ខេត្តមណ្ឌលគិរី ៖ ម៉ូតូចំនួន ១៥គ្រឿង គ្រឿងឧបភោគបរិភោគ សម្ភារៈប្រើប្រាស់ចាំបាច់ប្រចាំថ្ងៃ និងថវិកាលើកទឹកចិត្តមួយចំនួន ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍…
ខេត្តមណ្ឌលគិរី ៖ ម៉ូតូចំនួន ១៥គ្រឿង គ្រឿងឧបភោគបរិភោគ សម្ភារៈប្រើប្រាស់ចាំបាច់ប្រចាំថ្ងៃ និងថវិកាលើកទឹកចិត្តមួយចំនួន ដែលជាអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និង ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី ត្រូវបានលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី នាំយកទៅប្រគល់ជូនដល់កងកម្លាំងវរសេនាតូចនគរបាលការពារព្រំដែនគោកលេខ ៣០៣ និងលេខ ៦២១ ដើម្បីសម្រួលដល់កិច្ចប្រតិបត្តិការ និងជីវភាពប្រចាំថ្ងៃ នាឱកាសបុណ្យចូលឆ្នាំថ្មីប្រពៃណីជាតិខ្មែរ។
ពិធីសំណេះសំណាល និងប្រគល់អំណោយលើកទឹកចិត្តនេះ បានប្រារព្ធឡើងនាព្រឹកថ្ងៃទី០៥ ខែមេសា ឆ្នាំ២០២៦ នៅទីបញ្ជាការវរសេនាតូចនគរបាលការពារព្រំដែនគោកលេខ ៣០៣ ស្ថិតក្នុងភូមិសាស្ត្រឃុំពូជ្រៃ ស្រុកពេជ្រាដា ដោយមានការអញ្ជើញចូលរួមពីសំណាក់ លោក-លោកស្រី ស្នងការរង មេបញ្ជាការ-មេបញ្ជាការរង និងកងកម្លាំងនគរបាលការពារព្រំដែនជាច្រើនរូប។
លោកឧត្តមសេនីយ៍ទោ ឡោ សុខា បានបញ្ជាក់ថា ការផ្ដល់ជូននូវមធ្យោបាយម៉ូតូទាំង ១៥គ្រឿង ដែលជាអំណោយរបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ១០គ្រឿង និងអំណោយរបស់ ឯកឧត្តម ថង សាវុន អភិបាលខេត្តមណ្ឌលគិរីចំនួន៥គ្រឿង រួមជាមួយគ្រឿងឧបភោគបរិភោគ និងថវិកានាពេលនេះ គឺជាសក្ខីភាពបង្ហាញពីការយកចិត្តទុកដាក់ និងការគិតគូរជាប្រចាំរបស់ថ្នាក់ដឹកនាំគ្រប់លំដាប់ថ្នាក់ ចំពោះសុខទុក្ខ និងការលំបាករបស់កងកម្លាំងជួរមុខ។ អំណោយទាំងនេះនឹងក្លាយជាកម្លាំងចលករដ៏សំខាន់ ក្នុងការជួយសម្រួលដល់ការចុះល្បាតតាមខ្សែបន្ទាត់ព្រំដែន និងភូមិសាស្ត្រស្មុគស្មាញនានា ឱ្យកាន់តែមានភាពរហ័សរហួន និងមានប្រសិទ្ធភាពខ្ពស់។
ថ្លែងក្នុងនាមថ្នាក់ដឹកនាំ លោកស្នងការខេត្តបាននាំនូវមនោសញ្ចេតនានឹករលឹក និងការសួរសុខទុក្ខយ៉ាងជ្រាលជ្រៅបំផុត ចំពោះបងប្អូនកងកម្លាំងទាំងអស់ដែលបានលះបង់ក្តីសុខផ្ទាល់ខ្លួន ដើម្បីបំពេញភារកិច្ចការពារជាតិ។ លោកបានមានប្រសាសន៍ផ្ដាំផ្ញើដល់កងកម្លាំងវរសេនាតូចទាំងពីរនូវចំណុចសំខាន់ៗ រួមមាន ១. ពង្រឹងការងារសន្តិសុខ ត្រូវយកចិត្តទុកដាក់ខ្ពស់លើការងារការពារសន្តិសុខ សណ្ដាប់ធ្នាប់តាមព្រំដែន ជាពិសេសការបង្កលក្ខណៈងាយស្រួលជូនប្រជាពលរដ្ឋឱ្យបានសប្បាយរីករាយ ក្នុងឱកាសបុណ្យចូលឆ្នាំថ្មីដែលខិតជិតមកដល់។ ២. ការថែរក្សាសម្ភារៈ ត្រូវចេះថែទាំមធ្យោបាយម៉ូតូ និងសម្ភារៈដែលទទួលបានឱ្យបានល្អ ដើម្បីបម្រើឱ្យកិច្ចប្រតិបត្តិការការពារបូរណភាពទឹកដីបានយូរអង្វែង។ ៣. សាមគ្គីភាព និងវិន័យ ត្រូវបន្តពង្រឹងសាមគ្គីភាពផ្ទៃក្នុងឱ្យបានល្អ គោរពវិន័យកងកម្លាំង និងសហការជិតស្និទ្ធជាមួយអាជ្ញាធរដែនដី។
ជាទីបញ្ចប់ លោកឧត្តមសេនីយ៍ទោ ស្នងការខេត្ត ក៏បានជូនពរដល់កងកម្លាំងទាំងអស់ ឱ្យមានសុខភាពល្អបរិបូរណ៍ កម្លាំងមាំមួន និងទទួលបានជោគជ័យគ្រប់ភារកិច្ចបម្រើជាតិ និងប្រជាជន ក្នុងឱកាសឆ្នាំថ្មី ប្រពៃណីជាតិខ្មែរ ខាងមុខនេះ៕
ចែករំលែកព័តមាននេះ