លោកត្រាំ ចេញសារព្រមា.ន និងចោទអ៊ីរ៉ង់ថាកំពុងធ្វើការងារអន់ខ្លាំងណាស់ ជុំវិញរឿងច្រកហ័រមូស
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៩ ខែមេសា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៩ ខែមេសា ឆ្នាំ២០២៦ (ម៉ោងនៅសហរដ្ឋអាមេរិក) បានចោទអ៊ីរ៉ង់ថាកំពុងតែធ្វើការងារអន់ខ្លាំងណាស់ក្នុងការអនុញ្ញាតឱ្យប្រេងឆ្លងកាត់ច្រកសមុទ្រហ័រមូស (Hormuz) និងរំលោភលើលក្ខខណ្ឌនៃកិច្ចព្រមព្រៀងបទឈប់បាញ់រយៈពេល២សប្តាហ៍រវាងភាគីទាំងពីរ។ នេះបើតាមប្រភពពី AFP បានចេញផ្សាយ។
នៅក្នុងការបង្ហោះជាច្រើនលើបណ្តាញសង្គម ដែលបង្កឱ្យមានការភ័យខ្លាចជាថ្មីចំពោះបទឈប់បាញ់ដ៏ផុយស្រួយនេះ លោក ត្រាំ បានព្រមានអ៊ីរ៉ង់កុំឱ្យយកថ្លៃសេវាលើកប៉ាល់ដែលឆ្លងកាត់ច្រកហ័រមូស។ លោកបានលើកឡើងតាមរយៈសារនៅលើបណ្តាញសង្គម Truth Social ដូច្នេះថា «អ៊ីរ៉ង់កំពុងតែធ្វើការងារអន់ខ្លាំងណាស់ក្នុងការអនុញ្ញាតឱ្យប្រេងឆ្លងកាត់ច្រកហ័រមូស។ នោះមិនមែនជាកិច្ចព្រមព្រៀងដែលយើងមាននោះទេ!»។
អ៊ីរ៉ង់ និងអាមេរិកបានព្រមព្រៀងគ្នាថា ច្រកហ័រមូសនឹងបើកឡើងវិញភ្លាមៗ បន្ទាប់ពីបទឈប់បាញ់២សប្តាហ៍ ត្រូវបានប្រកាសកាលពីថ្ងៃទី៧ ខែមេសា ឆ្នាំ២០២៦។ ទោះយ៉ាងណាក៏ដោយ តាមទិន្នន័យពីទីភ្នាក់ងារតាមដានចរាចរណ៍សមុទ្របានបង្ហាញថាមានតែកប៉ាល់ ១០ គ្រឿងប៉ុណ្ណោះដែលបានឆ្លងកាត់ ចាប់តាំងពីបទឈប់បាញ់ចូលជាធរមាន។ មិនតែប៉ុណ្ណោះ ភាពតានតឹងបានកើនឡើងថែមទៀត បន្ទាប់ពីអ៊ីរ៉ង់បានស្នើឱ្យបង់កម្រៃជើងសារលើបណ្តាកប៉ាល់ដឹកជញ្ជូន ដែលកន្លងមក លោក ត្រាំ ក៏ធ្លាប់ស្នើស្រដៀងគ្នានេះ និងថែមទាំងប្រកាសចង់យកថ្លៃកម្រៃជើងសាររួមគ្នាជាមួយអ៊ីរ៉ង់ទៀតផង។
ប៉ុន្តែផ្ទុយទៅវិញ តាមរយៈការបង្ហោះសារ កាលពីថ្ងៃទី៩ ខែមេសា កន្លងទៅ លោក ត្រាំ លើកឡើងដូច្នេះថា «មានរបាយការណ៍ថា អ៊ីរ៉ង់កំពុងគិតថ្លៃសេវាកប៉ាល់ដឹកប្រេងដែលឆ្លងកាត់ច្រកហ័រមូស។ ពួកគេមិនគួរធ្វើដូច្នោះទេ ហើយបើពួកគេធ្វើដូច្នោះមែន ពួកគេគួរតែឈប់ឥឡូវនេះ!»។
នៅក្នុងការបង្ហោះមួយផ្សេងទៀត លោក ត្រាំ បានវាយបកទៅកាន់បណ្តាមតិរិះគន់ចំពោះបទឈប់បាញ់ដ៏ផុយស្រួយជាមួយអ៊ីរ៉ង់ ដោយបានបន្ថែមថា «យ៉ាងឆាប់រហ័ស អ្នកគ្រប់គ្នានឹងឃើញប្រេងចាប់ផ្តើមឆ្លងកាត់ ដោយមាន ឬគ្មានជំនួយពីអ៊ីរ៉ង់»។
គួរបញ្ជាក់ថា អនុប្រធានាធិបតីអាមេរិក លោក JD Vance នឹងចាប់ផ្តើមការចរចាជាមួយ អ៊ីរ៉ង់ ដែលនឹងធ្វើឡើងនៅទីក្រុងអ៊ីស្លាម៉ាបាដ ប្រទេសប៉ាគីស្ថាន នាថ្ងៃទី១១ ខែមេសា ឆ្នាំ២០២៦។ បេសកជនពិសេស លោក Steve Witkoff និងកូនប្រសារលោក ត្រាំ គឺ លោក Jared Kushner ក៏កំពុងធ្វើដំណើរជាមួយលោក JD Vance ផងដែរ។
ទន្ទឹមនឹងនេះ នាយករដ្ឋមន្ត្រីអ៊ីស្រាអែល លោក Benjamin Netanyahu ក៏បានយល់ព្រមតាមការហៅទូរស័ព្ទជាមួយលោក ត្រាំ ដើម្បីរក្សាភាពស្ងប់ស្ងាត់ បន្ទាប់ពីការវាយប្រហារដ៏សាហាវលើប្រទេសលីបង់ បានឆក់យកជីវិតមនុស្សរាប់រយនាក់ កាលពីថ្ងៃទី៨ ខែមេសា ឆ្នាំ២០២៦៕
ចែករំលែកព័តមាននេះ