ទីក្រុងណៃរ៉ូប៊ី ៖ បុរសជនជាតិចិនម្នាក់ ត្រូវបានចាប់ខ្លួននៅឯអាកាសយានដ្ឋានប្រទេសកេនយ៉ា ដោយត្រូវបានចោទប្រកាន់ពីបទព្យាយាមរត់ពន្ធស្រមោចរស់ជាង២ពាន់ក្បាល ចេញពីប្រទេសនៅអាហ្វ្រិកខាងកើតមួយនេះ។ នេះបើតាមប្រភពពី BBC និង Reuters…
ទីក្រុងណៃរ៉ូប៊ី ៖ បុរសជនជាតិចិនម្នាក់ ត្រូវបានចាប់ខ្លួននៅឯអាកាសយានដ្ឋានប្រទេសកេនយ៉ា ដោយត្រូវបានចោទប្រកាន់ពីបទព្យាយាមរត់ពន្ធស្រមោចរស់ជាង២ពាន់ក្បាល ចេញពីប្រទេសនៅអាហ្វ្រិកខាងកើតមួយនេះ។ នេះបើតាមប្រភពពី BBC និង Reuters បានចេញផ្សាយកាលពីថ្ងៃទី១២ ខែមីនា ឆ្នាំ២០២៦។
លោក Zhang Kequn អាយុ២៧ឆ្នាំ ត្រូវបានឃាត់ខ្លួន អំឡុងពេលត្រួតពិនិត្យសន្តិសុខនៅអាកាសយានដ្ឋានអន្តរជាតិ Jomo Kenyatta (JKIA) ក្នុងទីក្រុងណៃរ៉ូប៊ី (Nairobi) បន្ទាប់ពីអាជ្ញាធររកឃើញស្រមោចរស់ជាច្រើនក្នុងវ៉ាលីរបស់គាត់ ដែលត្រៀមធ្វើដំណើរឆ្ពោះទៅប្រទេសចិន។ លោក Zhang មិនទាន់ឆ្លើយតបនឹងការចោទប្រកាន់នៅឡើយទេ ប៉ុន្តែអ្នកស៊ើបអង្កេតបានបញ្ជាក់នៅក្នុងតុលាការថា បុរសជនជាតិចិនរូបនេះ មានទំនាក់ទំនងជាមួយបណ្តាញក្រុមជួញដូរស្រមោច ដែលត្រូវបានបង្គ្រាបនៅក្នុងប្រទេសកេនយ៉ាកាលពីឆ្នាំមុន។ ដ្បិតសត្វស្រមោចត្រូវបានការពារដោយសន្ធិសញ្ញាជីវចម្រុះអន្តរជាតិ ហើយការជួញដូរត្រូវបានគ្រប់គ្រងយ៉ាងតឹងរ៉ឹង។
កាលពីឆ្នាំមុន ភ្នាក់ងារសេវាសត្វព្រៃកេនយ៉ា (KWS) បានព្រមានអំពីតម្រូវការកើនឡើងសម្រាប់ស្រមោច ដែលត្រូវបានស្គាល់តាមបែបវិទ្យាសាស្ត្រថា «Messor Cephalotes» នៅតំបន់អឺរ៉ុប និងអាស៊ី ជាតំបន់សម្បូរអ្នកប្រមូលទិញយករក្សាទុកជាសត្វចិញ្ចឹម។
លោក Allen Mulama ព្រះរាជអាជ្ញាបានប្រាប់តុលាការថា នៅក្នុងវ៉ាលីសផ្ទាល់ខ្លួនរបស់លោក Zhang បានរកឃើញស្រមោចរស់ចំនួន ១ ៩៤៨ ក្បាលខ្ចប់ក្នុងបំពង់ពិសោធន៍ឯកទេស ហើយ ៣០០ ក្បាលផ្សេងទៀតរកឃើញលាក់ទុកក្នុងក្រដាសជូតមាត់ចំនួន៣សន្លឹកលាក់ក្នុងវ៉ាលីស។ ជាមួយគ្នានោះ ព្រះរាជអាជ្ញាបានស្នើសុំឱ្យតុលាការអនុញ្ញាតដើម្បីត្រួតពិនិត្យទូរស័ព្ទ និងកុំព្យូទ័រយួរដៃរបស់ជនសង្ស័យផងដែរ។
លោក Duncan Juma មន្ត្រីជាន់ខ្ពស់ KWS បានប្រាប់ BBC ថា ការចាប់ខ្លួនអ្នករត់ពន្ធស្រមោចបន្ថែមទៀតត្រូវបានរំពឹងទុក ខណៈពេលដែលក្រុមស៊ើបអង្កេតពង្រីកការស៊ើបអង្កេតរបស់ពួកគេទៅកាន់ទីក្រុងផ្សេងទៀតក្នុងប្រទេសកេនយ៉ា។
កាលពីខែឧសភា ឆ្នាំមុន តុលាការកេនយ៉ាបានកាត់ទោសបុរស៤នាក់ឱ្យជាប់ពន្ធនាគារ ១ឆ្នាំ ឬពិន័យជាប្រាក់ចំនួន ៧ ៧០០ ដុល្លារអាមេរិកពីបទព្យាយាមរត់ពន្ធស្រមោចរស់រាប់ពាន់ក្បាលចេញពីប្រទេសកេនយ៉ា ដែលជាករណីដំបូងបំផុតពាក់ព័ន្ធនឹងការរត់ពន្ធសត្វស្រមោច។ KWS បានពិពណ៌នាអំពីសេចក្តីសម្រេចកាលពីឆ្នាំមុនថាជាករណីដ៏សំខាន់ ព្រោះស្រមោចដែលរឹបអូសបានកាលពីឆ្នាំមុន គឺជាស្រមោចយក្សពូជអាហ្វ្រិក ដែល KWS អះអាងថាមានសារៈសំខាន់ដល់អេកូឡូស៊ី ដោយកត់សម្គាល់ថា អវត្តមានសម្រោចទាំងនោះពីប្រព័ន្ធអេកូឡូស៊ីអាចរំខានដល់សុខភាពដី និងជីវចម្រុះ៕
ចែករំលែកព័តមាននេះ