាលពីឆ្នាំមុន។
លោក David Haydon ប្រធានផ្នែកកំណត់តម្លៃដឹកប្រេងឆៅរបស់សហរដ្ឋអាមេរិក នៅក្រុមហ៊ុន Argus Media ដែលជាក្រុមហ៊ុនតាមដានទីផ្សារសកលមានមូលដ្ឋាននៅចក្រភពអង់គ្លេសបានឱ្យដឹងថា អ្នកទិញមកពីអឺរ៉ុប និងអាស៊ី បានមើលឃើញថា ការដឹកប្រេងចេញពីមហាសមុទ្រអាត្លង់ទិក រួមទាំងឆ្នេរសមុទ្រនៃឈូងសមុទ្រអាមេរិក (ឬឈូងសមុទ្រម៉ិកស៊ិក) ជាដំណោះស្រាយដែលអាចធ្វើទៅបាន និងសម្បូរបែប ដើម្បីបំពេញចន្លោះប្រហោងការផ្គត់ផ្គង់។
តាមរយៈនេះ ហាក់ដូចជាកំពុងជំរុញការកើនឡើងនៃការនាំចេញប្រេងឆៅរបស់សហរដ្ឋអាមេរិក។ ទន្ទឹមជាមួយគ្នានោះ ក្រុមហ៊ុនប្រឹក្សាយោបល់ឯករាជ្យផ្នែកស្រាវជ្រាវសមុទ្រ Drewry បានបង្ហាញថា នៅក្នុងសប្តាហ៍ដែលបិទបញ្ចប់នៅថ្ងៃទី១០ ខែមេសា កន្លងទៅ ការដឹកជញ្ជូនប្រេងបានឈានដល់ ៥,២ លានបារ៉ែលក្នុង១ថ្ងៃ ដែលជាកម្រិតខ្ពស់បំផុតក្នុងរយៈពេល៧ខែ៕
ចែករំលែកព័តមាននេះ