ទីក្រុងម៉ូស្គូ៖ ក្រោយការបាញ់ប្រហារទៅលើឧត្ដមសេនីយ៍យោធារុស្ស៊ីដែលទទួលបន្ទុកខាងស៊ើបការណ៍សម្ងាត់ ប្រទេសរុស្ស៊ីយល់ថានេះជាការប៉ុនប៉ងធ្វើឃាតទៅលើរូបគាត់ដែលប្រព្រឹត្តឡើងដោយភ្នាក់ងារសម្ងាត់របស់អ៊ុយក្រែន។ សំណាងល្អ ឧត្ដមសេនីយ៍យោធារូបនោះមិនបានស្លាប់ទេ គ្រាន់តែត្រូវរបួសដោយសារគ្រាប់កាំភ្លើងដែលជនដៃដល់បាញ់ជាច្រើនគ្រាប់។
រហូតមកដល់ពេលនេះ រដ្ឋាភិបាលទីក្រុងកៀវមិនទាន់ធ្វើអត្ថាធិប្បាយលើរឿងនេះទេ។ ប៉ុន្តែករណីធ្វើឃាតបានសម្រេច ឬការប៉ុនប៉ងធ្វើឃាតមេទ័ពកំពូលៗរបស់រុស្ស៊ីមិនមែនទើបតែកើតឡើងនៅពេលនេះទេ។ តាំងពីសង្គ្រាមអ៊ុយក្រែនផ្ទុះឡើងដំបូងរហូតមកដល់ពេលនេះ មេទ័ពរុស្ស៊ីត្រូវគេលបធ្វើឃាតជាបន្តបន្ទាប់។ ក្រុមអ្នកស៊ើបអង្កេតរុស្ស៊ីថ្លែងថាឧត្ដមសេនីយ៍វ៉្លាឌីមៀ អាឡិចសេយេវ (Vladimir Alekseyev) ត្រូវបានជនមិនស្គាល់មុខម្នាក់លបបាញ់ប្រហារ។
ឧត្ដមសេនីយ៍រូបនេះត្រូវក្រុមបស្ចិមប្រទេសដាក់ទណ្ឌកម្មសេដ្ឋកិច្ចពីបទចូលរួមចំណែកនៅក្នុងការវាយប្រហារតាមប្រព័ន្ធព័ត៌មានវិទ្យា និងបទចោទថាគាត់ជាអ្នករៀបចំការប្រើប្រាស់សារធាតុពុលដើម្បីសម្លាប់ភ្នាក់ងារសម្ងាត់របស់រុស្ស៊ីម្នាក់ដែលចុះចូលទៅខាងអង់គ្លេស។ រដ្ឋមន្ត្រីការបរទេសរុស្ស៊ី លោកសឺហ្គេ ឡាវរ៉ូស (Sergei Lavrov) ចោទប្រកាន់ថាអ៊ុយក្រែនជាអ្នកនៅពីក្រោយការវាយប្រហារដែលលោកចាត់ទុកថាជាអំពើភេរវកម្ម។
លោកឡាវរ៉ូសចោទប្រកាន់ថាអ៊ុយក្រែនព្យាយាមរំខានការចរចាគ្នា។ វិមានក្រឹមឡាំងថ្លែងថាសេវាសម្ងាត់របស់រុស្ស៊ីកំពុងស៊ើបអង្កេតសំណុំរឿងនេះហើយ ហើយក៏បានយករឿងនេះជម្រាបជូនលោកពូទីនរួចហើយដែរ។ អ្នកនាំពាក្យវិមានក្រឹមឡាំង លោកប៉េស្កូស ថ្លែងថាភ្នាក់ងារសម្ងាត់កំពុងធ្វើកិច្ចការនេះ។ យើងសូមជូនពរឱ្យលោកឧត្ដមសេនីយ៍ឆាប់ជាសះស្បើយពីមុខរបួស៕ ប្រភព៖ អាអែហ្វប៉េ និងប្រភពដទៃទៀត
ចែករំលែកព័តមាននេះ