រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញ កាលពីថ្ងៃទី ២១ ខែមេសា ឆ្នាំ ២០២៦ បានបន្តប្រតិបត្តិការចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (…
រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញ កាលពីថ្ងៃទី ២១ ខែមេសា ឆ្នាំ ២០២៦ បានបន្តប្រតិបត្តិការចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា ( Online Scams ) ទីតាំងអគារខុនដូរ ZHUOYUFENG អគារលេខ ៥២៤ ផ្លូវបេតុង ភូមិដំណាក់ធំ ៥ សង្កាត់ស្ទឹងមានជ័យទី ៣ ខណ្ឌមានជ័យ រាជធានីភ្នំពេញ ឃាត់ខ្លួនជនបរទេស ៥៥នាក់ និងដកហូតសារធាតុញៀន ជាង ១០គីឡូក្រាម ។
ប្រតិបត្តិការខាងលើនេះ បានធ្វើឡើងក្រោមការដឹកនាំបញ្ជាផ្ទាល់ដោយ ឯកឧត្តម ឃួង ស្រេង អភិបាលរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដឹកនាំអនុវត្តការបង្ក្រាបផ្ទាល់ដោយលោកឧត្តមសេនីយ៍ទោ ប៊ុន សុសិក្ខា ស្នងការរង ទទួលផែនការងារសន្តិសុខ លោកឧត្តមសេនីយ៍ត្រី ពូ ដាវី មេបញ្ជាការរងកងរាជអាវុធរាជធានីភ្នំពេញ ដោយបានការសម្របសម្រួលផ្លូវច្បាប់ពី លោក សេង ហៀង និងលោក ថេង សំណាង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ជាលទ្ធផល នៃប្រតិបត្តិការបង្ក្រាបក្នុងករណីខាងលើនេះ កម្លាំងសមត្ថកិច្ចបានឃាត់ខ្លួនជនបរទេសសរុបចំនួន ៥៥នាក់ មាន ៧សញ្ជាតិ ក្នុងនោះជនបរទេសស្នាក់នៅខុសច្បាប់ (គ្មានលិខិតឆ្លងដែន លើសទិដ្ឋាការ ៤៤នាក់ ក្នុងនោះជនបរទេសប្រព្រឹត្ត online Scam ជនជាតិវៀតណាម១១ (ស្រី ៣នាក់) និងដកហូតវត្ថុតាង កុំព្យូទ័រយួរដៃ ១៤គ្រឿង, ទូរស័ព្ទដៃ ៦គ្រឿង, គ្រឿងញៀនចំរុះទំងន់មានទម្ងន់សរុបប្រហែល ១០គីឡូក្រាម ។
យោងតាមការធ្វើកោសល្យវិច្ច័យលើសម្ភារវត្ថុតាងឧបករណ៍អេឡិចត្រូនិក សន្និដ្ឋានបានថា ទីតាំងខាងលើជាប់ពាក់ព័ន្ធអំពើជនសង្ស័យប្រើទីតាំងក្នុងប្រទេសកម្ពុជា ប្រព្រឹត្តបទល្មើសអំពើឆបោកតាមប្រព័ន្ធបច្ចេកវិទ្យា (Online Scams) ។ បច្ចុប្បន្ន ជនបរទេសទាំង ៥៥នាក់ រួមនិងសម្ភារវត្ថុតាងត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី ៕
ចែករំលែកព័តមាននេះ