ទីក្រុងប្រ៊ុចសែល៖ ថ្ងៃនេះ តម្លៃថាមពល (ប្រេង សាំង ហ្គាស។ល។) ហក់ឡើងខ្ពស់ជាងមុនបន្ទាប់ពីអ៊ីរ៉ង់វាយប្រហាររោងចក្រចម្រាញ់ប្រេង២កន្លែងនៅប្រទេសគូវែត និងវាយប្រហារទីតាំងចម្រាញ់ឧស្ម័ននៅប្រទេសកាតា។ នេះជាកន្លែងចម្រាញ់ឧស្ម័នដ៏ធំបំផុតដែលអាចផ្គត់ផ្គង់ហ្គាស២០%នៃពិភពលោក។ ការវាយប្រហារទាំងនេះធ្វើឱ្យមជ្ឈដ្ឋានទូទៅរឹតតែព្រួយបារម្ភបន្ថែមពីលើការបិទខ្ទប់ច្រកសមុទ្រហ័រម៉ូស (Hormuz)។ គេបារម្ភថាវិបត្តិថាមពលនឹងមានសភាពខ្លាំងក្លាជាងអ្វីដែលគេធ្លាប់គិតពីមុនមក។
សន្ទស្សន៍តម្លៃប្រេងឆៅគិតតាមហាងឆេងអឺរ៉ុប (Brent) បង្ហាញថាប្រេងឡើងថ្លៃជិត៦% ពោលគឺមួយបារ៉ែល (១៥៩លីត្រ) លក់ចេញតម្លៃ១១៣,៧៧ដុល្លារ។ បើប្រៀបធៀបកាលពីមុនពេលផ្ទុះសង្គ្រាមរហូតមកដល់ពេលនេះ តម្លៃប្រេងខុសគ្នាឆ្ងាយណាស់។ ដោយឡែក សន្ទស្សន៍តម្លៃប្រេងឆៅគិតតាមហាងឆេងអាមេរិកគឺមួយបារ៉ែលលក់ចេញតម្លៃ៩៦,២៦ដុល្លារ។ មានន័យថាឡើងថ្លៃតិចជាង១%។ ឧស្ម័ន (ហ្គាស) តាមហាងឆេងអឺរ៉ុបឡើងថ្លៃ១៧%។ មានន័យថាអាមេរិកមិនសូវរងផលប៉ះពាល់ខ្លាំងពីបញ្ហាប្រេងឡើងថ្លៃប៉ុន្មានទេ។
ថ្មីៗនេះ យោធាអ៊ីរ៉ង់វាយប្រហារទីតាំងស្តុកទុកឧស្ម័នរ៉ាស់ ឡាហ្វាន (Ras Lafffan) នៅកាតាដែលជាប្រទេសផ្គត់ផ្គង់ឧស្ម័ន២០%នៃពិភពលោក។ ប្រទេសនេះអាចដឹកជញ្ជូនឧស្ម័នទៅកាន់ទីផ្សារពិភពលោកតាមកប៉ាល់ធំៗ។ ទីតាំងស្តុកឧស្ម័នរបស់កាតាត្រូវបិទដំណើរការទាំងស្រុងក្រោយការវាយប្រហារនោះ។ ឥឡូវនេះ ឧស្ម័នមិនដឹងថាតើត្រូវដឹកចេញទៅតាមច្រកណាទេព្រោះច្រកសមុទ្រហ័រម៉ូស (Hormuz) ក៏ត្រូវបិទជិតឈឹង។ មានតែកប៉ាល់តិចតួចជាទីបំផុតដែលអាចបើកចេញចូលបានតាមច្រកនេះ។ ជាពិសេស ទាល់តែក្រុមប្រទេសដែលគ្មានទំនាស់ជាមួយអ៊ីរ៉ង់ និងមិនមែនជាសម្ព័ន្ធមិត្តរបស់អាមេរិកទើបអាចបើកកាត់ច្រកនេះបាន។
សេដ្ឋកិច្ចពិភពលោកអាចរង្គោះរង្គើបើសិនតម្លៃប្រេង និងឧស្ម័នបន្តឡើងថ្លៃដោយសារអ៊ីរ៉ង់ដើរវាយប្រហារទីតាំងផលិត និងស្តុកទុកថាមពលរបស់ប្រទេសជិតខាងនៅតំបន់ឈូងសមុទ្រ។ ផ្សារមូលប័ត្រនៅទ្វីបអឺរ៉ុប និងអាស៊ីរងគ្រោះខ្លាំងជាងអាមេរិក។ នៅអាល្លឺម៉ង់ តម្លៃហ៊ុនធ្លាក់ចុះ២,៤%គិតត្រឹមពេលថ្ងៃត្រង់, បារាំងធ្លាក់ចុះ១,៧% និងអង់គ្លេសធ្លាក់ចុះ២,១%។ ចំណែកនៅទ្វីបអាស៊ី ហ៊ុននីកេរបស់ជប៉ុនធ្លាក់ចុះ៣,៤%។ ប្រេងឡើងថ្លៃជាបញ្ហាធំសម្រាប់សេដ្ឋកិច្ចជប៉ុនព្រោះប្រទេសនេះពឹងផ្អែកខ្លាំងលើការនាំចូលវត្ថុធាតុដើមភាគច្រើនសម្រាប់បម្រើឱ្យវិស័យឧស្សាហកម្មរបស់ខ្លួន៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ