ខេត្តកណ្តាល ៖ ជនសង្ស័យម្នាក់ ជិះម៉ូតូមកឆក់ទូរសព្ទដៃពីក្មេងស្រីម្នាក់ កំពុងជិះកង់តាមផ្លូវ ត្រូវបានសមត្ថកិច្ចក្រុងអរិយក្សត្រ ប្រដេញតាមចាប់ខ្លួនបានមកវិញ ថែមទាំងពាក់ព័ន្ធនឹងករណីរក្សាទុកដោយខុសច្បាប់ នូវសារធាតុញៀនទៀត ។…
ខេត្តកណ្តាល ៖ ជនសង្ស័យម្នាក់ ជិះម៉ូតូមកឆក់ទូរសព្ទដៃពីក្មេងស្រីម្នាក់ កំពុងជិះកង់តាមផ្លូវ ត្រូវបានសមត្ថកិច្ចក្រុងអរិយក្សត្រ ប្រដេញតាមចាប់ខ្លួនបានមកវិញ ថែមទាំងពាក់ព័ន្ធនឹងករណីរក្សាទុកដោយខុសច្បាប់ នូវសារធាតុញៀនទៀត ។
ហេតុការណ៍នេះ បានកើតឡើងកាលពីវេលាម៉ោងវេលាម៉ោង១២និង១០នាទីថ្ងៃទី១៩ ខែកុម្ភៈ ឆ្នាំ២០២៦ ស្ថិតនៅចំណុចភូមិព្រែកតាអុងទី២ សង្កាត់ពាមឧកញ៉ាអុង ក្រុងអរិយក្សត្រ ខេត្តកណ្តាល ។
សមត្ថកិច្ច បានឲ្យដឹងថា ជនសង្ស័យមានឈ្មោះ រៀល ដារិទ្ធ ភេទប្រុស អាយុ ២៥ឆ្នាំ ជនជាតិខ្មែរ មុខរបរសន្តិសុខ ស្នាក់នៅភូមិព្រែកតាអុងទី២ សង្កាត់ពាមឧកញ៉ាអុង ក្រុងអរិយក្សត្រ ខេត្ដកណ្ដាល តេស្តទឹកនោមរកសារធាតុញៀនលទ្ធផល វិជ្ជមាន(+) ។
ចំណែកក្មេងស្រីរងគ្រោះ អាយុ០៨ឆ្នាំ ជនជាតិខ្មែរ មុខរបរសិស្ស មានទីលំនៅបច្ចុប្បន្ន ភូមិព្រែកតាអុងទី២ សង្កាត់ពាមឧកញ៉ាអុង ក្រុងអរិយក្សត្រ ខេត្ដកណ្ដាល ។
ក្នុងនោះ វត្ថុតាងចាប់យករួមមាន៖
១. ម៉ូតូម៉ាក់ HONDA DREAM ពណ៌ខ្មៅ ពាក់ផ្លាកលេខ ភ្នំពេញ 1GZ-4210 ផលិតឆ្នាំ ២០១៨ ចំនួន ០១ គ្រឿង
២.ទូរសព្ទដៃម៉ាក OPPO ពណ៌ស្វាយ ចំនួន០១គ្រឿង
៣.ទូរសព្ទដៃម៉ាក IPHONE 14 PRO ពណ៌ស (ជារបស់ជនរងគ្រោះ)
៤.គ្រឿងញៀន ចំនួន ០១កញ្ចប់តូច ប្រភេទមេតំហ្វេតាមីន
៥. កែវសម្រាប់ជក់ថ្នាំ ចំនួន ០១ ។
សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះ បានជិះកង់ចេញពីផ្ទះយាយសំដៅទៅផ្ទះម្ដាយបង្កើតរបស់គាត់វិញ ពេលជនរងគ្រោះកំពុងជិះកង់បានកាន់ទូរសព្ទម៉ាក I phone 14 pro ជិះបានពាក់កណ្ដាលផ្លូវ ក៏បានដកទូរសព្ទមកមើល ពេលកំពុងកាន់មើលស្រាប់តែមានបុរសម្នាក់ បានជិះម៉ូតូម៉ាក HONDA ពណ៌ខ្មៅ មិនចាំផ្លាកលេខមកឆក់ទូរសព្ទចេញពីដៃរបស់គាត់ រួចក៏បានជិះម៉ូតូទៅបាត់ ។ បន្ទាប់មកជនរងគ្រោះ បានជិះកង់ទៅប្រាប់ម្ដាយគាត់ថា ចោរលួចទូរសព្ទបាត់ បន្ទាប់មកម្ដាយជនរងគ្រោះបានទៅប្ដឹងសមត្ថកិច្ចឲ្យជួយអន្ដរាគមន៍តែម្ដង ។
ក្រោយមកជនរងគ្រោះបានពាក្យបណ្ដឹងភ្លាម ប៉ុស្ដិ៍ និងកម្លាំងជំនាញផ្នែកនគរបាលយុតិ្ដធម៌ក្រុងអរិយក្សត្រ បានធ្វើការតាមប្រដេញរហូតឈានទៅដល់ឃាត់ខ្លួនជនសង្ស័យ និងយកមកសួរនាំកសាងសំណុំរឿងចាត់ការតាមនិតិវិធី ។
នៅចំពោះមុខសមត្ថកិច្ច ជនសង្ស័យឈ្មោះ រៀល ដារិទ្ធ បានឆ្លើយសារភាពថា ខ្លួនបានឆក់ទូរសព្ទរបស់ជនរងគ្រោះពិតប្រាកដមែន។
បច្ចុប្បន្ន ជនសង្ស័យត្រូវបាននាំមកកាន់អធិការដ្ឋាននគរបាលក្រុងអរិយក្សត្រ ដើម្បីបន្ដចាត់ការតាមនីតិវិធីច្បាប់ ៕
ចែករំលែកព័តមាននេះ