ប្រទេស​វៀតណាម ៖ លោក Pham Nhat Vuong កំពូល​មហាសេដ្ឋី​វៀតណាម​ប្រធាន​ក្រុមហ៊ុន​ឯកជន Vingroup បាន​វ៉ា​ដាច់​កំពូល​មហាសេដ្ឋី​ឥណ្ឌូ​ណេ​ស៊ី លោក Prajogo Pangestu ដើម្បី​ក្លាយជា​បុគ្គល​មាន​ជាងគេ​បំផុត​នៅ​អាស៊ី​អាគ្នេយ៍ ជាមួយ​ទ្រព្យសម្បត្តិ​កើនឡើង​ដល់ ២៤,៥ ពាន់​លាន​ដុល្លារ​អា​មេ​រិ​ក​។ នេះ​បើ​តាម​ទិន្នន័យ​ចុង​ក្រោយ​ពី​ទស្សនាវដ្តី Forbes និង​ត្រូវ​បាន​ចេញផ្សាយ​ដោយសារ​ព័ត៌មាន VnExpress ។

គិត​ត្រឹម​ថ្ងៃ​ទី​៥ ខែមេសា ឆ្នាំ​២០២៦ ទស្សនាវដ្តី​ពាណិជ្ជកម្ម​អា​មេ​រិ​ក Forbes បាន​ដាក់​ឈ្មោះ​លោក Pham Nhat Vuong ជាប់​ចំណាត់ថ្នាក់​ទី​១០០ ក្នុង​បញ្ជី​អ្នកមាន​បំផុត​នៅ​ទូ​ទាំង​ពិភពលោក ខណៈ​លោក Prajogo Pangestu ជាប់​ចំណាត់ថ្នាក់​ទី​១៣៨​។

នៅ​ក្នុង​រយៈពេល​៣​ខែ​ចុង​ក្រោយ​នេះ ទ្រព្យ​សុទ្ធ​របស់​លោក Pangestu បាន​ថយ​ចុះ​ពី​ជាង ៤៤ ពាន់​លាន​ដុល្លារ មក​ត្រឹម ១៨,៦ ពាន់​លាន​ដុល្លារ ដែល​ភាគច្រើន​ដោយសារ​ការ​ធ្លាក់​ចុះ​រហូត​ដល់ ៦០% នៃ​ភាគហ៊ុន​ក្រុមហ៊ុន​ថាមពល Barito Pacific របស់​កំពូល​មហាសេដ្ឋី​ឥណ្ឌូ​ណេ​ស៊ី​វ័យ​៨១​ឆ្នាំ​រូប​នេះ បន្ទាប់​ពី​អាជ្ញាធរ​ឥណ្ឌូ​ណេ​ស៊ី កាលពី​ខែមករា​កន្លង​ទៅ បាន​ត្រួតពិនិត្យ​អំពី​តម្លាភាព​ទីផ្សារ​ភាគហ៊ុន​ក្នុងស្រុក និង​តម្លៃពិត​នៃ​ភាគហ៊ុន​របស់​សាជីវកម្ម​ធំ​ៗ​។

ងាក​មក​លោក Vuong ចាប់តាំងពី​ដើមឆ្នាំ​២០២៦​មក ទ្រព្យ​សុទ្ធ​របស់​កំពូល​មហាសេដ្ឋី​វៀតណាម​វ័យ​៥៧​ឆ្នាំ​រូប​នេះ បាន​ថយ​ចុះ​ជិត ៤ ពាន់​លាន​ដុល្លារ ភាគច្រើន​ដោយសារ​ការ​ធ្លាក់​ចុះ​ភាគហ៊ុន​របស់​ក្រុមហ៊ុន Vingroup ដែល​ជា​សម្ព័ន្ធ​ក្រុមហ៊ុន​ឯកជន​ខ្នាត​យក្ស​របស់​វៀតណាម កាលពី​ឆ្នាំ​មុន​។ ដ្បិត​លោក និង​ក្រុម​គ្រួសារ​របស់​លោក​បច្ចុប្បន្ន​កាន់កាប់​ភាគហ៊ុន​ក្នុង​ក្រុមហ៊ុន​សរុប​ប្រហែល ៦៥%​។

លោក Vuong ត្រូវ​បាន​ទទួលស្គាល់​ដោយ​ទស្សនាវដ្តី Forbes ថា​ជា​មហាសេដ្ឋី​ដំបូង​គេ​របស់​ប្រទេស​វៀតណាម​ក្នុង​ឆ្នាំ ២០១៣ នៅ​ពេល​ដែល​ទ្រព្យ​សុទ្ធ​របស់​លោក​មាន​ចំនួន ១,៥ ពាន់​លាន​ដុល្លារ និង​ជាប់​ចំណាត់ថ្នាក់​ទី ៩៧៤ ពិភពលោក​។ បន្ទាប់​ពី​រយៈពេល ១២ ឆ្នាំ ទ្រព្យ​លោក​បាន​កើនឡើង​ជាង ១៦ ដង​។ ក្រុម​គ្រួសារ​របស់​លោក ពោល​ភរិយា​លោក​ផ្ទាល់​គឺ​លោកស្រី Pham Thu Huong និង​ប្អូនស្រី​របស់​លោក​គឺ​លោកស្រី Pham Thuy Hang ក៏​មាន​ងារ​ជា​មហាសេដ្ឋី​ផង​ដែរ ជាមួយ​ទ្រព្យ​សុទ្ធ ១,៥ ពាន់​លាន​ដុល្លារ​ដូច​គ្នា ដោយ​ជាប់​ឈ្មោះ​ជា​ផ្លូវការ​ក្នុង​បញ្ជី​អ្នកមាន​បំផុត​របស់​ពិភពលោក​របស់ Forbes កាលពី​ខែមីនា​កន្លង​ទៅ​ថ្មី​ៗ​នេះ​។

លោកស្រី Huong គឺជា​អនុប្រធាន​ក្រុមហ៊ុន Vingroup និង​ជា​ប្រធាន​ក្រុមហ៊ុន GSM ដែល​ជា​ក្រុមហ៊ុន​ដំណើរការ​សេវាកម្ម​តាក់ស៊ី Xanh SM​។ ចំណែក​លោកស្រី Hang ក៏​ជា​អនុប្រធាន​ក្រុមហ៊ុន Vingroup ផង​ដែរ​។

នៅ​ឆ្នាំ​នេះ ក្រុមហ៊ុន Vingroup កំណត់​គោលដៅ​ប្រាក់​ចំណូល​ចំនួន ៤៥០ ទ្រី​លាន​ដុ​ង ឬ ១៧,១ ពាន់​លាន​ដុល្លារ​អា​មេ​រិ​ក ពោល​កើនឡើង ៣៦% ធៀប​នឹង​ឆ្នាំ​មុន​។ ក្រុមហ៊ុន​ក៏​រំពឹង​ថា ប្រាក់​ចំណេញ​ក្រោយ​បង់ពន្ធ​នឹង​មាន​ចំនួន ២៥ ទ្រី​លាន​ដុ​ង ឬ ៩៥០ លាន​ដុល្លារ ដែល​ខ្ពស់​ជាង​ឆ្នាំ​មុន ចំនួន ២,២ ដង និង​ជា​កម្រិត​ខ្ពស់​បំផុត​មិន​ធ្លាប់​មាន​ពី​មុន​មក​របស់​ក្រុមហ៊ុន​។

គួរ​បញ្ជាក់​ថា គិត​ត្រឹម​ថ្ងៃ​ទី​៥ ខែមេសា ឆ្នាំ​២០២៦ កំពូល​មហាសេដ្ឋី​សញ្ជាតិ​អា​មេ​រិ​ក លោក Elon Musk នាយក​ប្រតិបត្តិ​ក្រុមហ៊ុន Tesla ក៏​ដូច​ជា​ស្ថាបនិក និង​ជានា​យក​ប្រតិបត្តិ​ក្រុមហ៊ុន SpaceX នៅ​តែ​បន្ត​ឈរ​ជា​បុគ្គល​មាន​បំផុត​លើ​ពិភពលោក ជាមួយ​ទ្រព្យ​សុទ្ធ​ចំនួន ៨០៩ ពាន់​លាន​ដុល្លារ​អា​មេ​រិ​ក និង​កំពុង​កាន់​កំណត់​ត្រា​ពិភពលោក​ជា​បុគ្គល​ដំបូង​គេ​ក្នុង​ប្រវត្តិសាស្ត្រ​ដែល​ទ្រព្យ​សុទ្ធ​កើន​ដល់ ៣០០, ៤០០, ៥០០, ៦០០, ៧០០ និង ៨០០ ពាន់​លាន​ដុល្លារ​ផង​ដែរ​។

ដោយឡែក កំពូល​មហាសេដ្ឋី​ឥណ្ឌា លោក Mukesh Ambani ដែល​ជា​ប្រធាន ក៏​ដូច​ជានា​យក​គ្រប់គ្រង​ក្រុមហ៊ុន​ថាមពល Reliance Industries នៅ​តែ​ឈរ​ជា​បុគ្គល​មាន​បំផុត​ប្រចាំ​ទី្វ​ប​អាស៊ី ជាមួយ​ទ្រព្យ​សុទ្ធ​ចំនួន ៩៤ ពាន់​លាន​ដុល្លារ​៕