រាជធានីភ្នំពេញ ៖ នៅថ្ងៃទី១៦ ខែមីនា ឆ្នាំ២០២៦ សមាគមធនាគារ និងមីក្រូហិរញ្ញវត្ថុ ចេញសេចក្តីថ្លែងការណ៍ ថ្កោលទោសយ៉ាងដាច់អហង្ការ ចំពោះការផ្សព្វផ្សាយព័ត៌មានមិនពិតលើប្រព័ន្ធធនាគារនៅកម្ពុជា…
រាជធានីភ្នំពេញ ៖ នៅថ្ងៃទី១៦ ខែមីនា ឆ្នាំ២០២៦ សមាគមធនាគារ និងមីក្រូហិរញ្ញវត្ថុ ចេញសេចក្តីថ្លែងការណ៍ ថ្កោលទោសយ៉ាងដាច់អហង្ការ ចំពោះការផ្សព្វផ្សាយព័ត៌មានមិនពិតលើប្រព័ន្ធធនាគារនៅកម្ពុជា បន្ទាប់ពីលោកជំទាវ ជា សិរី អគ្គទេសាភិបាល នៃធនាគារជាតិ នៃកម្ពុជា ចេញមកអំពាវនាវកុំឲ្យប្រជាពលរដ្ឋសម្រុកមកដកប្រាក់បញ្ញើទាំងអស់ក្នុងពេលតែមួយ ដែលធ្វើឱ្យប្រព័ន្ធគ្រប់គ្រងរបស់ធនាគារនោះមានបញ្ហាបង្វិលប្រាក់មិនទាន់ ។
សមាគមធនាគារនៅកម្ពុជា(ABC) និងសមាគម មីក្រូហិរញ្ញវត្ថុកម្ពុជា(CMA) មានកិត្តិយស បញ្ជាក់ថា វិស័យធនាគារ និងហិរញ្ញវត្ថុនៅកម្ពុជា នៅតែបន្តមានភាពរឹងមាំ មានសន្ទនីយភាពគ្រប់គ្រាន់ និងស្ថិតក្រោមការត្រួតពិនិត្យយ៉ាងតឹងរ៉ឹងពីធនាគារជាតិ នៃកម្ពុជា(NBC) ជាមួយនឹងសូចនាករចម្បងៗ នៃភាពប្រុងប្រយ័ត្នស្ថិតនៅកម្រិតលើសពីបទប្បញ្ញត្តិដែលបានកំណត់។ ការចែកចាយ និផ្សព្វផ្សាយ ព័ត៌មានមិនពិតពាក់ព័ន្ធនឹងស្ថានភាពហិរញ្ញវត្ថុរបស់ធនាគារមួយចំនួន នាពេលថ្មីៗនេះ មិនបានឆ្លុះបញ្ចាំងជារួមពីប្រព័ន្ធធនាគារ និងហិរញ្ញវត្ថុទាំងមូលនៅកម្ពុជានោះទេ ។
សមាគមធនាគារនៅកម្ពុជា(ABC) និងសមាគមមីក្រូហិរញ្ញវត្ថុកម្ពុជា គូសបញ្ជាក់ថា ភាពរអាក់រអួរចំពោះប្រតិបត្តិការបណ្តោះអាសន្ននៅស្ថាប័នហិរញ្ញវត្ថុណាមួយ មិនគួរយកទៅបកស្រាយថា ជាការឆ្លុះបញ្ចាំងពីស្ថានភាព នៃប្រព័ន្ធធនាគារ និងហិរញ្ញវត្ថុទាំងមូលនោះឡើយ។ វិស័យធនាគារ និងហិរញ្ញវត្ថុ នៅតែបន្តទទួលបានការគាំទ្រដោយបទប្បញ្ញត្តិយ៉ាងតឹងរ៉ឹង រួមទាំងការត្រួតពិនិត្យ និងវិធានការធានាលើហានិភ័យសន្ទនីយភាពសាច់ប្រាក់ជាប្រចាំ ។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា សូមប្រកាសថ្កោលទោសយ៉ាងដាច់អហង្ការចំពោះការផ្សព្វផ្សាយព័ត៌មានមិនពិត ឬព័ត៌មានបំភាន់ ដែលអាចប៉ះពាល់ដល់ជំនឿទុកចិត្តរបស់សាធារណជនមកលើប្រព័ន្ធធនាគារនៅកម្ពុជា។
សមាគមទាំងពីរ សូមអំពាវនាវដល់សាធារណជន សូមកុំឆាប់ជឿតាមពាក្យចចាមអារ៉ាម ឬព័ត៌មាន ដែលគ្មានប្រភពច្បាស់លាស់ពីបណ្តាញសង្គម។ សូមតាមដានព័ត៌មានផ្លូវការពីធនាគារជាតិ នៃកម្ពុជា និងធនាគារដែលមានអាជ្ញាប័ណ្ណ ឬទាក់ទងទៅគ្រឹះស្ថានដែលខ្លួនប្រើប្រាស់សេវាដោយផ្ទាល់ ដើម្បីសាកសួរបញ្ជាក់ព័ត៌មានបន្ថែម។ សមាគមទាំងពីរបន្តរក្សាទំនុកចិត្ត និងភាពរឹងមាំ នៃវិស័យធនាគារ និងបន្តសហការយ៉ាងជិតស្និទ្ធជាមួយធនាគារជាតិនៃកម្ពុជា និងគ្រឹះស្ថានសមាជិក ទាំងអស់ ដើម្បីធានាការទំនាក់ទំនងច្បាស់លាស់ លើកកម្ពស់បរិយាកាសប្រតិបត្តិការឱ្យមានរបៀបរៀបរយ និងរក្សាស្ថិរភាព និងទំនុកចិត្តលើប្រព័ន្ធធនាគារនិងហិរញ្ញវត្ថុនៅកម្ពុជា ។
សូមជម្រាបថា ពេលថ្មីៗមានពលរដ្ឋទៅសម្រុកដកប្រាក់រហូតដល់ធនាគារមួយ បានផ្អាកសេវាកម្មដកប្រាក់ទាំងអស់រយៈពេល៥ថ្ងៃ។ ធនាគារនោះ បានប្រកាសផ្អាកសេវាកម្មរបស់ខ្លួនបណ្ដោះអាសន្ន ដោយសារតែការថែទាំប្រព័ន្ធ។ ក្រោយការប្រកាសនៅថ្ងៃទី១៦ ខែមីនានេះ មានអតិថិជនរបស់ធនាគារដែលប្រកាសផ្អាក បានសម្រុកទៅដកប្រាក់របស់ខ្លួន ប៉ុន្តែដកមិនបានឡើយ ដែលបង្កឱ្យមានការបារម្ភចំពោះប្រព័ន្ធធនាគារនេះ។ ទោះជាយ៉ាងនេះក្តី លោកជំទាវ ជា សិរី បានសំណូមពរដល់ប្រជាពលរដ្ឋ ទុកពេលវេលាដល់ធនាគារជាតិកម្ពុជា បន្តធ្វើការជាមួយធនាគារ ដែលពាក់ព័ន្ធរកវិធីដោះស្រាយលើបញ្ហាប្រាក់បញ្ញើរបស់អតិថិជន៕
ចែករំលែកព័តមាននេះ