រាជធានីភ្នំពេញ ៖ យ៉ាងហោចណាស់ វត្ថុបុរាណដ៏មានតម្លៃរបស់ខ្មែរចំនួន២០រូប ដែលកាន់កាប់ដោយសមុច្ឆ័យ ដែលជាអ្នកសន្សំឯកជនមួយ ក្នុងតំបន់អាស៊ី ត្រូវបានបញ្ជូនត្រឡប់មកកាន់កម្ពុជាវិញហើយ ។ តាមក្រសួងវប្បធម៌…
រាជធានីភ្នំពេញ ៖ យ៉ាងហោចណាស់ វត្ថុបុរាណដ៏មានតម្លៃរបស់ខ្មែរចំនួន២០រូប ដែលកាន់កាប់ដោយសមុច្ឆ័យ ដែលជាអ្នកសន្សំឯកជនមួយ ក្នុងតំបន់អាស៊ី ត្រូវបានបញ្ជូនត្រឡប់មកកាន់កម្ពុជាវិញហើយ ។
តាមក្រសួងវប្បធម៌ និងវិចិត្រសិល្បៈដែលបានចេញសេចក្តីប្រកាស នៅថ្ងៃទី៦ ខែមេសា ឆ្នាំ២០២៦ ឱ្យដឹងថា ការប្រគល់មកវិញនៃវត្ថុទាំងនេះ គឺជាសមិទ្ធផលដ៏ធំធេងថ្មីមួយទៀត តាមរយៈកិច្ចខិតខំប្រឹងប្រែងជាប្រចាំរបស់កម្ពុជាក្នុងការទាមទារ និងស្តារឡើងវិញនូវមរតកវប្បធម៌ដូនតាសម្រាប់កូនចៅជំនាន់ក្រោយ ។
ក្រសួងបានលើកឡើងថា សមុច្ច័យដែលបានប្រគល់មកវិញ មានលក្ខណៈចម្រុះសាងពីថ្មភក់ និងសំរឹទ្ធដូចជា រូបបដិមាសម័យបាយ័ន ដែលគេជឿថា មានប្រភពដើមមកពីក្រុងអង្គរធំ ។ សម្បត្តិវប្បធម៌ទាំងនេះ មិនត្រឹមតែជាវត្ថុសិល្បៈទេ តែជាសាក្សីរស់នៃបញ្ញាញាណរបស់បុព្វបុរស និងដួងព្រលឹងនៃអរិយធម៌ខ្មែរដែលនឹងផ្តល់ការយល់ដឹងបន្ថែមអំពីប្រវត្តិសាស្ត្រកម្ពុជា ។
ក្រសួងបានលើកឡើងទៀតថា ក្នុងដំណើរការទាមទារនេះអាចសម្រេចទៅបានដោយមានការចូលរួមជ្រោមជ្រែងពីអ្នកជំនាញនៃក្រុមការងារស្រាវជ្រាវ ដែលបានផ្តល់ប្រឹក្សា និងរៀបចំការចរចារហូតឈានដល់ការប្រគល់វត្ថុទាំងនេះមកកម្ពុជាវិញ ។
បុគ្គលស្នូល ក្នុងកិច្ចការនេះ គឺលោក Imran Hamid Khwaja ជាដៃគូនៃក្រុមហ៊ុន Tan Rajah & Cheah ដែលជាក្រុមហ៊ុនច្បាប់ដ៏ចំណាស់បំផុតមួយរបស់ប្រទេសសិង្ហបុរី និងជាមេធាវី ដែលមានបទពិសោធន៍ទូលំទូលាយក្នុងការដោះស្រាយវិវាទអន្តរជាតិ ។
លោក Khwaja និងលោក Bradley J. Gordon នៃក្រុមហ៊ុន Edenbridge Asia បានដើរតួនាទីយ៉ាងសំខាន់ក្នុងការសហការ និងចរចាបញ្ជូនត្រឡប់មកវិញនៃរតនវត្ថុជាតិទាំងនេះ ។
ប្រភពខាងលើនេះ បានឱ្យដឹងបន្ថែមថា ការប្រគល់មកវិញនូវវត្ថុបុរាណទាំងនេះបានបញ្ជាក់យ៉ាងច្បាស់ពីការប្តេជ្ញាចិត្តរបស់កម្ពុជា ក្នុងការបន្តស្វែងរកយុត្តិធម៌ សម្រាប់បេតិកភណ្ឌវប្បធម៌របស់ខ្លួន ។ កម្ពុជាមានក្តីរំភើប ចំពោះការវិលត្រឡប់មកវិញនៃព្រលឹងដូនតាខ្មែរមកកាន់មាតុភូមិកំណើត ។
សមិទ្ធផលនេះ បានបញ្ជូនសារយ៉ាងច្បាស់ថា ប្រជាជនកម្ពុជាបន្តរួបរួមគ្នាជាធ្លុងមួយក្នុងការការពារមរតកវប្បធម៌របស់ខ្លួនសម្រាប់មនុស្សជាតិទាំងមូល ។
ជាមួយគ្នានេះ ក្រសួងវប្បធម៌ និងវិចិត្រសិល្បៈក៏បានសម្តែងនូវការដឹងគុណយ៉ាងជ្រាលជ្រៅបំផុតជូនសម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងដៃគូអន្តរជាតិ និងក្រុមការងារដែលបានសម្របសម្រួលក្នុងការងារមួយនេះ ។
ក្រសួងវប្បធម៌ និងវិចិត្រសិល្បៈបានអំពាវនាវ និងលើកទឹកចិត្តដល់សារមន្ទីរ និងអ្នកប្រមូលសមុច្ច័យឯកជននានាដែលកំពុងកាន់កាប់វត្ថុបុរាណខ្មែរឱ្យទាក់ទងមកក្រសួង និងចូលរួមពិភាក្សាប្រកបដោយវិជ្ជាជីវៈក្នុងការប្រគល់វត្ថុបុរាណខ្មែរមកកម្ពុជាវិញ៕
ចែករំលែកព័តមាននេះ