រាជធានីភ្នំពេញ ៖ បន្ទាប់នៅប្រទេសកម្ពុជារយៈពេលប៉ុន្មានថ្ងៃមកនេះមានការរំជើបរំជួល ដោយកន្លែងខ្លះបានផ្អាកការលក់ប្រេងរួចទៅហើយ តែក៏មានចំនួនតិចតួចទេ ហើយក្នុងនេះភាគច្រើននៅតែលក់ដដែល ប៉ុន្តែកម្ពុជាមិនទាន់ជួបស្ថានភាពដែលខ្វះប្រេងផ្គត់ផ្គង់ឡើយ។ នេះគឺជាការថ្លែងបញ្ជាក់របស់ ឯកឧត្តម កែវ…
រាជធានីភ្នំពេញ ៖ បន្ទាប់នៅប្រទេសកម្ពុជារយៈពេលប៉ុន្មានថ្ងៃមកនេះមានការរំជើបរំជួល ដោយកន្លែងខ្លះបានផ្អាកការលក់ប្រេងរួចទៅហើយ តែក៏មានចំនួនតិចតួចទេ ហើយក្នុងនេះភាគច្រើននៅតែលក់ដដែល ប៉ុន្តែកម្ពុជាមិនទាន់ជួបស្ថានភាពដែលខ្វះប្រេងផ្គត់ផ្គង់ឡើយ។ នេះគឺជាការថ្លែងបញ្ជាក់របស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល នាថ្ងៃទី៨ ខែមីនា ឆ្នាំ២០២៦។
ឯកឧត្ដម កែវ រតនៈ រដ្ឋមន្ដ្រីក្រសួងរ៉ែ និងថាមពលបានគូសបញ្ជាក់ថា សន្ធិបំរ៉ុងរបស់កម្ពុជាយើងនៅតែមាន២១ថ្ងៃដូចគ្នា ក្នុងនេះមានន័យថាបើកម្ពុជាមិនមាននាំប្រេងមកមួយដំណក់សោះ ឬមានន័យថាបិទជិតឈឹងមកពីខាងក្រៅ ហើយប្រសិនបើមានស្ថានភាពបែបនេះកើតឡើងកម្ពុជាយើងអាចឈរជើងបាន ២១ថ្ងៃ។ ប៉ុន្តែប្រទេសកម្ពុជាយើងបច្ចុប្បន្ននេះនៅតែបន្តនាំប្រេងចូលរៀងរាល់ថ្ងៃទេពោលគឺអត់ទាន់មានប្រភពណាមួយបិទ មិនមានការនាំចូលឡើយ។
ឯកឧត្ដមបានលើកឡើងថា៖ «ខ្ញុំសូមបញ្ជាក់ចំណុចនេះឱ្យច្បាស់ កម្ពុជានៅតែឈរបាននៃការរក្សាបានប្រេង២១ថ្ងៃ»។
ឯកឧត្តម រដ្ឋមន្ត្រីក្រសួងរ៉ែ និងថាមពលបានថ្លែងបញ្ជាក់ថា ប្រេងនៅពេលនេះបានឡើងថ្លៃដែលនេះវាជាការពិត ប្រេងចាប់ផ្តើមហក់ឡើងថ្លៃហើយ ដូច្នេះប្រេងដែលនាំចូលថ្មីៗគឺជាប្រេងដែលមានតម្លៃថ្លៃជាងពីមុន។
ឯកឧត្តមបានបញ្ជាក់បន្ថែមថា៖ «បរិមាណប្រេងនៅតែមានដដែល សូមកុំជ្រួលច្របល់ ទោះបីយ៉ាងណាប្រាកដហើយ យើងមិនអាចទប់បានទេពិភពលោកគឺឡើងទាំងអស់គ្នា។ បើចឹងប្រេងមកថ្មីៗនឹងមានការឡើងថ្លៃ ហើយការឡើងថ្លៃនេះមិនមែស្ថិតនៅលើបបូរមាត់របស់ម្ចាស់ការ៉ាស់ទេ ។ ក្រសួងពាណិជកម្ម និងក្រសួងសេដ្ឋកិច្ចដែលជាក្រសួងជំនាញទាំងពីរដែលពិភាក្សាលើតម្លៃនេះ នឹងកំណត់តម្លៃ ក្នុងរយៈពេល១ទៅ២ថ្ងៃទៀតនេះ ដោយដាក់ចេញតាមអត្រាថ្លៃប្រេងថ្មីដែលនាំចូលមក។ ដូច្នេះខ្ញុំសុំអំពាវនាវជាមួយនឹងការដែលប្រេងយើងនៅមានសូមកុំជ្រួលច្របល់ទៅដណ្តើមទិញមកទុកក្នុងផ្ទះតាមរយៈការដាក់ធុងជ័រពីព្រោះខ្លាចជាការចំណេញចូលដើម។ ចង់ចំណេញតិចតួច ប៉ុន្តែប្រយ័ត្នឆេះផ្ទះអស់។ ឆេះផ្ទះមួយនឹងមហន្តរាយជាងការដែលប្រេងមួយលីត្រឡើងប៉ុន្មានរយរៀលប៉ុណ្ណោះ» ។
ជាមួយគ្នានេះ ឯកឧត្ដម រដ្ឋមន្ត្រីក្រសួងរ៉ែ និងថាមពល ក៏បានសំណូមពរ សូមកុំឱ្យយកកានទៅទិញ នាំឱ្យមានចលាចលដល់ប្រទេសនៅពេលដែលប្រេងយើងនៅមានបរិមាណគ្រប់គ្រាន់ដើម្បីផ្កត់ផ្គង់។ ក្រៅពីនេះ ក្រសួងរ៉ែ និងថាមពល កំពុងសហការជាមួយក្រសួងពាណិជ្ជកម្ម តាមការណែនាំរបស់សម្តេចធិបតី ហ៊ុន ម៉ាណែត កំពុងចុះទៅមើលស្ថានីយផ្គត់ផ្គង់ប្រេងទាំងអស់ ដើម្បីធានាថាគ្មានស្ថានីយប្រេងណាលក់ប្រេងក្រៅពីការកំណត់របស់រដ្ឋដែលចេញមកពីការចរចារវាងរដ្ឋជាមួយក្រុមហ៊ុនបរទេសដែលយកប្រេងមកមានតម្លៃសមស្របតាមទីផ្សារអន្តរជាតិ។
ឯកឧត្ដមដ្ឋមន្ដ្រីបានសង្កត់ធ្ងន់ថា៖ «ដូច្នេះ អ្នកណាដែលធ្វើខុសច្បាប់ នៃការឡើងថ្លៃខុសច្បាប់ និងខុសពីដែលរារដ្ឋាភិបាលផ្តល់អាជ្ញាបណ្ណ ក្រសួងរ៉ែ និងថាមពល នឹងដកអាជ្ញាបណ្ណឈប់ឱ្យលក់ប្រេងមួយជីវិតហើយក៏ស្ថិតនៅក្នុងអន្តរកាលពិន័យផងដែរ។ ក្នុងនេះមានន័យថា មានទាំងការពិន័យក្រោមក្រសួងពាណិជ្ជកម្ម ហើយមានការដកសិទ្ធការ៉ាសសាំងចេញពីក្រសួងរ៉ែ និងថាមពល»។
ក្នុងឱកាសនោះ ឯកឧត្ដមរដ្ឋមន្ត្រីក៏បានអំពាវនាវឱ្យម្ចាស់ស្ថានីយប្រេងឥន្ធនៈ ត្រូវថែរក្សាអាជ្ញាបណ្ណរបស់ខ្លួនពីព្រោះអាជ្ញាបណ្ណនេះគឺជាតម្លៃមួយក្រោយឈប់ធ្វើការស្ថានីយប្រេងឥន្ធនៈអាចលក់អាជ្ញាបណ្ណឱ្យគេជាតម្លៃមួយ។
ទន្ទឹមនេះ ឯកឧត្ដមរដ្ឋមន្ដ្រីក៏បានព្រមានផងដែរថា៖ «បើបងប្អូនចង់ចំណេញតិចតួច ហើយបង្កបញ្ហាដល់សង្គមដែលជាអំពើខុសច្បាប់ ហើយបាត់បង់អាជ្ញាបណ្ណ បងប្អូននឹងបាត់សិទ្ធិនេះ នឹងបាត់ទ្រព្យសម្បត្តិមួយនេះ»៕
ចែករំលែកព័តមាននេះ