ហាទិញ ៖ ប៉ូលិសសេដ្ឋកិច្ចខេត្តហាទិញ បង្ក្រាបទីតាំងផលិតថ្នាំបុរាណចិនក្លែងក្លាយ ដោយថ្នាំទាំងនោះមិនមែនពីរុក្ខជាតិឱសថទេ តែផ្សំចេញពីទឹកអំពៅ ម្សៅពោត អង្ករដំណើប ថ្នាំចិនសែ និងថ្នាំប៉ារ៉ាសេតាមុលជាដើម…។…
ហាទិញ ៖ ប៉ូលិសសេដ្ឋកិច្ចខេត្តហាទិញ បង្ក្រាបទីតាំងផលិតថ្នាំបុរាណចិនក្លែងក្លាយ ដោយថ្នាំទាំងនោះមិនមែនពីរុក្ខជាតិឱសថទេ តែផ្សំចេញពីទឹកអំពៅ ម្សៅពោត អង្ករដំណើប ថ្នាំចិនសែ និងថ្នាំប៉ារ៉ាសេតាមុលជាដើម…។
កម្លាំងសមត្ថកិច្ចវៀតណាម បានបើកប្រតិបត្តិការបង្ក្រាបទ្រង់ទ្រាយធំ ទៅលើខ្សែបណ្តាញផលិតថ្នាំបង្កើនទម្ងន់ បែបបុរាណក្លែងក្លាយ ដែលបង្កឱ្យមានការភ្ញាក់ផ្អើលយ៉ាងខ្លាំង ដោយសារតែការប្រើប្រាស់វត្ថុធាតុដើម ដែលមិននឹកស្មានដល់ និងមានគ្រោះថ្នាក់បំផុតចំពោះសុខភាពអ្នកប្រើប្រាស់ ។
យោងតាមការចុះផ្សាយរបស់សារព័ត៌មាន VN Express នៅថ្ងៃទី១១ ខែកុម្ភៈ ឆ្នាំ២០២៦ បានឱ្យដឹងថា កម្លាំងនគរបាលខេត្តហាទិញ បានឃាត់ខ្លួន ជនសង្ស័យចំនួន៥ នាក់ ដែលដឹកនាំដោយឈ្មោះ Đoàn Thị Lam (៥៤ឆ្នាំ) និង Đoàn Cao Cường (៤២ ឆ្នាំ) ពីបទផលិត និងជួញដូរឱសថក្លែងក្លាយទ្រង់ទ្រាយធំ ។
ក្រុមជនសង្ស័យ បានបង្កើតទីតាំងផលិតថ្នាំបង្កើនទម្ងន់បែបបុរាណ ដោយប្រើប្រាស់ល្បិចបោកប្រាស់យ៉ាងសាហាវ ហើយផ្សព្វផ្សាយលក់តាមបណ្តាញសង្គម ដោយពួកគេមិនបានប្រើប្រាស់រុក្ខឱសថ ដូចការអួតអាងឡើយ ប៉ុន្តែបែរជាប្រើ ៖ គ្រឿងផ្សំបង្គោល ៖ ម្សៅពោត, ម្សៅអង្ករដំណើប និងទឹកអំពៅ ។ សារធាតុគីមីលាយបញ្ចូល ៖ ថ្នាំប៉ារ៉ាសេតាមុល (Panactol) និងថ្នាំពេទ្យផ្សេងៗដូចជា Alphamethason-DHT និង Cinarizin ដើម្បីផ្តល់ប្រសិទ្ធភាព ក្លែងក្លាយ ឱ្យអ្នកប្រើប្រាស់មានអារម្មណ៍ថា ឃ្លានបាយ និងងងុយគេង ។
ប្រតិបត្តិការបង្ក្រាប និងការរឹបអូសនៅក្នុងការចុះឆែកឆេរទីតាំងផលិតចំនួន២កន្លែង ក្នុងពេលដំណាលគ្នា ប៉ូលិសបានរកឃើញវត្ថុតាង ដែលគួរឱ្យតក់ស្លុតរួមមាន ៖ ថ្នាំគ្រាប់សម្រេច ៖ ចំនួនជាង ១ តោន ។ ថ្នាំពេទ្យប្រភេទគ្រាប់ ៖ រាប់រយពាន់គ្រាប់ ។ វត្ថុធាតុដើម (ម្សៅពោត, ទឹកអំពៅ…) ៖ ជាង១តោនបន្ថែមទៀត ។
លទ្ធផលកោសល្យវិច្ច័យបានបង្ហាញថា ថ្នាំទាំងនេះ គ្មានផ្ទុកសារធាតុផ្សំពីរុក្ខជាតិដូចការផ្សព្វផ្សាយលើបណ្តាញសង្គមឡើយ ។ ការប្រើប្រាស់ថ្នាំដែលលាយបញ្ចូលសារធាតុគីមីផ្តេសផ្តាសបែបនេះ មិនត្រឹមតែមិនជួយឱ្យសុខភាពល្អនោះទេ តែវាអាចបំផ្លាញថ្លើម តម្រងនោម និងបង្កផលប៉ះពាល់យូរអង្វែងដល់រាងកាយទៀតផង ។
បច្ចុប្បន្ន អាជ្ញាធរកំពុងបន្តនីតិវិធីស៊ើបអង្កេត ដើម្បីស្វែងរកប្រភពចែកចាយបន្ត និងចំនួនទឹកប្រាក់ ដែលក្រុមល្មើសច្បាប់នេះប្រមូលបានពីការបោកប្រាស់ប្រជាពលរដ្ឋ ៕
ចែករំលែកព័តមាននេះ